ଝୁମ୍ପୁରା,୨/୫: କେନ୍ଦୁଝର ବନଖଣ୍ଡରେ ଥମିବାର ନା ନେଉନି ହାତୀ ମୃତ୍ୟୁ। ଚମ୍ପୁଆ ରେଞ୍ଜ,ବାମେବାରୀ ଫରେଷ୍ଟ ସେକ୍ସନର ବସନ୍ତପୁର ରେଣ୍ଠାସାହି ନିକଟରେ ଗୁରୁବାର ମଲା ଶାବକ ଜନ୍ମ ଦେବା ପରେ ଏକ ମାଇ ହାତୀର ମୃତ୍ୟୁ ଘଟିଥିବା ଜଣାପଡିଛି।
ସୂଚନା ମୁତାବକ,ଏକ ମଧ୍ୟ ବୟସ୍କା ମାଇ ହାତୀ ରେଣ୍ଠା ସାହି ନିକଟକୁ ଖାଦ୍ୟ ଅନ୍ୱେଷ ରେ ଆସିଥିବା ସମୟରେ ବୁଧବାର ରାତି ପ୍ରସବ ବେଦନାର ସମ୍ମୁଖୀନ ହୋଇଥିଲା। ମାଇ ହାତୀର ପେଟ ଭିତରେ ମଲା ଶାବକ ରହିଥିବାରୁ ପ୍ରସବ କରି ନପାରି ଏକ ନାଳ କୂଳରେ ପଡ଼ି ରହିଥିଲା। ବୁଧବାର ସକାଳେ ବନ ବିଭାଗ ଏହା ଜାଣିବା ପରେ ରେସ୍କ୍ୟୁ ଟିମ୍ ସହ ଘଟଣାସ୍ଥଳରେ ପହଞ୍ଚିଥିଲେ। ଡାକ୍ତରୀ ଟିମ୍ ସହାୟତାରେ ମୃତ ଶାବକକୁ ମାଇ ହାତୀ ପେଟରୁ ଉଦ୍ଧାର କରାଯାଇଥିଲା। ଏହାପରେ ମାଇ ହାତୀର ଚିକିତ୍ସା ଆରମ୍ଭ କରାଯାଇଥିଲା। ତେବେ ମଧ୍ୟାହ୍ନ ୧୨ ଟା ସମୟରେ ମାଇ ହାତୀର ମୃତ୍ୟୁ ଘଟିଥିବା କେନ୍ଦୁଝର ବନଖଣ୍ଡ ଅଧିକାରୀଙ୍କ ପକ୍ଷରୁ ସୂଚନା ଦିଆ ଯାଇଛି। ଏହି ଘଟଣାର ଅନୁସନ୍ଧାନ ଜାରି ରହିଛି । ପରବର୍ତ୍ତୀ ସମୟରେ ସବିଶେଷ ସୂଚନା ଦିଆଯିବା ବୋଲି ଡିଏଫଓ ଏଚ୍ ଡି ଧନରାଜ୍ କହିଛନ୍ତି।