ଭୁବନେଶ୍ଵର, ୦୭/୦୪ : ଦାଣ୍ଡରେ ପଡ଼ି ହାଟରେ ଗଡ଼ୁଛି ଯାତ୍ରା କଳି। ଯାତ୍ରା କଳାକାର ଓ ମାଲିକଙ୍କ ମଧ୍ୟରେ ତୁଟୁନି ବିବାଦ। ବାଲିଚନ୍ଦ୍ରପୁର ଥାନାରେ ହାସ୍ୟ ଅଭିନେତା ନରି ପଣ୍ଡାଙ୍କ ଲିଖିତ ଅଭିଯୋଗ ପରେ ତୁଳସୀ ଗଣନାଟ୍ୟ ମାଲିକଙ୍କ ଢାବା ଏବଂ ଅଫିସରେ ପହଞ୍ଚିଲା ପୋଲିସ। ଅନନ୍ତ ନାରାୟଣଙ୍କ ଢାବାରେ ଲାଗିଥିବା ସମସ୍ତ ସିସିଟିଭି ଫୁଟେଜ୍ ଯାଞ୍ଚ କରିଛନ୍ତି ବାଲିଚନ୍ଦ୍ରପୁର ଥାନା ଅଧିକାରୀ।
ନରି ପଣ୍ଡା ଅଭିଯୋଗ କରିଛନ୍ତି ଯେ, ସେ ତୁଳସୀ ଗଣନାଟ୍ୟ ମାଲିକଙ୍କ ଅଫିସକୁ ଟଙ୍କା ଫେରାଇବା ପାଇଁ ଆସିଥିବା ବେଳେ ତାଙ୍କୁ ଅନନ୍ତ ନାରାୟଣ ମାଡ଼ ମାରିଥିଲେ। ସେପଟେ ଏ ଘଟଣାକୁ ଅନନ୍ତ ଖଣ୍ଡନ କରିଥିଲେ। ନରି ପଣ୍ଡାଙ୍କ ଅଭିଯୋଗକୁ ଆଧାର କରି ଏବେ ପୋଲିସ ଅନନ୍ତ ନାରାୟଣଙ୍କ ଢାବା ଏବଂ ଅଫିସରେ ପହଞ୍ଚିଛି। ଏହି ଘଟଣାର ସତ୍ୟାସତ୍ୟ ନେଇ ଢାବାର ସିସିଟିଭି ଫୁଟେଜ୍ ଯାଞ୍ଚ କରିଛି। ସେଦିନର ଘଟଣାକୁ ନେଇ ଅନନ୍ତଙ୍କୁ ପଚରାଉଚରା କରାଯାଇଛି। ଚୁକ୍ତି ହୋଇଥିବା ପେପର ଯାଞ୍ଚ କରିବା ସହ ଢାବାର ଅନ୍ୟ କର୍ମଚାରୀଙ୍କୁ ପୋଲିସ ପଚରାଉଚରା କରିଛି।
ସୂଚନାନୁଯାୟୀ, ଗତ ୫ ତାରିଖ ଦିନ ହାସ୍ୟ ଅଭିନେତା ନରି ପଣ୍ଡା ବାଲିଚନ୍ଦ୍ରପୁର ଥାନାରେ ଲିଖିତ ଅଭିଯୋଗ କରିଥିଲେ। ତୁଳସୀ ଗଣନାଟ୍ୟର ମାଲିକ ଅନନ୍ତ ନାରାୟଣ ଧଳ ତାଙ୍କୁ ପୂର୍ବରୁ ମାଡ ମାରିଥିଲେ ଏବଂ ତାଙ୍କ ପତ୍ନୀଙ୍କୁ ଫୋନରେ ଖରାପ ବ୍ୟବହାର କରିଥିଲେ ବୋଲି ଅଭିଯୋଗ କରିଥିଲେ। ସେପଟେ ଯାତ୍ରା ମାଲିକମାନେ ଏକତ୍ରିତ ହୋଇ ତାଙ୍କୁ ବୟକଟ କରିଥିଲେ। ଏନେଇ ସେ କହିଥିଲେ ଯେ, ବୟକଟ କରିବା ପୂର୍ବରୁ ମାଲିକମାନେ ଆଲୋଚନା କରିବାର ଥିଲା। କଳାକାର ସଂଘ ମୋ ସହ ଅଛି । ଆଗାମୀ ଦିନରେ କଳାକାର ସଂଘ ଯାହା ନିଷ୍ପତି ନେବ ତାକୁ ନେଇ ସେ ଆଗକୁ ଯିବି।
ଏହି ଖବରଟିକୁ ପଢନ୍ତୁ-କଳାକାର ମାଲିକ ବିବାଦ ; ଖୁବଶୀଘ୍ର ଆଗାମୀ ନିଷ୍ପତ୍ତି ଜଣାଇବି : ନରି ପଣ୍ଡା
