ଭୁବନେଶ୍ଵର, ୨୬/୦୩ : କଂଗ୍ରେସ ବିଧାୟକଙ୍କୁ ଗୃହରୁ ନିଲମ୍ଵନ ଘଟଣାକୁ ଦୃଢ ନିନ୍ଦା କଲେ କଂଗ୍ରେସ ନେତା ଜୟଦେବ ଜେନା। ସେ କହିଛନ୍ତି ଯେ, କଂଗ୍ରେସ ବିଧାୟକଙ୍କୁ ଯେପରି ନିଲମ୍ଵିତ କରାଗଲା, ତାହା ନିନ୍ଦନୀୟ। ନିଲମ୍ବିତ ହେବା ପରେ ରାତି ଦୁଇଟାରେ ଆଣି ମାଷ୍ଟରକ୍ୟାଣ୍ଟିନରେ ଫୋପାଡ଼ି ଦିଆଗଲା। ଆକ୍ରମଣ କରି ଲହୁଲୁହାଣ କରାଗଲା। ମୁଖ୍ୟମନ୍ତ୍ରୀ ଉତ୍ତର ଦେଲେନି, ହାଉସ କମିଟି ଗଢ଼ା ହେଲାନି। ନାରୀଙ୍କ ସହିତ ଅତ୍ୟାଚାର ବଢ଼ି ଚାଲିଛି। ନାରୀଙ୍କୁ ନ୍ୟାୟ ଦିଆଯିବ କହି କ୍ଷମତାକୁ ଆସିଛନ୍ତି। ହେଲେ କ୍ଷମତାକୁ ଆସିବା ପରେ ପ୍ରତାରଣା କରିଛନ୍ତି। ଯାହାର ପ୍ରତିବାଦରେ ଆସନ୍ତାକାଲି କଂଗ୍ରେସ ଯେକୌଣସି ସୀମା ଟପିଯିବ। କାଲିର ଆନ୍ଦୋଳନରେ ରାଜ୍ୟର କୋଣ ଅନୁକୋଣରୁ ସ୍ୱତଃସ୍ପୃତ ଭାବରେ ବହୁ ମହିଳା, ଚାଷୀ, ସାଧାରଣ ଜନତା ଯୋଗ ଦେବେ। କଂଗ୍ରେସ ନୀରବ ରହିବ ନାହିଁ। ଆସନ୍ତାକାଲି ତାର ଜବାବ ଦେବ।
ଏହି ଖବରଟିକୁ ପଢନ୍ତୁ-କଂଗ୍ରେସର ସବୁ ବିଧାୟକ ସସପେଣ୍ଡ୍, ତାରା ବାହିନୀପତି ଓ ରମେଶ ଜେନା ୭ ଦିନ ପାଇଁ ଗୃହରୁ ନିଲମ୍ଵିତ
ସୂଚନାନୁଯାୟୀ, କଂଗ୍ରେସର ସମସ୍ତ ୧୪ ବିଧାୟକ ବିଧାନସଭାରୁ ନିଲମ୍ଵିତ ହୋଇଛନ୍ତି। ବିଶୃଙ୍ଖଳିତ ଆଚରଣ ପାଇଁ ବାଚସ୍ପତି ସମସ୍ତଙ୍କୁ ସସପେଣ୍ଡ୍ କରିଛନ୍ତି। ଗତକାଲି କଂଗ୍ରେସର ୧୨ ବିଧାୟକ ଓ ଆଜି ୨ ବିଧାୟକ ନିଲମ୍ଵିତ ହୋଇଛନ୍ତି।
ମଙ୍ଗଳବାର ବିଧାନସଭାରୁ କଂଗ୍ରେସର ୧୨ ବିଧାୟକଙ୍କୁ ସସ୍ପେଣ୍ଡ କରାଯାଇଥିଲା। ଯାହାକୁ ବିରୋଧ କରି କଂଗ୍ରେସ ନେତା ଓ କର୍ମୀ ମାଷ୍ଟରକ୍ୟାଣ୍ଟିନ୍ ଛକରେ ରାତିସାରି ଧାରଣାରେ ବସିଥିଲେ। ବୁଧବାର ବିଧାନସଭା ଆରମ୍ଭ ହେବା ମାତ୍ରେ ନିଲମ୍ବିତ ବିଧାୟକମାନେ ବିଧାନସଭା ପରିସରକୁ ପ୍ରବେଶ କରିବାକୁ ଉଦ୍ୟମ କରିଥିଲେ। ଏହି ସମୟରେ ପୋଲିସ ଏବଂ କଂଗ୍ରେସ ନେତାଙ୍କ ମଧ୍ୟରେ ଧସ୍ତାଧସ୍ତି ହୋଇଥିଲା । ଠିକ୍ ଏହି ସମୟରେ ବିଜେଡ଼ି ବିଧାୟକମାନେ ଗେଟ୍ ଭାଙ୍ଗି ବାହାରକୁ ଆସିଥିଲେ, ଆଉ କଂଗ୍ରେସ ବିଧାୟକମାନଙ୍କୁ ବିଧାନସଭା ପରିସରକୁ ନେଇଥିଲେ । ସେଠାରେ ଆମ୍ବେଦକରଙ୍କ ପ୍ରତିମୂର୍ତ୍ତି ତଳେ ଧାରଣା ଦେଇଥିଲେ । ହେଲେ ପୋଲିସ ପହଞ୍ଚି ସମସ୍ତଙ୍କୁ ଗିରଫ କରି ହେପାଜତକୁ ନେଇଥିଲା।
