କଟକ, ୧୮/୦୩ : ବୟାଳିଶ ମୌଜା ଥାନା ଶ୍ରୀକୃଷ୍ଣ ବିହାର ଅଞ୍ଚଳର ବିକାଶ ମହାନ୍ତି ହତ୍ୟା ଘଟଣା। ଅଭିଯୁକ୍ତ ପ୍ରକାଶ ସୂତାରକୁ ଧରି ଘଟଣାସ୍ଥଳରେ ସିନ୍ ରିକ୍ରିଏସନ୍ କଲା ପୋଲିସ। ହୋଲି ଦିନ ଅଭିଯୁକ୍ତ ସହ ଉପସ୍ଥିତ ଥିବା ଅନ୍ୟ ୫ ଜଣଙ୍କୁ ମଧ୍ୟ ଘଟଣାସ୍ଥଳକୁ ଆଣି ପୋଲିସ ସିନ୍ ରିକ୍ରିଏସନ୍ କରିଛି। ଘଟଣାସ୍ଥଳରେ କଡ଼ା ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଛି।
ସୂଚନାନୁଯାୟୀ, ହୋଲିଦିନ ଶ୍ରୀକୃଷ୍ଣ ବିହାରର ଏକ ଭଡ଼ା ଘରେ ପ୍ରକାଶ ସୂତାର ସହିତ ଅନ୍ୟ ୭ ଜଣ ଭୋଜି ଆୟୋଜନ କରିଥିଲେ । ସେହି ଭୋଜିରେ କଲ୍ୟାଣୀନଗରରେ ରହୁଥିବା ଜଗତସିଂହପୁର ଏରସମା ଥାନା ଅଞ୍ଚଳର ବିକାଶ ମହାନ୍ତି ମଧ୍ୟ ଥିଲେ । ତେବେ କ୍ୟାରମ୍ ବୋର୍ଡ ଉପରେ ପାଣି ଢାଳିଯିବାରୁ ପ୍ରକାଶ ଓ ବିକାଶ ମଧ୍ୟରେ ପାଟିତୁଣ୍ଡ ଆରମ୍ଭ ହୋଇଥିଲା । ଏହାପରେ ପ୍ରକାଶ ରାଗିଯାଇ ଅନ୍ୟ ଏକ ରୁମ୍ରୁ ବନ୍ଧୁକ ଆଣି ବିକାଶ ମୁଣ୍ଡରେ ଲଗାଇ ଚଳାଇଥିଲା । ଫଳରେ ଘଟଣା ସ୍ଥଳରେ ବିକାଶର ମୃତ୍ୟୁ ହୋଇଥିଲା । ପରେ ପୋଲିସ ସେହି ରୁମ୍ରୁ ଅଭିଯୁକ୍ତ ପ୍ରକାଶକୁ ଗିରଫ କରି କୋର୍ଟ ଚାଲାଣ କରିଥିଲା।
ତେବେ ହତ୍ୟାକାଣ୍ଡର ପ୍ରକୃତ ଉଦ୍ଦେଶ୍ୟକୁ ନେଇ ପୋଲିସ ମନରେ ସନ୍ଦେହ ରହିଛି । ପାଣି ଢଳା ଭଳି ଛୋଟିଆ ଘଟଣାକୁ ନେଇ ହତ୍ୟାକାଣ୍ଡକୁ ପୋଲିସ ସହଜରେ ଗ୍ରହଣ କରିପାରୁନି । ତେଣୁ ପ୍ରକାଶଙ୍କୁ ଅଧିକ ଜେରା କରିବାକୁ ଅଭିଯୁକ୍ତକୁ ତିନି ଦିନିଆ ରିମାଣ୍ଡରେ ଆଣିଛି କମିଶନରେଟ୍ ପୋଲିସ।
ଏହି ଖବରଟିକୁ ପଢନ୍ତୁ-କେନ୍ଦୁଝରରେ ଡାଇରିଆ ଆତଙ୍କ, ଜଣେ ମୃତ ୧୦ରୁ ଉର୍ଦ୍ଧ୍ଵ ଆକ୍ରାନ୍ତ
