ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପଙ୍କୁ ଘାରିଲାଣି ବିରୋଧର ଭୟ । ଇମିଗ୍ରେସନ ରେଡକୁ ନେଇ ଆନ୍ଦୋଳନ ତେଜୁଛି । ୪୪ଜଣ ପ୍ରବାସୀଙ୍କ ଗିରଫଦାରୀକୁ ନେଇ ଲସ୍ ଆଞ୍ଜେଲସରେ ବିକ୍ଷୋଭ ଆରମ୍ଭ ହୋଇଛି । ଏହି ପ୍ରତିବାଦକୁ ନିୟନ୍ତ୍ରଣ କରିବାକୁ ୨୦୦୦ କାଲିଫର୍ନିଆ ନ୍ୟାସନାଲ୍ ଗାର୍ଡଙ୍କୁ ମୁତୟନ ପାଇଁ ନିର୍ଦ୍ଦେଶ ଦେଇଛନ୍ତି ଡୋନାଲ୍ଡ ଟ୍ରମ୍ପ । ସରକାରଙ୍କ ଏହି ପଦକ୍ଷେପକୁ ବିରୋଧ କରିଛନ୍ତି ସ୍ଥାନୀୟ ଗଭର୍ଣ୍ଣର।
ଲସ୍ ଆଞ୍ଜେଲସ୍ରେ ଫେଡେରାଲ୍ ଇମିଗ୍ରେସନ୍ ଅଧିକାରୀମାନେ ଶୁକ୍ରବାର ଇମିଗ୍ରେସନ୍ ନିୟମ ଉଲ୍ଲଂଘନ କରିଥିବା ୪୪ଜଣଙ୍କୁ ଗିରଫ କରିଥିଲେ । ଯାହା ପରେ ଏକ ଫେଡେରାଲ୍ ଡିଟେନ୍ସନ୍ ସେଣ୍ଟର୍ ବାହାରେ ସଂଘର୍ଷ ଆରମ୍ଭ ହୋଇଥିଲା। ଭିଡ଼ ନିୟନ୍ତ୍ରଣ ପାଇଁ ଇମିଗ୍ରେସନ ଅଧିକାରୀମାନେ ପ୍ରତିବାଦ କରୁଥିବା ଲୋକଙ୍କ ଉପରକୁ ଟିୟର ଗ୍ୟାସ୍ ମାଡ଼ କରିଥିଲେ ।
ଆମେରିକାର ରାଷ୍ଟ୍ରପତିଙ୍କ ସରକାରୀ ବାସଭବନ ଏବଂ କାର୍ଯ୍ୟାଳୟ ହ୍ୱାଇଟ୍ ହାଉସ୍ ଶନିବାର ଏକ ବିବୃତ୍ତିରେ କହିଛି ଯେ ଟ୍ରମ୍ପ କାଲିଫର୍ଣ୍ଣିଆରେ "ବଢୁଥିବା ବିଶୃଙ୍ଖଳାର ମୁକାବିଲା" ପାଇଁ କାଲିଫର୍ଣ୍ଣିଆ ନ୍ୟାସନାଲ୍ ଗାର୍ଡ ସୈନିକଙ୍କୁ ନିୟୋଜିତ କରୁଛନ୍ତି।
କାଲିଫର୍ଣ୍ଣିଆ ରାଜ୍ୟପାଳ ଏବଂ ଡେମୋକ୍ରାଟିକ୍ ପାର୍ଟି ନେତା ଗାଭିନ୍ ନ୍ୟୁସମ୍ ଏହି ପଦକ୍ଷେପକୁ ବିରୋଧ କରିଛନ୍ତି ଏବଂ ‘ଏକ୍ସ' ରେ ଏକ ପୋଷ୍ଟ ସେୟାର କରି କହିଛନ୍ତି, ରିପବ୍ଲିକାନ୍ ପାର୍ଟି ନେତା ଏବଂ ରାଷ୍ଟ୍ରପତି ଟ୍ରମ୍ପଙ୍କ ଏହି ପଦକ୍ଷେପ "ଇଚ୍ଛାକୃତ ଭାବରେ ଉତ୍ତେଜକ ଏବଂ କେବଳ ଉତ୍ତେଜନା ବୃଦ୍ଧି କରିବ।" ନ୍ୟୁସମ୍ କହିଛନ୍ତି, "ଏହି ମିଶନ ଅନୁପଯୁକ୍ତ ଏବଂ ଜନସାଧାରଣଙ୍କ ବିଶ୍ୱାସକୁ ନଷ୍ଟ କରିବ।"
