ବିଞ୍ଝାରପୁର,୬।୧୦(ଆପ୍ର): ବିଞ୍ଝାରପୁରରେ ଜଣେ ମହିଳାଙ୍କୁ ଯୌତୁକ ପାଇଁ ଶ୍ବଶୁର ଘର ଲୋକେ ହତ୍ୟା କରିଥିବା ତାଙ୍କ ବାପ ଘର ଲୋକେ ଅଭିଯୋଗ କରିଥିଲେ। ପୋଲିସ ଘଟଣାର ସତ ବାହାର କରିବା ପାଇଁ ମାଟିତଳୁ କବର ଖୋଳି ମୃତଦେହ ବାହାର କରିଛି । ମୃତଦେହକୁ ବ୍ୟବଛେଦ ପାଇଁ ଯାଜପୁର ଜିଲ୍ଲା ମୁଖ୍ୟ ଡାକ୍ତରଖାନାକୁ ପଠାଇଛି।
ପଶ୍ଚିମବଙ୍ଗ ରାଜ୍ୟ ମେଦିନାପୁର ଜିଲ୍ଲା ଦେବରା ଥାନା ଅଞ୍ଚଳର ଠିକାଦାର ରାଜାଉଲ୍ଲ ରେହମାନଙ୍କ ଝିଅ ରୋଜିନା ଖାତୁନଙ୍କୁ ବିଞ୍ଝାରପୁର ଥାନା କାଲାମହଲ୍ଲା ଗ୍ରାମର ସେକ ଇସହାକଙ୍କ ପୁଅ ସେକ ମୁସ୍ତକିମ ୨୦୧୭ ମସିହାରେ ବିବାହ କରିଥିଲେ। ବିବାହ ସମୟରେ ବର ପକ୍ଷଙ୍କ ଦାବି ଅନୁଯାୟୀ କନ୍ୟା ପକ୍ଷ ନଗଦ ୫ ଲକ୍ଷ ଟଙ୍କା, ୧୨୦ ଗ୍ରାମ ସୁନା ଅଳଙ୍କାର ସମେତ ଘରୋଇ ସାମଗ୍ରୀ ଦେଇଥିଲେ। ବିଭିନ୍ନ ସମୟରେ ଶଶୁରଘର ଲୋକ ଅଧିକ ଯୌତୁକ ଦାବି କରି ରୋଜିନାଙ୍କୁ ମାନସିକ ନିର୍ଯ୍ୟାତନା ଦେଇଆସୁଥିଲେ। ଗତମାସ ୨୧ ତାରିଖ ରାତି ୧୧ଟାରେ ରୋଜିନାଙ୍କୁ ହତ୍ୟା କରାଯାଇଥିବା ପରିବାର ପକ୍ଷରୁ ଗତକାଲି ବିଞ୍ଝାରପୁର ଥାନାରେ ଅଭିଯୋଗ ହୋଇଛି । ଅଭିଯୋଗକୁ ଭିତ୍ତିକରି ପୁଲିସ ଏକ ମାମଲା ରୁଜୁ କରି ତଦନ୍ତ ଆରମ୍ଭ କରିଛି। ଆଜି ମାଜିଷ୍ଟ୍ରେଟ ଓ ସାଇଣ୍ଟିଫିକ ଟିମ ଉପସ୍ଥିତିରେ ରିଜିନାଙ୍କୁ କବର ଦିଆଯାଇଥିବା ମାଟିତଳୁ ଖୋଳା ଯାଇ ଶବ ଜବତ କରିବାକୁ ପ୍ରକ୍ରିୟା ଆରମ୍ଭ କରି ବ୍ୟବଛେଦ ପାଇଁ ଯାଜପୁର ମୁଖ୍ୟ ଚିକିତ୍ସାଳୟକୁ ପଠା ଯାଇଛି ।