ଭୁବନେଶ୍ୱର, ୨୬/୦୩ : ମୋ ସରକାର ଲୋକଙ୍କ ସରକାର। ପ୍ରଶାସନ ଲୋକଙ୍କ ପାଖକୁ ଯିବ । ଭଲମନ୍ଦ ବୁଝିବ । ସଚିବାଳୟରୁ ଆଇଏଏସ୍ ଅଧିକାରୀ ଜିଲ୍ଲା ଗସ୍ତରେ ଯିବେ । ଗାଁ ବୁଲି ସେଠାରେ ରାତ୍ରିଯାପନ କରିବେ । ଜିଲ୍ଲାରେ ସରକାରୀ ଯୋଜନା କାର୍ଯ୍ୟକାରିତାକୁ ପାଖରୁ ଦେଖିବେ । ବିକାଶମୂଳକ କାମର ସମୀକ୍ଷା କରି ପ୍ରକଳ୍ପକୁ ତ୍ୱରାନ୍ୱିତ କରିବେ । ଏମିତି ନିଷ୍ପତ୍ତି ନେଲେ ମୁଖ୍ୟମନ୍ତ୍ରୀ ମୋହନ ଚରଣ ମାଝୀ । ବିଡ଼ମ୍ବନା ଯେ ମୁଖ୍ୟମନ୍ତ୍ରୀଙ୍କ ଏ ନିଷ୍ପତ୍ତିକୁ ମଧ୍ୟ ବହୁ ଆଇଏଏସ୍ ଅଳିଆଗଦାକୁ ଫିଙ୍ଗି ଦେଇଛନ୍ତି । ନିର୍ଦ୍ଦେଶ ଜାରିର ୮ ମାସ ମଧ୍ୟରେ ୮ ଜଣ ବାବୁ ଦିନଟିଏ ମଧ୍ୟ ଜିଲ୍ଲାଗସ୍ତ କରିନାହାନ୍ତି ।
ସରକାର ନିର୍ଦ୍ଦେଶ ଦେଲେ । ଆଇଏଏସ୍ ବାବୁଙ୍କ ଭିତରେ ଜିଲ୍ଲା ବାଣ୍ଟିଲେ। ପ୍ରତି ମାସରେ ଦୁଇ ତିନି ଦିନ ନଶ୍ଚିତ ଜିଲ୍ଲା ଗସ୍ତରେ ଯାଇ ଗାଁକୁ ଯିବେ । ବିକାଶମୂଳକ କାମ ସହ ସରକାରୀ ଯୋଜନାର ତଦାରଖ କରିବେ । ମାତ୍ର ଅଧିକାଂଶ ଜିଲ୍ଲାକୁ ବାବୁମାନେ ଆଦୌ ଯାଇନାହାନ୍ତି । କିଛି ଜିଲ୍ଲାକୁ ଗତ ୮ ମାସ ମଧ୍ୟରେ କିଏ ଥରେ ଯାଇଛନ୍ତି । କିଏ ଦିନକ ପାଇଁ ତ ଆଉ କିଏ ଓଳିଏରେ କାମ ସାରି ଦେଇଛନ୍ତି । ଯିଏ ବି ଗସ୍ତ କରିଛନ୍ତି କୁନ୍ଥକୁନ୍ଥ ହୋଇ । ଆଗ୍ରହ ନାହିଁ କି ଆନ୍ତରିକତା । ମୁଖ୍ୟମନ୍ତ୍ରୀ ବିଧାନସଭାରେ ଦେଇଥିବା ସୂଚନା ଅନୁଯାୟୀ, ଆଇଏଏସ୍ ଅଫିସର ସତ୍ୟବ୍ରତ ସାହୁ, ସୁରେନ୍ଦ୍ର କୁମାର, ବିଶାଳ ଦେବ, ସଞ୍ଜୟ ସିଂ, ରାଜେଶ ପ୍ରଭାକର ପାଟିଲ, ବିଜୟକେତନ ଉପାଧ୍ୟାୟ, ଡି.