ଭୁବନେଶ୍ୱର ୧୦/୦୪: ଅସହ୍ୟ ତାତିରୁ ମିଳିବ ଆଶ୍ୱସ୍ତି। ଆସନ୍ତା ୧୨ରୁ ୧୪ ଯାଏ କାଳବୈଶାଖୀ ସମ୍ଭାବନା। କେତେକ ସ୍ଥାନରେ କୁଆ ପଥର ବର୍ଷା ମଧ୍ୟ ହୋଇପାରେ। ଏହି ସମୟରେ ପବନର ବେଗ ଘଣ୍ଟା ପ୍ରତି ୭୦ରୁ ୭୫ କିଲୋମିଟର ମଧ୍ୟ ହୋଇପାରେ । ଉତ୍ତର ଭାରତରେ ଏକ ଟ୍ରପ ଲାଇନ ଆସିବାର ଅଛି ଏହା ପ୍ରଭାବରେ ବର୍ଷା ସମ୍ଭାବନା ରହୁଛି । ୧୪ ପରେ ବଢ଼ିବ ତାପମାତ୍ରା। କଲବଲ କରିବ ଖରା।
ସେପଟେ ବଙ୍ଗୋପସାଗରରେ ସୃଷ୍ଟି ହୋଇଥିବା ଲଘୁଚାପ କ୍ଷେତ୍ର ବର୍ତ୍ତମାନ ଉତ୍ତର ପୂର୍ବ ବଙ୍ଗୋପସାଗରରେ ରହିଛି । ଏହା ପ୍ରଭାବରେ ଉତ୍ତର ପଶ୍ଚିମ ଦିଗରୁ ପବନ ବହୁଛି । ଏଥିସହ ସ୍ଥଳ ଭାଗକୁ ଦକ୍ଷିଣ ଦିଗରୁ ଓଡ଼ିଶାକୁ ପବନ ବହୁଛି । ଫଳରେ କିଛି ସମୟ ମେଘୁଆ ରହୁଛି ପୁଣି ଖରା ହେଉଛି । ତେବେ ଆଜି ଏବଂ ଆସନ୍ତାକାଲି ଅଭ୍ୟନ୍ତରୀଣ ଓଡ଼ିଶାରେ ହାଲକା ବର୍ଷା ସମ୍ଭାବନା ରହୁଛି । ଏନେଇ ଆଞ୍ଚଳିକ ପାଣିପାଗ କେନ୍ଦ୍ର ପକ୍ଷରୁ ସୂଚନା ଜାରି କରାଯାଇଛି।
