ଦାରିଙ୍ଗବାଡ଼ି,୩୧/୫ : ଦାରିଙ୍ଗବାଡ଼ି ବ୍ଲକର ଅନେକ ଉପାନ୍ତ ଅଞ୍ଚଳକୁ ଆଜି ବି ପକ୍କା ରାସ୍ତା ନ ଥିବାବେଳେ ମାଟି ରାସ୍ତା ହିଁ ଭରସା । ମାଟି ରାସ୍ତା ଉପରେ ଭରସା କରିଥିବା ଗାଁ ଦୁଇଟି ହେଲା କିରିକୁଟି ପଞ୍ଚାୟତର ମେଡୁବାଡ଼ି ଓ ତଜରବାଡ଼ି ଗ୍ରାମ । ମେଡୁବାଡ଼ି ଗ୍ରାମରେ ୬୦ପରିବାର ବସବାସ କରୁଥିବାବେଳେ ତଜରବାଡ଼ିରେ ୪୦ପରିବାର ବସବାସ କରନ୍ତି । ଏହି ୨ଟି ଗାଁକୁ ଯିବାକୁ ହେଲେ ମାଟି କାଦୁଆ ରାସ୍ତା ହିଁ ଭରସା । ମୁଖ୍ୟ ରାସ୍ତାଠାରୁ ଲୁଦୁବାନ୍ଦା ପର୍ଯ୍ୟନ୍ତ ପକ୍କା ରାସ୍ତା ହୋଇଥିବାବେଳେ ମେଡୁବାଡ଼ି ଓ ତଜରବାଡ଼ିକୁ ପକ୍କା ରାସ୍ତା ନାହିଁ । ଲୁଦୁବାନ୍ଦାଠାରୁ ମେଡୁବାଡ଼ିକୁ ୨କିଲୋମିଟର ବାଟ ହୋଇଥିବାବେଳେ ତଜରବାଡ଼ି ସାଢେ଼ ୨ କିଲୋ ମିଟର ରାସ୍ତା ହେବ । ହେଲେ ଆଜି ପର୍ଯ୍ୟନ୍ତ ପକ୍କା ରାସ୍ତା ନ ଥିବା ଫଳରେ ଲୋକେ କାଦୁଆ ମାଟି ରାସ୍ତା ଦେଇ ଯାତାୟତ କରିଥାନ୍ତି ।
ବର୍ଷା ଦିନ ହୋଇଗଲେ ଯାତାୟତ ଏକ ପ୍ରକାର ଠପ୍ ହୋଇଯାଏ । ବର୍ଷା ହୋଇଗଲେ ଗାଁକୁ ଗାଡ଼ି ଯାଇପାରେ ନାହିଁ । ଲୋକେ ଚାଲିକି ହିଁ ଯାତାୟତ କରିଥାନ୍ତି । ଜରୁରୀ ସମୟରେ ଗାଁକୁ ଗାଡ଼ି ଯାଇ ପାରୁ ନ ଥିବା ଯୋଗୁଁ ରୋଗୀକୁ ଭାର କରି ଲୁଦୁବାନ୍ଦା ଗ୍ରାମ ପର୍ଯ୍ୟନ୍ତ ବୋହିକି ଆଣିବାକୁ ପଡ଼େ । ଫଳରେ ଲୋକେ ନାହିଁ ନ ଥିବା ଅସୁବିଧାର ସମ୍ମୁଖିନ ହୁଅନ୍ତି । ଏଣୁ ଏହି ୨ଗାଁକୁ ପକ୍କା ରାସ୍ତା ନିର୍ମାଣ କରିବାକୁ ଗ୍ରାମବାସୀ ଦାବି କରିଛନ୍ତି।
