ଭୁବନେଶ୍ଵର, ୦୮/୦୩ : ଯୁକ୍ତ ଦୁଇ ପରୀକ୍ଷା ଦେବାକୁ ଯାଉଥିବା ବେଳେ ମର୍ମନ୍ତୁଦ ଦୁର୍ଘଟଣା। ପୁଅ ଆଖି ଆଗରେ ଚାଲିଗଲା ବାପାଙ୍କ ଜୀବନ। ବଲାଙ୍ଗୀର ଜିଲ୍ଲା ବଙ୍ଗୋମୁଣ୍ଡା ଗାଁ ନିକଟ ଏକ ପୋଲରେ ଏହି ଦୁର୍ଘଟଣା ଘଟିଛି। ପୁଅକୁ ଗୁରୁତର ଅବସ୍ଥାରେ ଉଦ୍ଧାର କରାଯାଇ କଣ୍ଟାବାଞ୍ଜି ଡାକ୍ତରଖାନାରେ ଭର୍ତ୍ତି କରାଯାଇଛି।
ସୂଚନାନୁଯାୟୀ, ବଲାଙ୍ଗୀର ଜିଲ୍ଲା ଲୋଇସିଂହା ବ୍ଲକ ରତାଖଣ୍ଡି ପଞ୍ଚାୟତ ତାଲଜୁରୀ ଗ୍ରାମର ପ୍ରହ୍ଲାଦ ସା ନିଜ ପୁଅ ସମୀର ସାକୁ ବାଇକ୍ରେ ବସାଇ ନୂଆପଡ଼ା ଜିଲ୍ଲା କରଙ୍ଗାମାଲ ଯୁକ୍ତ ଦୁଇ ପରୀକ୍ଷା କେନ୍ଦ୍ରକୁ ନେଉଥିଲେ। ଯିବା ବାଟରେ ବଙ୍ଗୋମୁଣ୍ଡା ଗାଁ ନିକଟ ଏକ ପୋଲରେ ଭାରସାମ୍ୟ ହରାଇ ଦୁର୍ଘଟଣାଗ୍ରସ୍ତ ହୋଇଥିଲେ। ବାପା ପ୍ରହ୍ଲାଦ ସା ପୋଲ ତଳକୁ ଖସି ପଡ଼ିଥିଲେ। ଉଭୟ ବାପା-ପୁଅଙ୍କୁ ଉଦ୍ଧାର କରି କଣ୍ଟାବାଞ୍ଜି ଗୋଷ୍ଠୀ ସ୍ଵାସ୍ଥ୍ୟକେନ୍ଦ୍ରକୁ ଅଣାଯାଇଥିଲା। ସେଠାରେ ପ୍ରହ୍ଲାଦଙ୍କୁ ଡାକ୍ତର ମୃତ ଘୋଷଣା କରିଛନ୍ତି। ପୁଅ ଗୁରୁତର ଅବସ୍ଥାରେ ଚିକିତ୍ସିତ ହେଉଛନ୍ତି। ବଙ୍ଗୋମୁଣ୍ଡା ପୋଲିସ ପହଁଚି ଅଧିକ ତଦନ୍ତ କରୁଛି।
ପୁଅ ପରୀକ୍ଷା ଦେବ ବୋଲି ଉତ୍ସାହର ସହ ପ୍ରହ୍ଲାଦ ସମୀରଙ୍କୁ ନେଇ ପରୀକ୍ଷା କେନ୍ଦ୍ରକୁ ଯାଉଥିଲେ। କିନ୍ତୁ ବିଧିର ବିଧାନ ଥିଲା ଅଲଗା । ବାଇକ ଦୁର୍ଘଟଣାରେ ପ୍ରହ୍ଲାଦଙ୍କ ଜୀବନ ଚାଲିଯାଇଥିବା ବେଳେ ଆହତ ପୁଅ ଯୁକ୍ତ ଦୁଇ ପରୀକ୍ଷାରୁ ବଞ୍ଚିତ ହୋଇଛନ୍ତି।
ଏହି ଖବରଟିକୁ ପଢନ୍ତୁ-ସୁରକ୍ଷା ବ୍ୟବସ୍ଥା ଠାରୁ ସୋସିଆଲ ମିଡିଆ ଆକାଉଣ୍ଟ ଯାଏଁ... ଅନ୍ତର୍ଜାତୀୟ ମହିଳା ଦିବସରେ 'ନାରୀ ଶକ୍ତି'ଙ୍କୁ ଦାୟିତ୍ଵ ଦେଲେ ପ୍ରଧାନମନ୍ତ୍ରୀ
