ନୂଆଦିଲ୍ଲୀ, ୨୫/୦୪ : ସ୍ଵାଧୀନତା ସଂଗ୍ରାମୀ ବୀର ସାଭରକରଙ୍କ ଉପରେ ଆପତ୍ତିଜନକ ଟିପ୍ପଣୀ ଦେଇ ମାନହାନି ମାମଲାରେ ଫସିଥିବା ରାହୁଲ ଗାନ୍ଧୀଙ୍କୁ ଆଶ୍ଵସ୍ତି। ଆହ୍ଲାବାଦ ହାଇକୋର୍ଟଙ୍କ ନିର୍ଦ୍ଦେଶ ଉପରେ ରୋକ୍ ଲଗାଇଲେ ସୁପ୍ରିମକୋର୍ଟ। ଏହା ସହ ୟୁପି ସରକାରଙ୍କୁ ସୁପ୍ରିମକୋର୍ଟ ନୋଟିସ ଜାରି କରିଛନ୍ତି। ରାହୁଲ ଗାନ୍ଧୀ ଏକ ରାଲିରେ ବୀର ସାଭରକରଙ୍କୁ ନେଇ ବିବାଦୀୟ ବୟାନ ଦେଇଥିଲେ। ଏନେଇ ତାଙ୍କ ନାମରେ ଏକ ମାନହାନି ମାମଲା ରୁଜୁ ହୋଇଥିଲା। ଏହି ମାମଲାରେ ଏବେ ସୁପ୍ରିମକୋର୍ଟ ଶୁଣାଣୀ କରି ରାହୁଲ ଗାନ୍ଧୀଙ୍କୁ ଆଶ୍ଵସ୍ତି ଦେବା ସହ କଡ଼ା ଭତ୍ସନା କରିଛନ୍ତି।
ସୁପ୍ରିମକୋର୍ଟ କହିଛନ୍ତି ଯେ, ସ୍ଵାଧୀନତା ସଂଗ୍ରାମୀଙ୍କ ବିରୋଧରେ ଏଭଳି ଟିପ୍ପଣୀ ଦେବା ଅନୁଚିତ। ଆଗକୁ ଯେମିତି ଏପରି ଭୁଲ୍ ନହୁଏ। ସ୍ଵାଧୀନତା ସଂଗ୍ରାମୀଙ୍କୁ ନେଇ ଏଭଳି ମଜାକ୍ ଉଡାନ୍ତୁ ନାହିଁ। ବୀର ସାଭରକରଙ୍କୁ ନେଇ ରାହୁଲଙ୍କ ଟିପ୍ପଣୀ ଦାୟିତ୍ଵହୀନତା। ତାଙ୍କୁ ଏଭଳି କହିବାର ନଥିଲା।
ସୂଚନାନୁଯାୟୀ, ୨୦୨୨ରେ ରାହୁଲ ଗାନ୍ଧୀ ଭାରତ ଯୋଡ଼ ଯାତ୍ରା ସମୟରେ ମହାରାଷ୍ଟ୍ରର ଅକୋଲାରେ ରାଲି କରିଥିଲେ। ଏହି ସମୟରେ ସେ ସାଭରକରଙ୍କୁ ନେଇ ବିବାଦୀୟ ଟିପ୍ପଣୀ ଦେଇଥିଲେ। ସେ ଏକ ଚିଠି ଦେଖାଇ କହିଥିଲେ ଯେ, ସାଭରକର ଇଂରେଜଙ୍କ ଗୋଲାମ ହୋଇ ରହିବା କଥା କହିଥିଲେ। ସେମାନଙ୍କୁ କ୍ଷମା ବି ମାଗିଥିଲେ। ହେଲେ ଗାନ୍ଧୀ-ନେହେରୁ ଏଭଳି କରିନଥିଲେ। ଏଥିପାଇଁ ସେମାନଙ୍କୁ ବର୍ଷ ବର୍ଷ ଧରି ଜେଲ୍ରେ ରହିବାକୁ ପଡ଼ିଥିଲା। ରାହୁଲଙ୍କ ଏହି ପ୍ରତିକ୍ରିୟାକୁ ନେଇ ଜଣେ ଅଧିବକ୍ତା ମାନହାନି ମାମଲା କରିଥିଲେ। ଏହି ମାମଲାରେ ଏବେ ସୁପ୍ରିମକୋର୍ଟ ଶୁଣାଣି କରି ରାହୁଲ ଗାନ୍ଧୀଙ୍କୁ ଆଶ୍ଵସ୍ତି ଦେବା ସହ ଅତୀତର ଘଟଣା ବିଷୟରେ କହିଥିଲେ। ବେଞ୍ଚ କହିଥିଲେ ଯେ, ଆପଣ ଜାଣିଛନ୍ତି କି, ମହାତ୍ମା ଗାନ୍ଧୀ ବି ଅତୀତରେ ଇଂରେଜଙ୍କର ବିଶ୍ଵସ୍ତ ସେବକ ଭଳି ଶବ୍ଦର ବ୍ୟବହାର କରିଥିଲେ।
ଏହି ଖବରଟିକୁ ପଢନ୍ତୁ-ବାନ୍ଦିପୋରାରେ ଏନ୍କାଉଣ୍ଟର, LET ଟପ୍ କମାଣ୍ଡର ଅଲତାଫ୍ ଲାଲି ନିହତ
