ନୂଆଦିଲ୍ଲୀ,୨୯/୦୪ : ପହଲଗାମ୍ ଆତଙ୍କୀ ଆକ୍ରମଣ ଘଟଣାକୁ ନେଇ ଭାରତ କଠୋର ନୀତି ଆପଣାଇଥିବା ବେଳେ ପାକିସ୍ତାନ ବି ନରମ ପଡ଼ିବା ଦେଖାଯାଉ ନାହିଁ। ପାକିସ୍ତାନ ମଧ୍ୟ ଭାରତ ବିରୋଧରେ କାର୍ଯ୍ୟାନୁଷ୍ଠାନ ନେଇଛି । ପାକିସ୍ତାନୀ ନେତାମାନେ ପରମାଣୁ ଧମକ ଦେଉଛନ୍ତି। ପାଣି ନ ଛାଡ଼ିଲେ ରକ୍ତ ବୋହିବ ବୋଲି ଖୋଲାଖୋଲି ଭାବେ ଚେତାବନୀ ଦେଉଛନ୍ତି । ଏଭଳି ସ୍ଥିତିରେ ପାକିସ୍ତାନର ପ୍ରଧାନମନ୍ତ୍ରୀ ଶାହବାଜ ସରିଫଙ୍କୁ ବଡ଼ଭାଇ ନୱାଜ ସରିଫ କିଛି ଗଠନମୂଳକ ପରାମର୍ଶ ଦେଇଛନ୍ତି । ପାକିସ୍ତାନର ୩ ଥର ପ୍ରଧାନମନ୍ତ୍ରୀ ରହିଥିବା ନୱାଜ ସରିଫ ଭାରତ ସହ କୌଣସିମତେ ପଙ୍ଗା ନ ନେବାକୁ ଶାହବାଜଙ୍କୁ କହିଛନ୍ତି । ଯଥାସମ୍ଭବ କୂଟନୈତିକ ରଣନୀତି ଆପଣାଇ ମାମଲାର ଫଏସଲା କରିବାକୁ ସେ ପରାମର୍ଶ ଦେଇଛନ୍ତି । ଭାରତ ବିରୋଧରେ ଆକ୍ରମଣାତ୍ମକ ରଣନୀତି ଆପଣାଇଲେ କି ପ୍ରକାର ପରିଣତି ହେବ, ତାହା ନେଇ ସେ ପାକ୍ ପ୍ରଧାନମନ୍ତ୍ରୀଙ୍କୁ ସତର୍କ କରାଇଛନ୍ତି ।
ରିପୋର୍ଟ ଅନୁସାରେ ନୱାଜ କହିଛନ୍ତି, ପହଲଗାମ୍ ଘଟଣାକୁ ନେଇ ଦୁଇଦେଶ ମଧ୍ୟରେ ଯେଉଁ ବିବାଦ ଉପୁଜିଛି, ତାହାକୁ ଶାନ୍ତିପୂର୍ଣ୍ଣ ଭାବେ ସମାଧାନ କରିବା ଆବଶ୍ୟକ । ତରବରିଆ ଭାବେ ଭାରତ ବିରୋଧରେ କୌଣସି ପ୍ରକାର ନକାରାତ୍ମକ ପଦକ୍ଷେପ ବେଶ୍ ମହଙ୍ଗା ପଡ଼ିପାରେ । ରବିବାର ସନ୍ଧ୍ୟାରେ ଲାହୋରରେ ଶାହବାଜ ଓ ନୱାଜଙ୍କ ମଧ୍ୟରେ ଭେଟ ହୋଇଥିଲା । କିଛି ଘଣ୍ଟା ଧରି ଆଲୋଚନା ହୋଇଥିଲା । ଶାହବାଜ ଘଟଣା ବାବଦରେ ନୱାଜଙ୍କୁ ଜଣାଇଥିଲେ । ଜାତୀୟ ସୁରକ୍ଷା କମିଟି (ଏନ୍ଏସ୍ସି) ବୈଠକ ପରେ ଉଭୟଙ୍କ ମଧ୍ୟରେ ଏହି ସାକ୍ଷାତ ହୋଇଥିଲା ।
ସୂତ୍ର ମୁତାବକ, ନୂଆଦିଲ୍ଲୀର କାର୍ଯ୍ୟାନୁଷ୍ଠାନ ପରେ ପାକିସ୍ତାନ କି ପ୍ରକାର ଜବାବ ଦେଇଥିଲା, ତାହା ନେଇ ଶାହବାଜ ବିସ୍ତାର ଭାବେ ନୱାଜ ସରିଫଙ୍କୁ ଅବଗତ କରାଇଥିଲେ । ତନ୍ମଧ୍ୟରେ ସିମ୍ଲା ଚୁକ୍ତି ରଦ୍ଦ, ଭାରତୀୟ ଏୟାରଲାଇନ୍ସ ପାଇଁ ପାକ୍ ବାୟୁସୀମା ବନ୍ଦ ଆଦି ଅନ୍ତର୍ଭୁକ୍ତ । ଏମିତି କି ଭାରତର ସମ୍ଭାବ୍ୟ ସାମରିକ କାର୍ଯ୍ୟାନୁଷ୍ଠାନର ସାମ୍ନା ପାଇଁ କି ପ୍ରକାର ପ୍ରସ୍ତୁତି ହୋଇଛି, ତାହା ନେଇ ବି ସେ ଜଣାଇଥିଲେ । ଇତିମଧ୍ୟରେ ପାକିସ୍ତାନର ପ୍ରତିରକ୍ଷା ମନ୍ତ୍ରୀ ଖ୍ୱାଜା ଆସିଫ ଆମେରିକା, ରୁଷ୍, ଚୀନ୍ ଓ ବ୍ରିଟେନ୍ର ପ୍ରତିନିଧିଙ୍କୁ ନେଇ ଏକ ଅନ୍ତର୍ଜାତୀୟ କମିଶନ ଗଢ଼ିବାକୁ ପ୍ରସ୍ତାବ ଦେଇଛନ୍ତି । ଏହି କମିଶନ ପହଲଗାମ୍ ଆକ୍ରମଣର ନିରପେକ୍ଷ ତଦନ୍ତ କରିବ । ସେ ଆହୁରି କହିଛନ୍ତି, ବେଲୁଚିସ୍ତାନରେ ଜାଫର ଏକ୍ସପ୍ରେସ ଆକ୍ରମଣରେ ଭାରତର ସମ୍ପୃକ୍ତି ନେଇ ପ୍ରମାଣ ଦେବାକୁ ପାକିସ୍ତାନ ପ୍ରସ୍ତୁତ । ସେହିଭଳି ପହଲଗାମ୍ ଘଟଣା ପଛରେ ସତ୍ୟତା ଉନ୍ମୋଚନ ଲାଗି ଆମେ ସବୁ ପ୍ରକାର ସହଯୋଗ ପାଇଁ ପ୍ରସ୍ତୁତ ଅଛୁ ।
ଏହି ଖବରଟିକୁ ପଢନ୍ତୁ- Pahalgam Attack: ପାକ୍ ସେନା ମୁଖ୍ୟଙ୍କ ପଳାୟନ ଚର୍ଚ୍ଚା, ପରିବାରକୁ ପଠାଇ ଦେଲେ ବିଦେଶ !
