ଭୁବନେଶ୍ଵର, ୦୬/୦୨ : ଖୁଣ୍ଟୁଣୀ ଥାନା ଅନ୍ତର୍ଗତ ୫୫ ନମ୍ଵର ଜାତୀୟ ରାଜପଥ କଡ଼ରେ ଚାଲୁଥିବା ଚୋରା କୋଇଲା ଡିପୋରେ ଚଢାଉ। କଟକର ସ୍ପେଶାଲ୍ ସ୍କ୍ଵାଡ୍ ଏହି ଡିପୋରେ ଚଢାଉ କରି ୨ଟି ମିନିଟ୍ରକ୍ ସହ ୧୪ ଜଣଙ୍କୁ ଅଟକ ରଖିଛି। ସେମାନଙ୍କୁ ଏନେଇ ପଚରାଉଚରା କରାଯାଉଛି।
ଏହି ଖବରଟିକୁ ପଢନ୍ତୁ-ସରକାରୀ ବାବୁଙ୍କୁ କଡ଼ା ତାଗିଦ୍... 'ଲୋକଙ୍କ ଅଭିଯୋଗ ତୁରନ୍ତ ସମାଧାନ କର, ନହେଲେ କାର୍ଯ୍ୟାନୁଷ୍ଠାନ'
ସୂଚନାନୁଯାୟୀ, ପ୍ରତିଦିନ ଶହ ଶହ କୁଇଣ୍ଟାଲ ଚୋରା କୋଇଲା ଖୁଣ୍ଟୁଣୀ ଅଞ୍ଚଳରୁ ବିଭିନ୍ନ ସ୍ଥାନକୁ ସ୍ଥାନାନ୍ତର କରାଯାଉଥିବା ପୂର୍ବରୁ ଅଭିଯୋଗ ହୋଇ ଆସୁଥିଲା। ବିଭିନ୍ନ ଆଳରେ କୋଇଲା ଟ୍ରକ୍ ଡ୍ରାଇଭରମାନଙ୍କୁ ପ୍ରଲୋଭନ ଦେଖାଇ କୋଇଲା ମାଫିଆମାନେ ଟ୍ରକ୍ରୁ କୋଇଲା ଖାଲି କରି ସ୍ଥାନୀୟ ଜଙ୍ଗଲ ମଧ୍ୟରେ ଗଚ୍ଛିତ ରଖି ବିକ୍ରି କରୁଥିଲେ। ସ୍ଥାନୀୟ ପୋଲିସ କି ପ୍ରଶାସନ ଏହାର ଟେର୍ ପାଉନଥିଲା। ବିଶେଷ ସୂତ୍ରରୁ ଖବର ପାଇ କଟକ ଜିଲ୍ଲା ଗ୍ରାମାଞ୍ଚଳ ଏସପି ପ୍ରତୀକ ସିଂଙ୍କ ନିର୍ଦ୍ଦେଶରେ ଏକ ସ୍ଵତନ୍ତ୍ର ଟିମ୍ ଗଠନ କରାଯାଇଥିଲା। ଏହି ଟିମ୍ ଦୀର୍ଘଦିନ ହେବ ଚୋରା କୋଇଲା ମାଫିଆଙ୍କ ଗତିବିଧି ଉପରେ ନଜର ରଖିଥିଲା। ଆଜି ଏହି ଡିପୋରେ ଚଢାଉ କରି ସ୍ଵତନ୍ତ୍ର ଟିମ୍ ୨ଟି ମିନିଟ୍ରକ୍ ଜବତ କରିବା ସହ ୧୪ ଜଣ ମାଫିଆଙ୍କୁ ଖୁଣ୍ଟୁଣୀ ଥାନାରେ ଅଟକ ରଖିଛି। ଏନେଇ ସେମାନଙ୍କୁ ପଚରାଉଚରା କରାଯାଉଛି।
