ଭଦୋଦରା, ୧୪/୦୨: ଆଉ କିଛି  ଘଣ୍ଟାର ଅପେକ୍ଷା । ଭଦୋଦରାର କୋଟମ୍ବି ଷ୍ଟାଡିୟମରେ ବହୁ ପ୍ରତିକ୍ଷୀତ ମହିଳା ପ୍ରିମିୟର  ଲିଗ୍‌ (ଡବ୍ଲ୍ୟପିଏଲ୍‌)ର ବିଗୁଲ ବାଜିବ । ଡିଫେଣ୍ଡିଂ ଚାମ୍ପିଅନ୍‌ ରୟାଲ୍‌ ଚ୍ୟାଲେଞ୍ଜର୍ସ ବେଙ୍ଗାଲୁରୁ ଓ  ଗୁଜରାଟ ଜାଏଣ୍ଟ୍‌ସ ଉଦ୍‌ଘାଟନୀ ମୁକାବିଲାରେ ସାମ୍ନାସାମ୍ନି ହେବେ । ଉଭୟ ଦଳ ବିଜୟ ସହ ଅଭିଯାନ ଆରମ୍ଭ କରିବାକୁ ଲକ୍ଷ୍ୟ ରଖିଛନ୍ତି ।  ମ୍ୟାଚ୍‌ ରାତି ୭.୩୦ରେ ଆରମ୍ଭ ହେବ । 

ଡବ୍ଲ୍ୟୁପିଏଲ୍‌ର ତୃତୀୟ ସଂସ୍କରଣ ଶୁକ୍ରବାରଠୁ ଆରମ୍ଭ ହୋଇ ମାର୍ଚ୍ଚ ୧୫ ତାରିଖରେ  ଶେଷ ହେବ । ୫ଟି ଦଳ ଟ୍ରଫି ପାଇଁ ଲଢ଼େଇ କରିବେ। ଏଥର ବେଙ୍ଗାଲୁରୁ, ଲକ୍ଷ୍ନୌ ଏବଂ ମୁମ୍ବାଇ  ଭେନ୍ୟୁରେ ସମସ୍ତ ମ୍ୟାଚ୍‌ ଖେଳାଯିବ । ଫାଇନାଲ୍‌କୁ ମିଶାଇ ମୋଟ ୨୨ଟି ମ୍ୟାଚ୍‌ ରହିଛି । ଆଗାମୀ ମାର୍ଚ୍ଚ ୧୩ ତାରିଖରେ ଏଲିମିନେଟର ଏବଂ ୧୫ ତାରିଖରେ  ଫାଇନାଲ୍‌ ମୁକାବିଲା ଅନୁଷ୍ଠିତ ହେବ । ଉଭୟ ମ୍ୟାଚ୍‌ ମୁମ୍ବାଇ ସ୍ଥିତ ବ୍ରାବୋର୍ଣ୍ଣ ଷ୍ଟାଡିୟମରେ ଖେଳାଯିବ ।  ପ୍ରଥମ ୨ଟି ସଂସ୍କରଣରେ ଯଥାକ୍ରମେ ମୁମ୍ବାଇ ଇଣ୍ଡିଆନ୍ସ ଏବଂ ରୟାଲ୍‌ ଚ୍ୟାଲେଞ୍ଜର୍ସ ଚାମ୍ପିଅନ୍‌ ଆଖ୍ୟା ଅର୍ଜନ କରିଥିଲେ । ଏଥର ବାକି ୩ଟି ଦଳ ଟ୍ରଫି ସ୍ୱପ୍ନ ପୂରଣ କରିବାକୁ ଆପ୍ରାଣ ଉଦ୍ୟମ କରିବେ । 

