ମାଲକାନଗିରି,୩୧/୫ : ସୀମାନ୍ତ ଛତିଶଗଡ଼ରେ ଯବାନ ଓ ମାଓବାଦୀଙ୍କ ମଧ୍ୟରେ ହୋଇଥିବା ଗତ ୨୧ତାରିଖର ଗୁଳି ବିନିମୟ ଘଟଣାକୁ ବିରୋଧ କରି ଜୁନ୍ ୧୦ ତାରିଖରେ ଦେଶବ୍ୟାପୀ ବନ୍ଦ ଡାକରା ଦେଇଛି ମାଓ ସଙ୍ଗଠନ। ଏହା ସହ ଜୁନ୍ ୨ ରୁ ଅଗଷ୍ଟ ୩ ତାରିଖ ଯାଏଁ ଏହି ଗୁଳି ବିନିମୟରେ ମୃତ ମାଓ ନେତା ବାସବରାଜଙ୍କ ସମେତ ୨୮ ଜଣ ସହିଦ କମ୍ରେଡ ଙ୍କ ପାଇଁ ସ୍ମୃତିସଭା ଆୟୋଜନ କରିବାକୁ ସଙ୍ଗଠନ ପକ୍ଷରୁ ଅପିଲ କରାଯାଇଛି।
ପ୍ରକାଶ ଯେ, ଛତିଶଗଡ଼ର ଅବୁଝମାଡ଼ ଜଙ୍ଗଲରେ ଗତ ୨୧ ତାରିଖ ଦିନ ପୋଲିସ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ଘଟିଥିବା ବେଳେ ଏହି ଗୁଳି ବିନିମୟରେ ୨୮ ଜଣ ମାଓବାଦୀ ନିହତ ହୋଇଥିଲେ। ଯେଉଁଥିରେ ମାଓ ସଙ୍ଗଠନର ସାଧାରଣ ସମ୍ପାଦକ ମୋଷ୍ଟୱାଣ୍ଟେଡ ବାସବରାଜଙ୍କ ସମେତ ଦଳର ବିଭିନ୍ନ ସ୍ତରର ୨୭ ଜଣ ମାଓବାଦୀ ନିହତ ହୋଇଥିଲେ। ଯାହାକୁ ନେଇ ମାଓ ସଙ୍ଗଠନ କେନ୍ଦ୍ର ସରକାର ଓ ଛତିଶଗଡ ସରକାରଙ୍କୁ ନିନ୍ଦା କରିବା ସହ ଏହା ଏକ ହତ୍ୟାକାଣ୍ଡ ବୋଲି କୁହାଯାଇଛି । ଯାହାକୁ ନେଇ ଆସନ୍ତା ଜୁନ୍ ୧୦ ତାରିଖରେ ଦେଶବ୍ୟାପୀ ବନ୍ଦ ପାଳନ କରିବାକୁ ମାଓ ସଙ୍ଗଠନ ଅନୁରୋଧ କରିଛି । ଏହା ସହ ମାଓବାଦୀ ମାନେ ଗତ ୨ ମାସ ଧରି କେନ୍ଦ୍ର ଏବଂ ରାଜ୍ୟ ସରକାରଙ୍କ ସଶସ୍ତ୍ର ବାହିନୀଙ୍କୁ ଆକ୍ରମଣ ନକରି ଧୈର୍ଯ୍ୟ ଏବଂ ସଂଯମତା ରଖି ଶାନ୍ତି ଆଲୋଚନା ପାଇଁ ପ୍ରସ୍ତାବ ଦିଆଯାଇଥିବା ବେଳେ ଏହି ଆଲୋଚନା ପାଇଁ କେନ୍ଦ୍ର ଏବଂ ରାଜ୍ୟ ସରକାରଙ୍କ ସହଯୋଗ କରୁ ନଥିବା ମାଓ ସଙ୍ଗଠନ ପକ୍ଷରୁ ଅଭିଯୋଗ କରାଯାଇଛି।
ତେବେ ଏସବୁ ବିଷୟକୁ ନେଇ ମାଓ ସଙ୍ଗଠନ ପକ୍ଷରୁ ଏକ ପ୍ରେସ ବାର୍ତ୍ତା ଜାରି କରାଯାଇଛି। ତେବେ ଗୋଟିଏ ପଟେ ମାଓ ସଙ୍ଗଠନ ଦୁର୍ବଳ ହେଉଥିବା ବେଳେ ଅନ୍ୟପଟେ ବର୍ତ୍ତମାନ ମାଓ ସଙ୍ଗଠନରେ ମାଓବାଦୀ ଭାବେ କାର୍ଯ୍ୟ କରୁଥିବା ବ୍ୟକ୍ତି ମାନଙ୍କୁ ସେମାନଙ୍କ ଘର ଲୋକେ ମୁଖ୍ୟ ସ୍ରୋତରେ ଫେରିବାକୁ ଅପିଲ କରିଥିବା ଦେଖିବାକୁ ମିଳିଛି। ମାଓ ସଙ୍ଗଠନ ଛାଡି ଘରକୁ ଆସ, ମୁଖ୍ୟ ସ୍ରୋତରେ ସାମିଲ ହୋଇ ପାରିବ ସହ ହସ ଖୁସିରେ ରହିବାକୁ ମାଓବାଦୀଙ୍କ ଘର ଲୋକେ ସେମାନଙ୍କୁ ଚିଠି ଲେଖୁଥିବା ଓ ଅପିଲ କରୁଥିବା ଦେଖିବାକୁ ମିଳିଛି । ଛତିଶଗଡର ବୀଜାପୁର ଜିଲ୍ଲାର ଜଣେ ଯୁବତୀ ନିଜ ଜେଜେ ବାପାଙ୍କୁ ଚିଠି ଲେଖି ଘରକୁ ଫେରିବାକୁ ଅନୁରୋଧ କରିଛନ୍ତି । ଝିଅଟିର ଜେଜେ ବାପା ଜଣେ ମାଓବାଦୀ ହୋଇଥିବା ବେଳେ ତାଙ୍କୁ ମାଓ ସଙ୍ଗଠନ ଛାଡି ମୁଖ୍ୟ ସ୍ରୋତରେ ସାମିଲ ହେବାକୁ ଝିଅଟି ଅପିଲ କରିଛି ।