ପ୍ରଶାନ୍ତ ରେଡ୍ଡୀ ଓ ରଶ୍ମିତା ପଣ୍ଡା କୌଣସି ଜିଲ୍ଲା ଗସ୍ତ କରିନାହାନ୍ତି । ବିକଶିତ ଓଡ଼ିଶା ଗଠନ କରିବାକୁ ନୂଆ ସରକାର ନକ୍ସା ପ୍ରସ୍ତୁତ କରୁଥିଲା ବେଳେ ଆମ ବାବୁମାନେ ଗାଁକୁ ଯିବାକୁ ପୂରା ଅମଙ୍ଗ ।
ନୂଆ ସରକାର ଆସିବା ପରେ ବ୍ୟବସ୍ଥାକୁ ବଦଳାଇବାକୁ ସେପ୍ଟେମ୍ବର ମାସରେ ସରକାରୀ ନିର୍ଦ୍ଦେଶ ବାହାରିଲା । ୩୦ ଆଇଏଏସ୍ ବାବୁଙ୍କୁ ଜିଲ୍ଲା ବଣ୍ଟାଗଲା । ଜିଲ୍ଲା ବୁଲିବେ ସଚିବ । ପ୍ରତି ମାସରେ ଦୁଇରୁ ତିନି ଦିନ ନିଶ୍ଚିତ ଜିଲ୍ଲାକୁ ଯିବେ । ପଞ୍ଚାୟତକୁ ଯିବେ । ଯେଉଁଠିକୁ ଚାହିଁବେ ଅଚାନକ ପରିଦର୍ଶନ କର ସତ ମିଛ ଜାଣିପାରିବେ । ଅପହଞ୍ଚ ଓ ଆଦିବାସୀ ଅଞ୍ଚଳକୁ ଯାଇ ବିକାଶ କାମ କେଉଁଠି ପହଞ୍ଚିଛି, ତାକୁ ଆଖିରେ ଦେଖିବେ । ସରକାରୀ ଯୋଜନାରେ ଲୋକେ ମୌଳିକ ସୁବିଧା ପାଉଛନ୍ତି ନା’ ବଞ୍ଚିତ ଅଛନ୍ତି, ପଚାରି ବୁଝିବେ । ଅନାଥାଶ୍ରମ କିମ୍ବା ଆହାର କେନ୍ଦ୍ରରେ ବାବୁ ମଧ୍ୟାହ୍ନଭୋଜନ ଖାଇବେ । ଯାଞ୍ଚ କରିବେ ଖାଦ୍ୟର ଗୁଣବତ୍ତା । ପରିଷ୍କାର ପରିଚ୍ଛନ୍ନତା ଓ ସୁରକ୍ଷା ଦିଗକୁ ପରଖିବେ । କାର୍ଯ୍ୟକାରୀ ହେଉଥିବା ଯୋଜନାର ଟିକିନିଖି ସମୀକ୍ଷା ହେବ । ଅଭିଯୋଗ ଶୁଣାଣିରେ କେତେ ସମାଧାନ ହୋଇଛି ତାହାକୁ ମଧ୍ୟ ଯାଞ୍ଚ କରିବେ ସଚିବ । ଏ ନିର୍ଦ୍ଦେଶ କିନ୍ତୁ କାଟୁ କରୁନି । ତୃଣୂମଳସ୍ତରରେ କାର୍ଯ୍ୟକାରୀ ପ୍ରକଳ୍ପର ଗୁଣାତ୍ମକ ମାନ ସହ ଜନକଲ୍ୟାଣ ଯୋଜନାର ସୁଫଳ ଯୋଗ୍ୟ ହିତାଧିକାରୀ ପାଉଛନ୍ତି ନା ନାହିଁ ତାହାକୁ ନେଇ ସରକାର ଅନ୍ଧାରରେ । ବିକାଶ ପ୍ରକ୍ରିୟାକୁ ତ୍ୱରାନ୍ୱିତ କରିବା ଏବଂ ସାଧାରଣ ଲୋକଙ୍କ ସହ ଶାସନକୁ ଯୋଡ଼ିବାକୁ ଅମଲାମାନେ ଲୋକଙ୍କ ପାଖକୁ ଯିବାର ଢେର ଆବଶ୍ୟକତା ରହିଛି ।
