ପୁରୀ , ୨୭।୮ ଦିନ ଦ୍ବିପ୍ରହରରେ ଖଣ୍ଡା ବୁଲାଇଲେ ଦୁର୍ବୃତ୍ତ । ଖଜା ଦୋକାନୀକୁ କଲେ ଟାର୍ଗେଟ । ଦୋକାନୀକୁ ନ ପାଇ ରାଗରେ ଖଣ୍ଡା ଚୋଟରେ ଦୁଇ ଝୁଡ଼ି ଖଜାକୁ ହାଣିଲେ । ପୁରୀ ଶରଧାବାଲିରେ ଘଟିଛି ଏଭଳି ଘଟଣା । କୁମ୍ଭାରପଡ଼ା ଥାନା ପୋଲିସ ଖବର ପାଇ ଘଟଣାସ୍ଥଳରେ ପହଞ୍ଚି ତଦନ୍ତ କରିଛି। ଏହି ଘଟଣାରେ ୩ ଜଣଙ୍କୁ ଅଟକ ରଖିବା ସହ ସେମାନଙ୍କ ଠାରୁ ଦୁଇଟି ଖଣ୍ଡା ଜବତ କରିଛି। ପୂର୍ବ ଶତ୍ରୁତାକୁ ନେଇ ଏହି ଘଟଣା ଘଟିଥିବା ତଦନ୍ତରୁ ଜଣାପଡିଛି ।
ପୁରୀ ଶରଧାବାଲି ନିକଟରେ ସୌମ୍ୟ ରଞ୍ଜନ ପାତ୍ର ଖଜା ଦୋକାନ କରିଛନ୍ତି । ସେ ଦୋକାନରେ ନଥିବା ବେଳେ ତିନି ଜଣ ଦୁର୍ବୃତ୍ତ ଆସି ତାଙ୍କ ସାନ ଭାଇଙ୍କୁ ଖୋଜିଥିଲେ । ସେଠାରେ ଥିବା ଦୋକାନ କର୍ମଚାରୀ ଭୟଭୀତ ହୋଇ ସ୍ଥାନ ଛାଡ଼ି ପଳାଇଥିଲେ । ରାଗରେ ଦୋକାନରେ ଥିବା ଖଜା ଝୁଡିକୁ ହାଣି ପକାଇଥିଲେ ୩ ଦୁର୍ବୃତ୍ତ । ଦୋକାନରୁ ୫ ହଜାର ଟଙ୍କା ମଧ୍ୟ ନେଇ ଯାଇଥିଲେ ଦୁର୍ବୃତ୍ତ । ବୁଧବାର ସକାଳେ ଆଖଣ୍ଡଳମଣି ମନ୍ଦିରରେ ଗଣେଶ ପୂଜା ପୁଷ୍ପାଞ୍ଜଳିକୁ ନେଇ ସୌମ୍ୟଙ୍କ ସାନ ଭାଇ ସହ ୩ ଜଣଙ୍କର ବଚସା ହୋଇଥିଲା ।
