ଅଳତୀ,୨୫।୧ : ଘଷିପୁରା ଥାନା ବରିପାଳ ପଞ୍ଚାୟତ ଚମ୍ପେଇଡାହି ଗାଁ ନିକଟ ଜଙ୍ଗଲରୁ ଜଣେ ମହିଳାଙ୍କ ଅର୍ଦ୍ଧଦଗ୍ଧ ମୃତଦେହ ଶନିବାର ଉଦ୍ଧାର ହୋଇଛି । କେହି ହତ୍ୟାକରି ପୋଡି ମାରି ଦେଇଥିବା ସନ୍ଦେହ କରାଯାଉଛି। ମହିଳାଙ୍କ ପରିଚୟ ମିଳି ନାହିଁ ।
ଶନିବାର ସକାଳୁ ଜଙ୍ଗଲକୁ ଯାଇଥିବା କିଛି ଲୋକ ମୃତଦେହ ଦେଖି ପ୍ରଥମେ ସରପଞ୍ଚଙ୍କୁ ଜଣାଇଥିଲେ । ସରପଞ୍ଚ ସେଠାର ପହଁଞ୍ଚି ଘଟଣା ସମ୍ପର୍କରେ ବୁଝିବା ପରେ ଘଷିପୁରା ପୋଲିସକୁ ଖବର ଦେଇଥିଲେ। ଆନନ୍ଦପୁର ଏସଡିପିଓ ଙ୍କ ନେତୃତ୍ବରେ ଘଷିପୁରା ପୋଲିସ୍ ସେଠାରେ ପହଁଞ୍ଚି ଥିଲା। ମୃତଦେହରୁ ଦୁର୍ଗନ୍ଧ ବାହାରିବା ଓ ପୋକ ହୋଇଯାଇଥିବାରୁ ପ୍ରାୟ ୨-୩ ଦିନ ତଳେ କେହି ଏଭଳି କାଣ୍ଡ ଘଟାଇଥିବା ଅନୁମାନ କରାଯାଉଛି । ତେବେ ମହିଳା ଜଣଙ୍କ କିଏ ଓ କେଉଁ କାରଣରୁ ତାଙ୍କୁ ହତ୍ୟା କରାଗଲା ତାହା ଜଣା ପଡିନାହିଁ। ଘସିପୁରା ପୋଲିସ୍ ନିକଟସ୍ଥ ସମସ୍ତ ଥାନାକୁ ଫଟୋ ପଠାଇ ମୃତା ମହିଳା ସମ୍ପର୍କରେ ଜାଣିବାକୁ ଚେଷ୍ଟା କରୁଛନ୍ତି।
