ଦାରିଙ୍ଗବାଡ଼ି, ୨୦/୩ : ବିଭିନ୍ନ ଦାବି ନେଇ ଦାରିଙ୍ଗବାଡ଼ି ଲ୍ୟାମ୍ପ୍ ଆଗରେ ଧାରଣା ଦେଲେ ଲ୍ୟାମ୍ପ୍ ପରିଚାଳନା କମିଟିର ସଭ୍ୟ ସଭ୍ୟା। ଲ୍ୟାମ୍ପରେ ୧୭ଟି ବିକ୍ରେତା କେନ୍ଦ୍ର ରହିଥିବା ବେଳେ ମାତ୍ର ୫ ଜଣ ବିକ୍ରେତା ରହିଛନ୍ତି। ଫଳରେ ସାଧାରଣ ଲୋକଙ୍କୁ ସଠିକ୍ ଭାବେ ସେବା ଯୋଗାଇବାରେ ବିଫଳ ହେଉଛନ୍ତି। ଏଣୁ ଖାଲି ରହିଥିବା ୧୨ଟି ବିକ୍ରେତା ପଦବୀ ଯଥାଶୀଘ୍ର ପୂରଣ ନିମନ୍ତେ ଦାବି କରିଛନ୍ତି ସଭ୍ୟସଭ୍ୟା ।
ଅପର ପକ୍ଷରେ ଲ୍ୟାମ୍ପ୍ର ପୂର୍ବତନ ଏମଡି ଅଗାଧୁ ମହାରଣା ୭ ବର୍ଷ ପୂର୍ବେ ଅବସର ଗ୍ରହଣ କରିଥିଲେ। ଅବସର ଗ୍ରହଣ କରିବା ପରେ ଜରୁରୀ ଆବଶ୍ୟକତାକୁ ଗ୍ରହଣ କରି ପରିଚାଳନା କମିଟିର ସୁପାରିଶ କ୍ରମେ ସ୍ୱଳ୍ପ ଦରମା ଦେଇ କିଛି ବର୍ଷ ପାଇଁ କାର୍ଯ୍ୟ କରିବାକୁ ସୁଯୋଗ ଦିଆଯାଇଥିଲା। ହେଲେ ସେ କିଛି ବର୍ଷ ବଦଳରେ ଦୀର୍ଘ ୭ ବର୍ଷ ହେଲା ଲ୍ୟାମ୍ପରେ କାର୍ଯ୍ୟ କରୁଛନ୍ତି। ସେ ଅନେକ ବିଶୃଙ୍ଖଳା କରୁଥିବା ତାଙ୍କ ନାମରେ ଅଭିଯୋଗ ହୋଇଛି। ତେଣୁ ତାଙ୍କୁ ଲ୍ୟାମ୍ପରୁ ବାହାର କରିବା ନିମନ୍ତେ ପରିଚାଳନା କମିଟି ଗତ ଜାନୁଆରୀ ମାସ ୮ ତାରିଖରେ ବୈଠକରେ ନିଷ୍ପତ୍ତି ନେଇଥିଲେ। ହେଲେ ଆଜି ପର୍ଯ୍ୟନ୍ତ ତାହାକୁ କାର୍ଯ୍ୟକାରୀ କରାଯାଉ ନାହିଁ। ଫଳରେ ବାଧ୍ୟ ହୋଇ ପରିଚାଳନା କମିଟିର ସଭ୍ୟମାନେ ଗୁରୁବାର ଲ୍ୟାମ୍ପ୍ ଆଗରେ ଧାରଣା ଦେଇଛନ୍ତି । ପରିଚାଳନ କମିଟି ସଭ୍ୟ ସାଧୁ ନାୟକ, ପଠାଣି ସାହୁ, ଚକ୍ରଧର ମଲିକ, ପ୍ରକାଶ ପ୍ରଧାନ, ଧିରେନ୍ ପ୍ରଧାନ, ଚିତ୍ରସେନ ପ୍ରଧାନ ପ୍ରମୁଖ ଧାରଣାରେ ବସିଛନ୍ତି।
ଏହି ଖବରଟିକୁ ପଢନ୍ତୁ-ମାଈ ହାତୀ ପାଇଁ ଦୁଇ ଦନ୍ତାଙ୍କ ଘମାଘୋଟ ଲଢ଼େଇ, ଦାନ୍ତ ଭୁସି ଭୁସି ସାନକୁ ଘାଇଲା କଲା ବଡ଼