ନିଃସନ୍ଦେହ ଯେ ଲୋକସେବା ଭବନର ବାବୁମାନେ ଜିଲ୍ଲା ଗସ୍ତରେ ଗଲେ ତାର ସୁଦୂରପ୍ରସାରୀ ପ୍ରଭାବ ଜିଲ୍ଲା ଉପରେ ପଡ଼ନ୍ତା । ଦୀର୍ଘମିଆଦି ଭାବେ ଜିଲ୍ଲାଗୁଡ଼ିକ ଏହାର ଲାଭ ଉଠାଇ ପାରନ୍ତେ । ମାତ୍ର କାଁ ଭାଁ ବାବୁ ଜିଲ୍ଲା ଗସ୍ତ କରିଛନ୍ତି । କିଏ କେବଳ ସମୀକ୍ଷା ବୈଠକ କରିଛନ୍ତି । ଆଉ କିଏ ଜିଲ୍ଲା ମୁଖ୍ୟାଳୟ ନିକଟରେ ଥିବା ଗାଁଟିଏ ବୁଲି ରାଜଧାନୀ ବାହୁଡ଼ିଛନ୍ତି । ଯୋଜନା ଓ ସଂଯୋଜନା ବିଭାଗର ମାର୍ଗଦର୍ଶିକା କହୁଛି, ୧୬ ଜିଲ୍ଲାରେ ଥିବା ୨୯ଟି ଆକାଂକ୍ଷୀ ବ୍ଲକ୍ ଆଇଏଏସ୍ ଅଧିକାରୀ ବୁଲିବେ । ୮ ଡିଏମ୍ଏଫ୍ ଜିଲ୍ଲାରେ ଜିଲ୍ଲା ଖଣିଜ ପାଣ୍ଠି ଓ ଓମ୍ବାଡ୍ସି ପାଣ୍ଠିର କିଭଳି ବିନିଯୋଗ ହୋଇଛି, ତାର ତଦାରଖ କରିବେ । ଜିଲ୍ଲାରେ ଥିବା ବନ୍ଦର, ବିମାନବନ୍ଦର, ଶିଳ୍ପପାର୍କ, ମେଡିକାଲ କଲେଜ ଓ ଜଳସେଚନ ପ୍ରକଳ୍ପର ସମୀକ୍ଷା କରି ମୁଖ୍ୟ ସଚିବଙ୍କୁ ରିପୋର୍ଟ ଦେବେ । ବାବୁମାନେ ନୂଆ ସରକାରଙ୍କ ଏ ନିର୍ଦ୍ଦେଶକୁ ଅଳିଆଗଦାକୁ ଫିଙ୍ଗି ଦେଇଛନ୍ତି । ବାବୁମାନଙ୍କ ଉଦାସୀନତା ଆଦିବାସୀବହୁଳ ଓ ଦୁର୍ଗମ ଅଞ୍ଚଳର ବିକାଶ ରାସ୍ତାରେ ପ୍ରତିବନ୍ଧକ ହୋଇ ଛିଡ଼ା ହୋଇଛି । ମୁଖ୍ୟମନ୍ତ୍ରୀଙ୍କ କାର୍ଯ୍ୟାଳୟ ମଧ୍ୟ ହାତବାନ୍ଧି ବସିଛି । ବିକଶିତ ଓଡ଼ିଶା ଗଠନ ପାଇଁ ଏ ଦିଗରେ ତ୍ୱରିତ ପଦକ୍ଷେପ ନେବା ଜରୁରି।
ଏହି ଖବରଟିକୁ ପଢନ୍ତୁ-ଭୀମଟାଙ୍ଗିରେ ବ୍ୟାପୁଛି ଜଣ୍ଡିସ୍, ଦିନକରେ ୧୦ ଆକ୍ରାନ୍ତ ଚିହ୍ନଟ
