ବାଗପତ, ୨୮/୦୧ : ଉତ୍ତରପ୍ରଦେଶର ବାଗପତ ଜିଲ୍ଲାରେ ବଡ଼ ଅଘଟଣ। ମଙ୍ଗଳବାର ସକାଳେ ବଡୌତର ଭଗବାନ ଆଦିନାଥଙ୍କ ନିର୍ବାଣ ଲଡୁ ପର୍ବରେ ମାନସ୍ତମ୍ଭ ମଞ୍ଚ ଭୁଶୁଡ଼ି ୭ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଛି। ଏହି ଦୁର୍ଘଟଣାରେ ୮୦ ଜଣ ଶ୍ରଦ୍ଧାଳୁ ଆହତ ହୋଇଛନ୍ତି। ମୃତକଙ୍କ ମଧ୍ୟରେ ୨ ମହିଳା ଏବଂ ୫ ଜଣ ବ୍ୟକ୍ତି ଥିବା ସୂଚନା ମିଳିଛି। ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଜାରି ରହିଛି। ଆମ୍ବୁଲାନ୍ସ ନମିଳିବା ଯୋଗୁଁ ଇ-ରିକ୍ସାରେ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଉଛି। ଆଗକୁ ମୃତକଙ୍କ ସଂଖ୍ୟା ବଢିପାରେ ବୋଲି ଆଶଙ୍କା କରାଯାଉଛି।
ଏହି ଖବରଟିକୁ ପଢନ୍ତୁ- ବୁରାରି ବିଲ୍ଡିଂ ଭୁଶୁଡିବା ଘଟଣା; ୨ ଶ୍ରମିକ ମୃତ, ଅବହେଳା କହି ବର୍ଷିଲେ ବିଜେପି ସାଂସଦ
ସୂଚନାନୁଯାୟୀ, ବଡୌତ ସହରର ଗାନ୍ଧୀ ରୋଡରେ ଶ୍ରୀ ଦିଗମ୍ଵର ଜୈନ ଡିଗ୍ରୀ କଲେଜ ମଇଦାନରେ ୬୫ ଫୁଟ ଉଚ୍ଚ ମାନ ସ୍ତମ୍ଭ ମଞ୍ଚ ତିଆରି ହୋଇଥିଲା। ମଙ୍ଗଳବାର ସକାଳେ ନିର୍ବାଣ ମହୋତ୍ସବ ଚାଲିଥିଲା। ଶ୍ରଦ୍ଧାଳୁମାନେ ମାନସ୍ତମ୍ଭ ଉପରେ ବିରାଜମାନ ହୋଇଥିବା ପ୍ରତିମାଙ୍କୁ ଜଳାଭିଷେକ କରିବାକୁ ଅସ୍ଥାୟୀ ସିଡି ଉପରେ ଚଢିଥିଲେ। ଏହି ସମୟରେ ଅସ୍ଥାୟୀ ସିଡି ଭୁଶୁଡ଼ି ପଡ଼ିଥିଲା। ଦେଖୁ ଦେଖୁ ଶ୍ରଦ୍ଧାଳୁଙ୍କ ଉପରେ ମଞ୍ଚ ଭୁଶୁଡ଼ି ମାଡି ବସିଥିଲା। ଏହି ଅଘଟଣରେ ୭ ଜଣ ଶ୍ରଦ୍ଧାଳୁଙ୍କ ମୃତ୍ୟୁ ହୋଇଥିବା ବେଳେ ୮୦ ଜଣ ଆହତ ହୋଇଛନ୍ତି। ସମସ୍ତ ଆହତଙ୍କୁ ଡାକ୍ତରଖାନାରେ ଭର୍ତ୍ତି କରାଯାଇଛି। ଆଗକୁ ମୃତ୍ୟୁ ସଂଖ୍ୟା ବଢିପାରେ ବୋଲି ଆଶଙ୍କା ରହିଛି।
ଶବ ବ୍ୟବଚ୍ଛେଦକୁ ନେଇ ଘଟଣାସ୍ଥଳରେ ଉତ୍ତେଜନା ପ୍ରକାଶ ପାଇଛି। ମୃତକଙ୍କ ପରିବାର ଶବ ବ୍ୟବଚ୍ଛେଦ କରିବାକୁ ବିରୋଧ କରୁଛନ୍ତି। ସେପଟେ ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଘଟଣାକୁ ନେଇ ଦୁଃଖ ପ୍ରକାଶ କରିଛନ୍ତି। ଆହତଙ୍କୁ ତତ୍କାଳ ହସ୍ପିଟାଲରେ ପହଞ୍ଚାଇବା ସହ ସେମାନଙ୍କର ଚିକିତ୍ସା ସୁବିଧା କରାଇବାକୁ ପ୍ରଶାସନକୁ ନିର୍ଦ୍ଦେଶ ଦେଇଛନ୍ତି।
