ଜୟପୁର: ରାଜସ୍ଥାନର ଜୟପୁରର ସଓ୍ବାଇ ମାନସିଂହ ଷ୍ଟାଡିୟମରେ ହାଇଭୋଲଟେଜ୍ ମ୍ୟାଚ୍ । ଆଇପିଏଲ ୨୦୨୪ର ୩୮ ତମ ମ୍ୟାଚ୍ରେ ମୁମ୍ବାଇ ଇଣ୍ଡିଆନ୍ସକୁ ଘାଇଲା କରିଛନ୍ତି ରାଜସ୍ଥାନ ରୟାଲ୍ସର ବୋଲର । ତିଳକ ବର୍ମା(୬୫) ଏବଂ ନେହାଲ ଓ୍ବାଧେରା (୪୯) ରନ୍ ବଲରେ ମୁମ୍ବାଇ ଟିମ୍ ନିର୍ଦ୍ଧାରିତ ଓଭରରେ ୯ ଓ୍ବିକେଟ ହରାଇ ୧୭୯ ରନ୍ କରିଛି । ଏହା ସହ ହାର୍ଦ୍ଦିକ ପାଣ୍ଡ୍ୟାଙ୍କ ନେତୃତ୍ବାଧୀନ ଟିମ୍ ମୁମ୍ବାଇ ରାଜସ୍ଥାନକୁ ୧୮୦ ରନ୍ର ଟାର୍ଗେଟ ଦେଇଛି ।
ଆଜିର ମ୍ୟାଚରେ ଟସ୍ ଜିତି ବ୍ୟାଟିଂ ନିଷ୍ପତ୍ତି ନେଇଥିବା ମୁମ୍ବାଇର ପୂର୍ବତନ ଅଧିନାୟକ ରୋହିତ ଶର୍ମା(୬) ଭଲ ପ୍ରଦର୍ଶନ କରିପାରି ନାହାନ୍ତି । ସେହିଭଳି ଟି-୨୦ର ନମ୍ବର ଓ୍ବାନ ବ୍ୟାଟର ସୂର୍ଯ୍ୟକୁମାର ଯାଦବ ମାତ୍ର ୧୦ ରନ୍ କରି ପ୍ୟାଭିଲିୟନ୍ ଫେରିଛନ୍ତି । ଅଧିନାୟକ ହାର୍ଦ୍ଦିକ ପାଣ୍ଡ୍ୟା ପୁଣି ଥରେ ମୁମ୍ବାଇ ଫ୍ୟାନ୍ସଙ୍କୁ ଦୁଃଖି କରିଛନ୍ତି । ସେ ୧୦ଟି ବଲ୍ ଖେଳି ମାତ୍ର ୧୦ ରନ୍ କରି ଆଉଟ ହୋଇଛନ୍ତି ।
ସେପଟେ ରାଜସ୍ଥାନ ଟିମ୍ର ସନ୍ଦୀପ ଶର୍ମା ମାତ୍ର ୧୮ ରନ୍ ଦେଇ ୫ ଟି ଓ୍ବିକେଟ ନେଇଛନ୍ତି । ଚଳିତ ଆଇପିଏଲରେ ସନ୍ଦୀପ ଶର୍ମା ଏତେ କମ୍ ରନ୍ରେ ୫ ଓ୍ବିକେଟ ନେଇ ସମସ୍ତଙ୍କୁ ଚକିତ କରିଦେଇଛନ୍ତି । ସେହିଭଳି ଟ୍ରେଣ୍ଟ ବୋଲ୍ଟ ୨ଟି ଓ୍ବିକେଟ ନେଇଥିବା ବେଳେ ୟୁଜବେନ୍ଦ୍ର ଚହଲ ଗୋଟିଏ ଓ୍ବିକେଟ ଅକ୍ତିଆର କରିଛନ୍ତି । ତେବେ ରାଜସ୍ଥାନ ପଏଣ୍ଟ ଟେବୁଲର ଶୀର୍ଷରେ ଥିବା ବେଳେ ମୁମ୍ବାଇ ଟିମ୍ ସପ୍ତମ ସ୍ଥାନରେ ରହିଛି । ଆଜିର ମ୍ୟାଚ୍ରେ ରାଜସ୍ଥାନକୁ ହରାଇ ପଏଣ୍ଟ ଟେବୁଲରେ ଉପରକୁ ଉଠିବାକୁ ନିଶ୍ଚିତ ରୂପେ ଚେଷ୍ଟା କରିବ ମୁମ୍ବାଇ ଇଣ୍ଡିଆନ୍ସ ।
