ଚେନ୍ନାଇ,୨୩/୦୪: ଚଳିତ ଆଇପିଏଲ୍ରେ ଡିଫେଣ୍ଡିଂ ଚାମ୍ପିଅନ୍ ଚେନ୍ନାଇ ସୁପରକିଙ୍ଗ୍ସ ଓ ଲକ୍ଷ୍ନୌ ସୁପରଜାଏଣ୍ଟ୍ସ ପରସ୍ପରକୁ ଭେଟିବେ। ଚିପକ୍ ଷ୍ଟାଡ଼ିୟମ୍ରେ ଖେଳାଯିବାକୁ ଥିବା ଏହି ମ୍ୟାଚ୍ରେ ସୁପରକିଙ୍ଗ୍ସ ପୂର୍ବ ପରାଜୟର ପ୍ରତିଶୋଧ ନେବାକୁ ଲକ୍ଷ୍ୟ ରଖିଛି । ମାତ୍ର ସୁପରଜାଏଣ୍ଟ୍ସ ଆଉ ଏକ ବିଜୟ ପାଇଁ ପ୍ରସ୍ତୁତ ରହିଛି । ୧୯ ତାରିଖରେ ଉଭୟ ଦଳ ଏକାନ୍ନା ଷ୍ଟାଡ଼ିୟମ୍ରେ ପରସ୍ପରକୁ ଭେଟିଥିଲେ। ସୁପରଜାଏଣ୍ଟ୍ସ ଉକ୍ତ ମ୍ୟାଚ୍କୁ ୮ ୱିକେଟ୍ରେ ଜିତିଥିଲା ।
ସୁପରକିଙ୍ଗ୍ସକୁ ସମର୍ଥନ କରିବା ପାଇଁ ୟେଲୋ ଆର୍ମି ଷ୍ଟାଡ଼ିୟମ୍ ପୂର୍ଣ୍ଣ କରିଦେବ । ମାତ୍ର ସୁପରଜାଏଣ୍ଟ୍ସ କେବଳ ପ୍ରଦର୍ଶନକୁ ପ୍ରାଥମିକତା ଦେବ । ଚଳିତ ସିଜନରେ ସୁପରକିଙ୍ଗ୍ସ ଘରୋଇ ଗ୍ରାଉଣ୍ଡ୍ରେ ୩ଟି ମ୍ୟାଚ୍ ଖେଳିସାରିଛି ଓ ସମସ୍ତ ମ୍ୟାଚ୍ ଜିତିଛି । ମଙ୍ଗଳବାର ମଧ୍ୟ ଘରୋଇ ଦଳ ଆଧିପତ୍ୟ ଜାହିର କରିବ । ମଙ୍ଗଳବାର ଉଭୟ ଦଳର ବ୍ୟାଟରଙ୍କ ମଧ୍ୟରେ ଅସଲ ଲଢେଇ ଦେଖିବାକୁ ମିଳିବ । ଗତ ୨ଟି ମ୍ୟାଚ୍ରେ ଓପନ୍ କରିଥିବା ଅଜିଙ୍କ୍ୟ ରାହାଣେ ପୂର୍ବଭଳି ୩ନଂ ସ୍ଥାନରେ ବ୍ୟାଟିଂ କରିବେ ଓ ଋତୁରାଜ ଗାଏକୱାଡ୍ ଓପନ୍ ସ୍ଥାନକୁ ଫେରିବେ। ଶିଭମ ଦୁବେଙ୍କୁ ଇମ୍ପାକ୍ଟ ପ୍ଲେୟାର ଭାବେ ଖେଳିବାକୁ ସୁଯୋଗ ମିଳିବ ।
ସୁପରକିଙ୍ଗ୍ସ ଦଳରେ ପରିବର୍ତ୍ତନ ସମ୍ଭାବନା ରହିଛି । ୨ଟି ମ୍ୟାଚ୍ ଖେଳିନଥିବା ଦେବଦତ୍ତ ପାଡ଼ିକଲ ଆସନ୍ତା କାଲି ଏକାଦଶକୁ ଫେରିବା ଏକ ପ୍ରକାର ନିଶ୍ଚିତ । ଦର୍ଶକ ପେସ୍ ବିସ୍ମୟ ମୟଙ୍କ ଯାଦବଙ୍କୁ ଦେଖିବାକୁ ଅପେକ୍ଷା କରି ରହିଛନ୍ତି । ମାତ୍ର ସେ ମଙ୍ଗଳବାର ଖେଳିବେ ନାହିଁ। ସେ ଇତି ମଧ୍ୟରେ ଫିଟ୍ ହୋଇ ଅଭ୍ୟାସ ଚଳାଇଛନ୍ତି । ତଥାପି ତାଙ୍କୁ ଆଉ ଗୋଟିଏ କିମ୍ବା ୨ଟି ମ୍ୟାଚ୍ ଅପେକ୍ଷା କରିବାକୁ ପଡ଼ିବ । ଟିମ ମ୍ୟାନେଜମେଣ୍ଟ ତାଙ୍କ କାର୍ଯ୍ୟଭାର ତଦାରଖ କରୁଛି ।
ଚିପକ୍ ପିଚ୍ ସାମାନ୍ୟ ମନ୍ଥର ରହିବ ଓ ସ୍ପିନରମାନଙ୍କୁ ସହାୟତା କରିବ । ଫଳରେ ଉଭୟ ଦଳର ସ୍ପିନରଙ୍କ ମଧ୍ୟରେ ଏକ ପ୍ରତିଦ୍ୱନ୍ଦ୍ୱିତା ଦେଖିବାକୁ ମିଳିବ। ରାତିରେ କାକର ପଡ଼ିବ । ତେଣୁ ଟସ ବିଜୟୀ ଦଳ ଫିଲ୍ଡିଂ ନିଷ୍ପତ୍ତି ନେବା ନିଶ୍ଚିତ ।
ସମ୍ଭାବ୍ୟ ଏକାଦଶ
ସୁପରକିଙ୍ଗ୍ସ: ରଚିନ ରବିନ୍ଦ୍ର, ଋତୁରାଜ ଗାଏକୱାଡ୍(ଅଧିନାୟକ), ଅଜିଙ୍କ୍ୟ ରାହାଣେ, ଶିବମ ଦୁବେ, ମୋଇନ ଅଲି, ରବିନ୍ଦ୍ର ଜାଡେଜା, ସମୀର ରିଜଭୀ, ମହେନ୍ଦ୍ର ସିଂହ ଧୋନି, ଦୀପକ ଚହର, ତୁଷାର ଦେଶପାଣ୍ଡେ, ମୁସ୍ତାଫିଜୁର ରେହମାନ । (ଇମ୍ପାକ୍ଟ ପ୍ଲେୟାର: ମଥିଶା ପତିରଣା) ।
ସୁପରଜାଏଣ୍ଟ୍ସ: କ୍ୱିଣ୍ଟନ ଡି କକ୍, କେ ଏଲ ରାହୁଲ(ଅଧିନାୟକ), ଦେବଦତ୍ତ ପାଡ଼ିକଲ, ନିକୋଲାସ ପୂରନ, ମାର୍କସ ଷ୍ଟଇନିସ୍, ଦୀପକ ହୁଡ଼ା, ଆୟୁଷ ବାଦୋନି, କୃନାଲ୍ ପାଣ୍ଡ୍ୟା, ମାଟ୍ ହେନରୀ, ରବି ବିଷ୍ଣୋଇ, ମହସିନ ଖାନ,(ଇମ୍ପାକ୍ଟ ପ୍ଳେୟାର: ୟଶ ଠାକୁର)