ନୂଆଦିଲ୍ଲୀ: ମରୁଭୂମିରେ ଲହଡ଼ି ମାରୁଛି ପାଣି । ଯେଉଁଠି ପାଣି ବୁନ୍ଦାଏ ମିଳିବା ସ୍ୱପ୍ନ ସେଠାରେ ପାଣି, ପାଣି ଆଉ ପାଣି । ଲଗାଣ ବର୍ଷାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ଆଫ୍ରିକାର ସାହାରା ମରୁଭୂମି ଜଳମଗ୍ନ ହୋଇଥିବା ନେଇ ଜଣାପଡ଼ିଛି । ଦୀର୍ଘ ୫୦ ବର୍ଷ ମଧ୍ୟରେ ସାହାରା ମରୁଭୂମିରେ ଏଭଳି ବର୍ଷା ହୋଇଛି । ବିଶେଷ କରି ସାହାରା ମରୁଭୂମିରେ ଦୀର୍ଷ ୫୦ ବର୍ଷ ଧରି ଶୁଖିଲା ପଡ଼ିଥିବା ଇରିକି ହ୍ରଦ ଜଳମଗ୍ନ ହୋଇଛି । ବର୍ଷା ପରେ ସାଟେଲାଇଟ୍ ମାଧ୍ୟମରେ ଉତ୍ତୋଳନ କରାଯାଇଥିବା ଦୃଶ୍ୟ ସମସ୍ତଙ୍କ ମନକୁ ଛୁଇଁଛି । ସୁଦୀର୍ଘ ମରୁଭୂମିରେ ନୀଳର ଚାଦର ବିଛାଇ ହୋଇଯାଇଛି ।
ଧାଡ଼ି ଧାଡ଼ି ହୋଇ ଛିଡ଼ା ହୋଇଛି ଖଜୁରୀ ଗଛ, ଆଉ ତା ତଳେ ଜମି ରହିଥିବା ପାଣି ଶୁଷ୍କ ସାହାରାକୁ ସବୁଜମୟ କରିଦେଇଛି । ଦକ୍ଷିଣପୂର୍ବ ମରକ୍କୋରେ ସାଧାରଣତଃ ଗ୍ରୀଷ୍ମର ଶେଷ ଭାଗରେ ବର୍ଷା ହୁଏ ନାହିଁ। ଏଠାରେ ବର୍ଷକୁ ୨୫୦ ମିଲିମିଟରରୁ କମ୍ ବର୍ଷା ହୋଇଥାଏ। କିନ୍ତୁ ସେପ୍ଟେମ୍ବରରେ ଦୁଇ ଦିନ ଏପରି ବର୍ଷା ହୋଇଛି, ଯାହା ସାହାରା ମରୁଭୂମିକୁ ଜଳମଗ୍ନ କରିଦେଇଛି । ରାବତଠାରୁ ପ୍ରାୟ ୪୫୦ କିଲୋମିଟର ଦକ୍ଷିଣରେ ଥିବା ଟାଗୋନିଟ୍ ଗାଁରେ ୨୪ ଘଣ୍ଟା ମଧ୍ୟରେ ୧୦୦ ମିଲିମିଟରରୁ ଅଧିକ ବର୍ଷା ରେକର୍ଡ କରାଯାଇଥିଲା ।
ମରକ୍କୋର ପାଣିପାଗ କେନ୍ଦ୍ର ନିର୍ଦ୍ଦେଶକ କହିଛନ୍ତି, ଖୁବ୍ କମ୍ ସମୟ ମଧ୍ୟରେ ଆମେ ଏତେ ବର୍ଷା କେବେ ଦେଖିନଥିଲୁ । ଦୀର୍ଘ ୫୦ ବର୍ଷ ପରେ ଏପରି ବର୍ଷା ହୋଇଛି । ମରୁଭୂମିରେ ଲଗାଣ ବର୍ଷା ହେବା ପାଣିପାଗ ପରିବର୍ତ୍ତନ ଆଡ଼କୁ ଇସାରା କରୁଛି । ସାହାରା ମରୁଭୂମି ଅଞ୍ଚଳରେ ଆଗାମୀ ଦିନରେ ଜଳବାୟୁ ପରିବର୍ତ୍ତନ ଜନିତ ସମସ୍ୟା ଦେଖାଯାଇପାରେ ବୋଲି ଆକଳନ କରିଛନ୍ତି ପାଣିପାଗ ବିଜ୍ଞାନୀ । ତେବେ ଏହା ପୂର୍ବରୁ ମରୁଭୂମିରେ ପ୍ରବଳ ଉତ୍ତାପ କାରଣରୁ ମରକ୍କୋ ଏବଂ ଆଲଗେରିଆର ୨୦ରୁ ଅଧିକ ଲୋକଙ୍କ ଜୀବନ ଯାଇଛି । ଏହାକୁ ଦୃଷ୍ଟିରେ ରଖି ମୋରୋକୋ ସରକାର ଜରୁରୀକାଳୀନ ରିଲିଫ୍ ପାଣ୍ଠି ଆବଣ୍ଟନ କରିଛନ୍ତି । ଏସବୁ ମଧ୍ୟରେ ହଠାତ୍ ବର୍ଷା ହେବା ଦ୍ବାରା ମରୁଭୂମିରେ ଜୀବନକୁ ସାମାନ୍ୟ ଆଶ୍ବସ୍ତି ମିଳିପାରିବ ବୋଲି କୁହାଯାଉଛି ।
