ନୂଆଦିଲ୍ଲୀ,୦୭/୦୪: ଇଣ୍ଡିଆନ ପ୍ରିମିୟର ଲିଗ୍ର ସିଜିନ୍ ୧୮ ଜାରି ରହିଛି । ଏମଏସ୍ ଧୋନୀଙ୍କର ଏହା ଶେଷ ଆଇପିଏଲ ବୋଲି ଚର୍ଚ୍ଚା ଜୋର ଧରିଛି । ସମସ୍ତଙ୍କ ମନରେ ସେହି ଗୋଟିଏ ପ୍ରଶ୍ନ । କ'ଣ ଏମଏସ୍ ଧୋନୀ ଏହି ସିଜିନ୍ ପରେ ଅବସର ନେବେ ? ଶନିବାର ଚେନ୍ନାଇ ସୁପରକିଙ୍ଗସ୍ ଓ ଦିଲ୍ଲୀ କ୍ୟାପିଟାଲ୍ସ ମଧ୍ୟରେ ହୋଇଥିବା ମ୍ୟାଚ ପରେ ଏହି ଚର୍ଚ୍ଚା ଅଧିକ ହେଉଛି । କାରଣ ଉକ୍ତ ମ୍ୟାଚ ଦେଖିବାକୁ ଧୋନୀଙ୍କ ପୁରା ପରିବାର ଆସିଥିଲେ । କିନ୍ତୁ ଧୋନୀଙ୍କର ଏହା ଶେଷ ଆଇପିଏଲ କି ପ୍ରଶ୍ନରେ ସେ ମୁହଁ ଖୋଲିଛନ୍ତି ।
ଅବସର ଚର୍ଚ୍ଚାକୁ ନେଇ ଆଉ ଏକ ବୟାନ ଦେଇଛନ୍ତି ଧୋନୀ । ଯାହା ତାଙ୍କ ଫ୍ୟାନ୍ସଙ୍କୁ ସାମାନ୍ୟ ଖୁସି ଦେଇଛି । ଏକ ପୋଡ଼କାଷ୍ଟରେ ସେ କହିଛନ୍ତି, '' ମୁଁ ଏହି ନିଷ୍ପତ୍ତି ନେଉନାହିଁ । ମୁଁ ଏ ବିଷୟରେ ଭାବୁ ନାହିଁ । ବର୍ତ୍ତମାନ ତ ବିଲକୁଲ ନୁହେଁ । ଏହି ନିଷ୍ପତ୍ତି ମୋର ଶରୀର ନେବ । ଏ ନେଇ ଆହୁରି ୧୦ ମାସ ସମୟ ଅଛି । ମୋତେ ଏବେ ୪୩ । ଆଉ କିଛି ମାସ ପରେ ସେ ୪୪ ବର୍ଷରେ ପଦାର୍ପଣ କରିବି । ଏହା ପରେ ଖେଳିପାରୁଛି କି ନାହିଁ ଦେଖିବି । ଏହା ପରେ ନିଷ୍ପତ୍ତି ନେବି ।''
ଅଧିକ ପଢ଼ନ୍ତୁ...ଆଇପିଏଲରୁ ସନ୍ନ୍ୟାସ ନେବେ କି ଧୋନୀ ? ପ୍ରଥମ ଥର ମ୍ୟାଚ୍ ଦେଖିବାକୁ ଆସିଲେ ବାପା –ମା !
ଗତ ୫ ତାରିଖରେ ଦିଲ୍ଲୀ ବିପକ୍ଷରେ ଚେନ୍ନାଇର ମ୍ୟାଚ ଥିଲା । ଏହା ପରେ ଅଭିଜ୍ଞ ବ୍ୟାଟର ମହେନ୍ଦ୍ର ସିଂହ ଧୋନୀଙ୍କ ଅବସର ନେଇ ଚର୍ଚ୍ଚା ଚାଲିଛି । ମ୍ୟାଚ ଦେଖିବାକୁ ତାଙ୍କ ବାପାମାଆଙ୍କ ସହିତ ପୁରା ପରିବାର ଆସିଥିଲେ । ତେଣୁ ହୁଏତ ଏହା ତାଙ୍କର ଶେଷ ଆଇପିଏଲ ହୋଇଥାଇପାରେ ବୋଲି ଅନୁମାନ କରାଯାଉଥିଲା । ପୂର୍ବରୁ ଚେନ୍ନାଇ କୋଚ୍ ଷ୍ଟିଫେନ ଫ୍ଲେମିଂ ମଧ୍ୟ ଧୋନୀଙ୍କ ଅବସର ନେଇ କୌଣସି ଚର୍ଚ୍ଚା ହୋଇନାହିଁ ବୋଲି କହିଥିଲେ ।
ଆଇପିଏଲ ଇତିହାସରେ ଚେନ୍ନାଇ ସୁପରକିଙ୍ଗସ୍ ସବୁଠୁ ସଫଳ ଦଳ । ମହେନ୍ଦ୍ର ସିଂହ ଧୋନୀଙ୍କ ନେତୃତ୍ୱରେ ୫ ଥର ଚେନ୍ନାଇ ଚାମ୍ପିଅନ୍ ହୋଇଛି । ଚେନ୍ନାଇ କ୍ୟାପ୍ଟେନ୍ସି ଛାଡ଼ିବା ପରେ ଋତୁରାଜ ଗାଏକ୍ୱାଡ଼ ଦଳର ନେତୃତ୍ୱ ନେଇଛନ୍ତି । ଚଳିତ ସିଜନରେ ଦଳ ୪ଟି ମ୍ୟାଚ ଖେଳିସାରିଛି । ଗୋଟିଏ ଜିତିଥିବା ବେଳେ ବାକି ୩ଟି ମ୍ୟାଚରେ ପରାସ୍ତ ହୋଇଛି ।
