ଭୁବନେଶ୍ଵର, ୦୬/୦୨ : କନ୍ଧମାଳ ଜିଲ୍ଲା ଦାରିଙ୍ଗବାଡି ବ୍ଲକରେ ସରୁନି ଦାଦନ ଦୁଃଖ। ବଢୁଛି ଦାଦନ ଯନ୍ତ୍ରଣା, ଅକାଳରେ ଚାଲି ଯାଉଛି ଜୀବନ। ଦାରିଙ୍ଗବାଡ଼ି ବ୍ଲକ ଗୁମିକିଆ ପଞ୍ଚାୟତ ପର୍ଡାକିଆ ଗ୍ରାମରେ ଦେଖିବାକୁ ମିଳିଛି ଏହାର ଆଉ ଏକ ଉଦାହରଣ। ଗ୍ରାମର ଆଦିବାସୀ ଯୁବକ ହେରଦ ପ୍ରଧାନ ବାହାର ରାଜ୍ୟରେ ରହି କମ୍ପାନୀରେ କାମ କରୁଥିବା ବେଳେ ଦୁର୍ଘଟଣାର ଶିକାର ହୋଇ ପ୍ରାଣ ହରାଇଛନ୍ତି। ଆଜି ତାଙ୍କର ମୃତଦେହ ଗାଁକୁ ଫେରିଛି। ଘରର ଏକମାତ୍ର ପୁଅକୁ ହରାଇ ପରିବାର ଲୋକେ ଭାଙ୍ଗି ପଡିଛନ୍ତି।
ସୂଚନାନୁଯାୟୀ, ଗତ ସେପ୍ଟେମ୍ଵର ମାସରେ ପର୍ଡାକିଆ ଗ୍ରାମର ଆଦିବାସୀ ଯୁବକ ହେରଦ ପ୍ରଧାନ (୨୫ ବର୍ଷ) ତ୍ରିଶୂରା ଜିଲ୍ଲା ଅଟପାଲମ କ୍ରସର କମ୍ପାନୀରେ କାମ କରିବାକୁ ଅନ୍ୟ ଦୁଇଜଣ ସାଙ୍ଗଙ୍କ ସହ ଯାଇଥିଲେ। କମ୍ପାନୀରେ କାର୍ଯ୍ୟ କରୁଥିବା ସମୟରେ ହେରଦ ପଥର ଗୁଣ୍ଡରେ ପୋତି ହୋଇଯାଇଥିଲେ। ତାଙ୍କୁ ଉଦ୍ଧାର କରି ଡାକ୍ତରଖାନା ନିଆଯାଇଥିଲା। ହେଲେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରେ ହେରଦଙ୍କ ଶବ ବ୍ୟବଚ୍ଛେଦ କରାଯାଇ କମ୍ପାନୀ ପକ୍ଷରୁ ଏକ ଆମ୍ଵୁଲାନ୍ସ ଯୋଗେ ମୃତଦେହ ପଠାଯାଇଛି। ଗାଁରେ ହେରଦଙ୍କ ମୃତଦେହ ପହଞ୍ଚିବା ପରେ ଶୋକାକୁଳ ପରିବେଶ ସୃଷ୍ଟି ହୋଇଛି। ଘରର ଏକମାତ୍ର ରୋଜଗାରିଆ ପୁଅକୁ ହରାଇ ପରିବାର ଲୋକେ ଭାଙ୍ଗି ପଡ଼ିଛନ୍ତି। ଘରେ ତାଙ୍କର ବୁଢା ବାପା-ମାଙ୍କ ସହ ପତ୍ନୀ ଏବଂ ୪ ବର୍ଷର କୁନି ପୁଅ ଅଛି। ହେରଦଙ୍କ ପରେ ତାଙ୍କ ପରିବାର କିଭଳି ଚଳିବ ତାହାକୁ ନେଇ ପ୍ରଶ୍ନବାଚୀ ସୃଷ୍ଟି ହୋଇଛି। ଏଥିପ୍ରତି ପ୍ରଶାସନ ଦୃଷ୍ଟି ଦେଇ ପରିବାର ପ୍ରତିପୋଷଣ ନିମନ୍ତେ ସହାୟତା ଯୋଗାଇ ଦେବାକୁ ଗ୍ରାମବାସୀ ଦାବି କରିଛନ୍ତି ।
ଏହି ଖବରଟିକୁ ପଢନ୍ତୁ-ଚୋରା କୋଇଲା ଡିପୋରେ ଚଢ଼ାଉ, ୧୪ ମାଫିଆ ଅଟକ
ଗାଁରେ କାମ ନମିଳିବାରୁ ଏଭଳି ବହୁ ଯୁବକ ବାହାର ରାଜ୍ୟରେ ରହି କାମ କରୁଛନ୍ତି। ଦାରିଙ୍ଗବାଡ଼ି ବ୍ଲକର ପାଖାପାଖି ୩୦ରୁ ଉର୍ଦ୍ଧ୍ଵ ଯୁବକ ବିଭିନ୍ନ ରାଜ୍ୟରେ ରହି କାମ କରୁଛନ୍ତି। ଦୁର୍ଘଟଣାର ଶିକାର ହୋଇ ପ୍ରାଣ ହରାଉଛନ୍ତି।
