ଭୁବନେଶ୍ଵର, ୦୭/୦୩ : ନେହେରୁବଙ୍ଗଳା ମାଛଧରା ବନ୍ଦରରେ ଭୟାବହ ଅଗ୍ନିକାଣ୍ଡ। ଜଳିଗଲା ୬ଟି ବୋଟ୍ ଏବଂ ୫ଟି ଟାପା। ଗୁରୁବାର ଦିନ ଏହି ଅଗ୍ନିକାଣ୍ଡ ଘଟିଛି। ୧୦ରୁ ଉର୍ଦ୍ଧ୍ଵ ଦମକଳବାହିନୀ ମିଶି ଦୀର୍ଘ ୪ ଘଣ୍ଟା ପରେ ନିଆଁକୁ ଆୟତ୍ତ କରିଛନ୍ତି। ଅଗ୍ନିକାଣ୍ଡ ଯୋଗୁଁ ବ୍ୟାପକ କ୍ଷୟକ୍ଷତି ହୋଇଛି।
ସୂଚନାନୁଯାୟୀ, ଗୁରୁବାର ନେହେରୁବଙ୍ଗଳା ମାଛଧରା ବନ୍ଦରର ୧ ନମ୍ବର ଜେଟ୍ଟିରେ ଥିବା ଏକ ବୋଟ୍ରେ ନିଆଁ ଲାଗିଯାଇଥିଲା। ଦେଖୁଦେଖୁ ନିଆଁ ଅନ୍ୟ ବୋଟ୍ ଗୁଡ଼ିକୁ ବ୍ୟାପି ଯାଇଥିଲା। ଗ୍ୟାସ ଟାଙ୍କି ଏବଂ ଡିଜେଲ ଟାଙ୍କି ଫାଟି ୬ଟି ବୋଟ୍ ଏବଂ ୫ଟି ଟାପା ଜଳି ଯାଇଥିଲା। ଖବର ପାଇ ଘଟଣାସ୍ଥଳରେ ୧୦ରୁ ଉର୍ଦ୍ଧ୍ଵ ଇଫକୋ, ପାରାଦ୍ଵୀପ ବନ୍ଦର, ଆଇଓସିଏଲ, ପିପିଏଲ କମ୍ପାନୀର ଅଗ୍ନିଶମ ଗାଡ଼ି ସହିତ କୁଜଙ୍ଗ ଓ ତିର୍ତ୍ତୋଲ ଅଗ୍ନିଶମ ବାହିନୀ ଗାଡ଼ି ନିଆଁକୁ ଆୟତ୍ତ କରିବା ପାଇଁ ଚେଷ୍ଟା କରିଥିଲେ। ବୋଟ୍ ଗୁଡ଼ିକରେ ଜାଲ, ଡିଜେଲ ଓ ଗ୍ୟାସ୍ ଟାଙ୍କି ରହିଥିବାରୁ ନିଆଁକୁ ଆୟତ୍ତ କରିବା କଷ୍ଟକର ହୋଇଥିଲା। ପାଖାପାଖି ୪ ଘଣ୍ଟା ପରେ ନିଆଁକୁ ଆୟତ୍ତ କରାଯାଇଥିଲା। ବର୍ତ୍ତମାନ ତିନୋଟି ଅଗ୍ନିଶମ ଗାଡ଼ି ଘଟଣା ଉପରେ ଦୃଷ୍ଟି ରଖିଥିବା ବେଳେ କ୍ଷୟକ୍ଷତିର ଆକଳନ କରାଯାଇପାରି ନାହିଁ। ପାରାଦ୍ଵୀପ ଅତିରିକ୍ତ ଜିଲ୍ଲାପାଳ ନିରଞ୍ଜନ ବେହେରା, ଅତିରିକ୍ତ ଏସପି ସ୍ମୃତି ରଞ୍ଜନ କର ଓ ମ୍ୟୁନିସିପାଲଟି ଅଧ୍ୟକ୍ଷ ମଧ୍ୟ ଘଟଣା ଉପରେ ନଜର ରଖିଥିବା ସୂଚନା ମିଳିଛି।
ଏହି ଖବରଟିକୁ ପଢନ୍ତୁ- ବାଣ କାରଖାନାରେ ଭୟଙ୍କର ବିସ୍ଫୋରଣ: ଜଣେ ମୃତ, ୩ ଗୁରୁତର, ୬ ଘର କ୍ଷତିଗ୍ରସ୍ତ
