ଭୁବନେଶ୍ବର: ରବିବାର କଟକର ବାରବାଟୀ ଷ୍ଟାଡିୟମରେ ହାଇଭୋଲଟେଜ୍ ମ୍ୟାଚ୍ । ଭାରତ ବନାମ ଇଂଲଣ୍ଡ ମ୍ୟାଚ୍କୁ ନେଇ ସବୁଠି ଉତ୍ସାହ । ମ୍ୟାଚ୍ ପାଇଁ ବାରବାଟୀ ପ୍ରସ୍ତୁତ ଥିବା ଖେଳପ୍ରେମୀ ମଧ୍ୟ ତୟାର । ଏସବୁ ଭିତରେ ବାରବାଟୀ ଷ୍ଟାଡିୟମ୍ରେ ଭାରତ ଓ ଇଂଲଣ୍ଡ ମ୍ୟାଚ୍ର ଇତିହାସକୁ ନେଇ ଚର୍ଚ୍ଚା ଆରମ୍ଭ ହୋଇଯାଇଛି । ଭାରତ ଏବଂ ଇଂଲଣ୍ଡ ମଧ୍ୟରେ ତିନି ମ୍ୟାଚ୍ ବିଶିଷ୍ଟ ଦିନିକିଆ ସିରିଜର ଦ୍ୱିତୀୟ ମୁକାବିଲା ରବିବାର କଟକର ବାରବାଟୀ ଷ୍ଟାଡିୟମରେ ଖେଳାଯିବ । ତେବେ ଏଠାରେ ଇଂଲଣ୍ଡ ଟିମ୍ ଭାରତ ବିପକ୍ଷରେ ୫ଟି ମ୍ୟାଚ୍ ଖେଳି ୨ଟିରେ ବିଜୟୀ ହୋଇଛି ।
ଅନ୍ୟପଟେ ଭାରତ ୩ଟି ମ୍ୟାଚ୍ ଜିତିଛି । ମୋଟ୍ ଉପରେ ଟିମ୍ ଇଣ୍ଡିଆ ଏହି ଷ୍ଟାଡିୟମରେ ୧୭ଟି ଦିନିକିଆ ମ୍ୟାଚ୍ ଖେଳିଛି । ଏଥିରୁ ୧୩ ମ୍ୟାଚ୍ରେ ବିଜୟୀ ହୋଇଥିବା ବେଳେ ୪ଟିରେ ପରାଜିତ ହୋଇଛି । ଇଂଲଣ୍ଡ ଟିମ୍ ବାରବାଟୀ ଷ୍ଟାଡିୟମରେ ମୋଟ ୬ଟି ଦିନିକିଆ ଖେଳିଛି । ଏଥିରୁ ଗୋଟିଏ ମୁକାବିଲା ପାକିସ୍ତାନ ବିପକ୍ଷରେ ୧୯୮୯ରେ ଖେଳିଥିଲା ଏବଂ ଜିତିଥିଲା । ଭାରତ ବିପକ୍ଷରେ ୫ଟି ମୁକାବିଲା ମଧ୍ୟରୁ ୨ଟିରେ ବିଜୟୀ ହୋଇଥିଲା ଇଂଲଣ୍ଡ ।
ବାରବାଟୀ ଷ୍ଟାଡିୟମରେ ଭାରତୀୟ ଟିମ୍ ଶେଷ ଥର ପାଇଁ ୨୦୦୩ ନଭେମ୍ୱର ୬ରେ ନ୍ୟୁଜିଲାଣ୍ଡ ବିପକ୍ଷରେ ଦିନିକିଆରେ ପରାସ୍ତ ହୋଇଥିଲା । ଏହି ମ୍ୟାଚ୍ରେ ୪ ୱିକେଟରେ ପରାଜିତ ହୋଇଥିଲା ଭାରତୀୟ ଦଳ । କଟକ ଷ୍ଟାଡିୟମରେ ପ୍ରଥମ ମୁକାବିଲା ଭାରତ ଏବଂ ଇଂଲଣ୍ଡ ମଧ୍ୟରେ ହିଁ ଖେଳାଯାଇଥିଲା । ୧୯୮୨ ଜାନୁଆରୀ ୧୭ରେ ଖେଳାଯାଇଥିବା ଏହି ମୁକାବିଲାକୁ ଭାରତୀୟ ଟିମ୍ ୫ ୱିକେଟରେ ନିଜ ନାଁରେ କରିଥିଲା । ଏହି ମୁକାବିଲାରେ ସୁନୀଲ ଗାଭାସ୍କର ୮୭ ବଲରେ ୭୧ ରନ୍ କରିଥିଲେ ।
Watch Video: ସୂର୍ଯ୍ୟକୁମାର ଯାଦବଙ୍କ ପ୍ରଦର୍ଶନକୁ ନେଇ ଚିନ୍ତା, କ୍ଲିନ୍ ବୋଲ୍ଡ ହୋଇ ଫେରିଲେ ପାଭିଲିୟନ୍
ଭାରତୀୟ ଟିମ୍ ବାରବାଟୀ ଷ୍ଟାଡିୟମରେ ଗତ ୭ ଦିନିକିଆ ମ୍ୟାଚ୍ ଜିତିଛି । ରୋହିତ୍ ବାହିନୀ ରବିବାର ମ୍ୟାଚ୍ ଜିତି ଲଗାତାର ୮ଟି ଦିନିକିଆ ମ୍ୟାଚ୍ ଜିତିବାର ରେକର୍ଡ କରିବାକୁ ଚେଷ୍ଟା କରିବ । ବାରବାଟୀ ଷ୍ଟାଡିୟମରେ ସବୁଠୁ ଅଧିକ ରନ ସଚିନ ତେନ୍ଦୁଲକରଙ୍କ ନାଁରେ ରହିଛି । ତେନ୍ଦୁଲକର ଏହି ଷ୍ଟାଡିୟମରେ ୧୦ ମ୍ୟାଚ୍ ଖେଳି ୪୬୯ ରନ୍ କରିଥିଲେ ।
