ନୂଆଦିଲ୍ଲୀ,୨୯/୦୪: ପହଲଗାମ୍ ଆତଙ୍କବାଦୀ ଆକ୍ରମଣ ଘଟଣାକୁ ନେଇ ଭାରତ ଓ ପାକିସ୍ତାନ ମଧ୍ୟରେ ଛକାପଞ୍ଝା ସ୍ଥିତି ଲାଗିରହିଥିବା ବେଳେ ପାକ୍ ସେନା ମୁଖ୍ୟ ଜେନେରାଲ ସୟଦ ଅସୀମ ମୁନୀରଙ୍କୁ ନେଇ ବିଭିନ୍ନ ରିପୋର୍ଟ ସାମ୍ନାକୁ ଆସୁଛି । ଜେନେରାଲ ମୁନୀର ଭାରତ ପକ୍ଷରୁ ଆକ୍ରମଣ ହେବା ଭୟରେ କେଉଁଆଡ଼େ ପଳାୟନ କରିଥିବା କୁହାଯାଉଛି । ସେ ବିଦେଶ ପଳାଇଥିବା ବି ଚର୍ଚ୍ଚା ହେଉଛି । ତେବେ ତାହା ପୂର୍ବରୁ ସେ ନିଜ ପରିବାର ଲୋକଙ୍କୁ ବିଦେଶ ପଠାଇ ଦେଇଥିବା ନେଇ ରିପୋର୍ଟ ପ୍ରକାଶ ପାଇଥିଲା । ବିଶେଷକରି ଭାରତୀୟ ଗଣମାଧ୍ୟମରେ ଏଭଳି ରିପୋର୍ଟମାନ ଦେଖିବାକୁ ମିଳିଛି । ସୋସିଆଲ ମିଡିଆରେ ମଧ୍ୟ ‘ମୁନୀର-ଆଉଟ୍’ ଟ୍ରେଣ୍ଡ ଚାଲିଛି ।
ଆଉ କିଛି ରିପୋର୍ଟ ମୁତାବକ, ଜେନେରାଲ ମୁନୀର ରାୱଲପିଣ୍ଡିରେ ଏକ ବଙ୍କର ମଧ୍ୟରେ ଲୁଚିଛନ୍ତି । ସ୍ଥିତି ସ୍ୱାଭାବିକ ନ ହେବା ପର୍ଯ୍ୟନ୍ତ ସେଠାରେ ହିଁ ସେ ରହିବେ ବୋଲି କୁହାଯାଉଛି । ଏଭଳି ଘଟଣା ମଧ୍ୟରେ ପାକିସ୍ତାନ ପ୍ରଧାନମନ୍ତ୍ରୀଙ୍କ କାର୍ଯ୍ୟାଳୟ (ପିଏମ୍ଓ) ପକ୍ଷରୁ ଏକ ଗ୍ରୁପ୍ ଫଟୋ ସେୟାର କରାଯାଇଛି । ଆବଟ୍ଟାବାଦରେ ଅନୁଷ୍ଠିତ ଏକ କାର୍ଯ୍ୟକ୍ରମରେ ପ୍ରଧାନମନ୍ତ୍ରୀ ଶାହବାଜ ସରିଫ ଓ ଅନ୍ୟ ବରିଷ୍ଠ ଅଧିକାରୀଙ୍କ ସହ ମୁନୀରଙ୍କୁ ଦେଖିବାକୁ ମିଳିଛି । ଏପ୍ରିଲ ୨୨ରେ ପହଲଗାମ୍ ଆତଙ୍କୀ ଆକ୍ରମଣ ପରେ ଭାରତ କଠୋର ଆଭିମୁଖ୍ୟ ଆପଣାଇଛି ।
ଭାରତ ତରଫରୁ ନିଶ୍ଚିତ ଯୁଦ୍ଧ ହେବା ନେଇ ମଧ୍ୟ ପାକ୍ ମନ୍ତ୍ରୀମାନେ ଆଶଙ୍କା କରୁଛନ୍ତି । ଏଭଳି ସ୍ଥିତିରେ କେବଳ ପାକ୍ ସେନା ମୁଖ୍ୟ କାହିଁକି ଅନ୍ୟ ଅଧିକାରୀମାନେ ମଧ୍ୟ ସେମାନଙ୍କ ପରିବାର ଲୋକଙ୍କୁ ବ୍ରିଟେନ୍ ଓ ନ୍ୟୁଜର୍ସି ପଠାଇ ଦେଇଥିବା ସୂତ୍ରରୁ ଜଣାପଡ଼ିଛି । ବିଭିନ୍ନ ସେନାଧିକାରୀ ସେମାନଙ୍କ ପରିବାର ଓ ସମ୍ପର୍କୀୟଙ୍କୁ ଆମେରିକା, ବ୍ରିଟେନ୍ ଓ ଅନ୍ୟ ଦୂର ରାଷ୍ଟ୍ରକୁ ପଠାଇ ଦେଇଥିବା କୁହାଯାଉଛି । ଉଲ୍ଲେଖଯୋଗ୍ୟ, କିଛିଦିନ ତଳେ ଏକ କାର୍ଯ୍ୟକ୍ରମରେ ଜେନେରାଲ ମୁନୀର ଭାରତର କାଶ୍ମୀରକୁ ପାକିସ୍ତାନର ଗ୍ରୀବା ବୋଲି ଅଭିହିତ କରିଥିଲେ । ଏହାସହ ସେ ଦୁଇ-ରାଷ୍ଟ୍ର ଥିଓରି କଥା ବି କହିଥିଲେ ।
ଏହି ଖବରଟିକୁ ପଢନ୍ତୁ-ଯୁଦ୍ଧ ଭୟରେ ପାକ୍ ସେନାରେ ଗଣ ଇସ୍ତଫା;୨୫୦ ଅଫିସର, ୪୫୦୦ ସୈନ୍ୟ ଛାଡ଼ି ପଳାଇଲେ
