ଭୁବନେଶ୍ୱର,୨୦/୦୩: ଗୋଟିଏ ମାଈ ହାତୀ ପଛରେ ପଡ଼ିଗଲେ ୨ ଦନ୍ତା । ମାଈ ହାତୀକୁ ନିଜପ୍ରତି ଆକୃଷ୍ଟ କରିବା ପାଇଁ ଉଭୟଙ୍କ ମଧ୍ୟରେ ଚାଲିଲା ଛକାପଞ୍ଝା । ମାଈ ସାନ ହାତୀ ପ୍ରତି ଆକୃଷ୍ଟ ହେବାରୁ ରାଗିଗଲା ବଡ଼ ଦନ୍ତା । ପ୍ରାୟ ଦୁଇ ଘଣ୍ଟା ଧରି ଉଭୟଙ୍କ ମଧ୍ୟରେ ଚାଲିଲା ଘମାଘୋଟ ଲଢ଼େଇ । ଶେଷରେ ସାନକୁ ଘାଇଲା କରି ବଡ଼ଦନ୍ତା ମାଈକୁ ସାଥିରେ ଧରି ପଳାଇଲା । ଚନ୍ଦକା-ଡମପଡ଼ା ହସ୍ତୀ ଅଭୟାରଣ୍ୟରେ ଦୁଇ ଦନ୍ତାଙ୍କ ମଧ୍ୟରେ ଏଭଳି ଘମାଘୋଟ ଲଢ଼େଇ ଆଜି ରାଜଧାନୀ ଉପକଣ୍ଠରେ ବେଶ୍ ଚର୍ଚ୍ଚାର ବିଷୟ ପାଲଟିଛି ।
ବନବିଭାଗ ପକ୍ଷରୁ ମିଳିଥିବା ସୂଚନା ଅନୁଯାୟୀ, ଚନ୍ଦକା-ଡମପଡ଼ା ହସ୍ତୀ ଅଭୟାରଣ୍ୟର ଗୋଲଗାଡ଼ ଜଳାଶୟ ନିକଟକୁ ଏକ ମାଈ ହାତୀ ପାଣି ପିଇବାକୁ ଆସିଥିଲା । ସେହି ଅଞ୍ଚଳରେ ବୁଲୁଥିବା ଗୋଟିଏ ସାନ ଦନ୍ତା ନଜରରେ ପଡ଼ିବାରୁ ସେ ତା’ ପଛରେ ପଡ଼ି ଯାଇଥିଲା । କିଛି ସମୟ ପରେ ଏକ ବିରାଟକାୟ ଦନ୍ତା ସେଠାରେ ପହଞ୍ଚିଥିଲା । ସେ ମଧ୍ୟ ମାଈ ହାତୀ ପଛରେ ପଡ଼ି ଯାଇଥିଲା । ଦୁଇ ଦନ୍ତା ମାଈ ହାତୀକୁ ଆକୃଷ୍ଟ କରିବା ପାଇଁ ଏକ ପ୍ରକାରର ପ୍ରତିଯୋଗିତା ଲାଗିଲା । ତେବେ ମାଈ ହାତୀଟି ସାନ ଦନ୍ତାପ୍ରତି ଆକୃଷ୍ଟ ହେଉଥିବା ଦେଖି ବଡ଼ଦନ୍ତା ରକ୍ତମୁଖା ପାଲଟିଗଲା । ସଙ୍ଗେ ସଙ୍ଗେ ସେ ସାନଦନ୍ତାକୁ ମାରି ଗୋଡ଼ାଇଲା । ଉଭୟଙ୍କ ମଧ୍ୟରେ ଲାଗିଗଲା ଘମାଘୋଟ ଲଢ଼େଇ । ସାନ ଦନ୍ତାର ଗୋଟିଏ ଦାନ୍ତା ଫାଟି ଅଧା ଓହଳି ପଡ଼ିଲା । ତଥାପି ସେ ବଡ଼ଦନ୍ତା ସହ ଲଢ଼ିଥିଲା । ଶେଷରେ ବଡ଼ ସାନକୁ ଦାନ୍ତରେ ଭୁସି ଭୁସି କ୍ଷତାକ୍ତ କରି ପକାଇଲା । ଶେଷରେ ସାନର ଡାହାଣ ପଟ ପେଟରେ ଦାନ୍ତ ଭୂସି ଦେଲା । ଫଳରେ ରକ୍ତାକ୍ତ ହୋଇ ପଡ଼ିଲା ସାନ ଦନ୍ତା । ହାର୍ ମାନି ପଛଘୁଞ୍ଚା ଦେଲା । ତା’ପରେ ବଡ଼ଦନ୍ତା ମାଈ ହାତୀ ସହ ଘଞ୍ଚ ଜଙ୍ଗଲ ମଧ୍ୟକୁ ପଳାଇଲା ।
କ୍ଷତାକ୍ତ ଅବସ୍ଥାରେ ସାନ ଦନ୍ତାକୁ ଆଜି ସକାଳେ ବନବିଭାଗ ଠାବ କରିଥିଲା । ଚନ୍ଦକା ଡିଏଫ୍ଓ ଶରତ ବେହେରା ଏନେଇ ଓୟୁଏଟିର ଅବସରପ୍ରାପ୍ତ ପ୍ରଫେସର ଇନ୍ଦ୍ରମଣି ନାଥ ଓ ନନ୍ଦନକାନନ ପଶୁ ଚିକିତ୍ସକଙ୍କୁ ଖବର ଦେଇଥିଲେ । ଶ୍ରୀ ନାଥ ଏବଂ ନନ୍ଦନକାନନ ଟିମ୍ ପହଞ୍ଚି ଦନ୍ତାକୁ ପ୍ରଥମେ ଟ୍ରାଙ୍କୁଲାଇଜ କରିଥିଲେ । ତା’ପରେ ପେଟରେ ହୋଇଥିବା କଣାର ଅପରେସନ୍ କରା ଯାଇଥିଲା । ହାତୀକୁ ଆଣ୍ଟିବାୟୋଟିକ ଓ ପେନ୍କିଲର ଦିଆ ଯାଇଥିଲା । ଏଥିପାଇଁ ପ୍ରାୟ ୨ ଘଣ୍ଟା ଲାଗିଥିଲା । କିଛି ସମୟ ପରେ ଦନ୍ତାଟି ସେ ସ୍ଥାନ ଛାଡ଼ି ଅନ୍ୟତ୍ର ପଳାଇଛି । ସେପଟେ ବଡ଼ ଦନ୍ତା ଉକ୍ତ ମାଈ ହାତୀ ସହ ଜଙ୍ଗଲରେ ବୁଲାବୁଲି କରୁଥିବା ବନ କର୍ମଚାରୀମାନେ ଦେଖିଛନ୍ତି । ଏକ୍ ଫୁଲ୍ ଦୋ ମାଲି ଭଳି ଗୋଟିଏ ମାଈ ହାତୀ ପାଇଁ ଦୁଇ ଦନ୍ତାଙ୍କ ମଧ୍ୟରେ ଏଭଳି ଘମାଘୋଟ ଲଢ଼େଇକୁ ନେଇ ବନକର୍ମଚାରୀ ଓ ଜଙ୍ଗଲ ଉପକଣ୍ଠରେ ବେଶ୍ ଚର୍ଚ୍ଚାର ବିଷୟ ପାଲଟିଛି । ଡିଏଫ୍ଓ ଶ୍ରୀ ବେହେରାଙ୍କ କହିବା ଅନୁଯାୟୀ, ଜଙ୍ଗଲ ମଧ୍ୟରେ ମାଈ ହାତୀଙ୍କୁ ନେଇ ଏପରି ଦନ୍ତା ଦନ୍ତାଙ୍କ ମଧ୍ୟରେ ଲଢ଼େଇ ହେବା ଅନେକ ନଜିର ରହିଛି।