ସ୍ମୃତି ମନ୍ଧନାଙ୍କ ନେତୃତ୍ୱାଧିନ ରୟାଲ୍‌  ଚ୍ୟାଲେଞ୍ଜର୍ସ ଗତ ବର୍ଷ ଫାଇନାଲ୍‌ରେ ଦିଲ୍ଲୀ  କ୍ୟାପିଟାଲ୍ସକୁ ୮ ୱିକେଟ୍‌ରେ ହରାଇ  ପ୍ରଥମ ଥର ଚାମ୍ପିଅନ୍‌ ହୋଇଥିଲା ।  ଏଥର ମଧ୍ୟ ଦଳ ଟାଇଟଲ  ବଜାୟ ରଖିବା ପାଇଁ ପ୍ରସ୍ତୁତ । ଗତବର୍ଷ ଦଳକୁ  ଚାମ୍ପିଅନ୍‌ କରାଇଥିବା ଏଲିସ୍‌ ପେରୀ ଏବଂ ସ୍ପିନର  ଶ୍ରେୟଙ୍କା ପାଲଟିଲ୍‌ ଖେଳିବା ନେଇ  ଅନିଶ୍ଚିତତା ଲାଗି ରହିଛି । ଉଭୟ ଏବେ ଆହତ  ଅଛନ୍ତି । ଯଦି ଫିଟ୍‌ ଘୋଷିତ ହୁଅନ୍ତି, ତା’ହେଲେ  ଖେଳିବେ । ନଚେତ ଚାର୍ଲି ଡିନ୍‌ଙ୍କୁ ସୁଯୋଗ  ମିଳିପାରେ । ଦଳରେ ଏକାଧିକ ପାୱାର ହିଟର  ରହିଥିବାବେଳେ ବୋଲିଂ ବିଭାଗ ଦୃଢ଼ ରହିଛି । 

ଗୁଜରାଟ ଜାଏଣ୍ଟ୍‌ସ ଦଳରେ ବହୁ ଷ୍ଟାର୍‌  ଖେଳାଳି ରହିଛନ୍ତି । ବେଥ ମୁନି, ଲାଉରା  ଉଲଭାର୍ଟ, ହର୍ଲିନ ଦେଓଲ, ଡିଣ୍ଡ୍ରା  ଡଟିନ, ଅଧିନାୟିକା ଆସଲି  ଗାର୍ଡନରଙ୍କ ଉପରେ ସମସ୍ତଙ୍କ  ନଜର ରହିବ । ଡଟିନ୍‌ ପ୍ରଥମ ଥର ଆଇପିଏଲ୍‌  ଖେଳିବେ । ତାଙ୍କ ଅଲରାଉଣ୍ଡ୍‌ ପ୍ରଦର୍ଶନ ଗୁଜରାଟ ଜାଏଣ୍ଟ୍‌ସର ସ୍ୱପ୍ନ ପୂରଣ କରିପାରିବ । ସିଜନର  ପ୍ରଥମ ମ୍ୟାଚ୍‌ ଖେଳାଯାଉଥିବାରୁ ଉଭୟ ଦଳ  ଏକାଦଶ ଆକଳନ କରିବା ମୁସ୍କିଲ ହେବ । 

 -: ସମ୍ଭାବ୍ୟ ଦଳ :- 

ରୟାଲ୍‌ ଚ୍ୟାଲେଞ୍ଜର୍ସ: ସ୍ମୃତି ମନ୍ଧନା  (ଅଧିନାୟିକା), ଡାନି ୱାଟ୍‌-ହଜ୍‌, ଏସ୍‌  ମେଘନା, ଏଲିସ୍‌ ପେରୀ, ରିଚା ଘୋଷ, ରାଘବୀ  ବିଷ୍ଟ, କନିକା ଆହୁଜା, ଜର୍ଜିଆ ୱାରେହାମ୍‌,  ଜାଗ୍ରାଭି ପାୱାର, କିମ୍‌ ଗ୍ରାଥ୍‌, ରେଣୁକା ସିଂହ । 

ଗୁଜରାଟ ଜାଏଣ୍ଟ୍‌ସ: ବେଥ୍‌ ମୁନି, ଲାଉରା  ଉଲଭାର୍ଟ, ହର୍ଲିନ ଦେଓଲ, ଡିଣ୍ଡ୍ରା ଡଟିନ, ଦୟାଲନ  ହେମଲତା, ଆସଲି ଗାର୍ଡନର (ଅଧିନାୟିକା),  ସିମରନ ଶୈଖ୍‌, ସାୟଲି ସତଘରେ,  ମେଘନା ସିଂହ, ତନୁଜା କନୱାର, କାଶଭୀ  ଗୌତମ, ସବନମ୍‌ ସକିଲ/ମନ୍ନତ କଶ୍ୟପ୍‌ ।

ଚାମ୍ପିଅନ୍ସ ଟ୍ରଫି ପୂର୍ବରୁ ଏହି ସବୁ ଜିନିଷ ଉପରେ ରୋକ୍ ଲଗେଇଲା BCCI