ଭୁବନେଶ୍ୱର,୨୫/୦୧: ଶନିବାରଠାରୁ ଦିନ ଓ ରାତି ତାପମାତ୍ରା କମିବ । ରାତିରେ ପୁଣି ଶୀତ ଅନୁଭୂତ ହେବ । ପଶ୍ଚିମା ବାୟୁ ପ୍ରଭାବରେ ୩୧ ଓ ୧ ତାରିଖ ବେଳକୁ ଘଡ଼ଘଡ଼ି ସହିତ ବର୍ଷା ହୋଇପାରେ । ସୋଆ ଜଳବାୟୁ ଓ ପାଣିପାଗ କେନ୍ଦ୍ର ନିର୍ଦ୍ଦେଶକ ଡ. ଶରତ ସାହୁ ଏଭଳି ପୂର୍ବାନୁମାନ କରିଛନ୍ତି ।
ଡ. ସାହୁ କହିଛନ୍ତି, ଗୁରୁଚାପ ପାଇଁ ଗରମ ପବନ ଆସୁଥିଲା । ତେଲଙ୍ଗାନା, ମହାରାଷ୍ଟ୍ରରେ ଗରମ ଅଧିକ ରହୁଥିଲା । ସେ ପାଖରୁ ଓଡ଼ିଶାକୁ ପବନ ଆସୁଥିଲା । ଏଥିପାଇଁ ଦିନ ତାପମାତ୍ରା ଅଧିକ ରହୁଥିଲା । ଆଜିଠାରୁ ଗୁରୁଚାପ ଦୁର୍ବଳ ହୋଇଯାଇଛି । ଉତ୍ତର ପଶ୍ଚିମ ଦିଗରୁ ପବନ ଆସିବ । ଏଥିପାଇଁ ଶନିବାରଠାରୁ ଦିନ ଓ ରାତି ତାପମାତ୍ରା କମିବ ବୋଲି ସେ କହିଛନ୍ତି । ୨୮ ଯାଏ ତାତି କମ୍ ରହିବ । କୁହୁଡ଼ିର ପ୍ରଭାବ କମିବ । ୨୯ ଓ ୩୦ ତାରିଖରୁ ପୁଣି ଥରେ ଘନ କୁହୁଡ଼ି ଆରମ୍ଭ ହେବ ।
ଆସନ୍ତା ୪ ଦିନ ଓଡ଼ିଶା ସମେତ ପୂର୍ବ ଭାରତରେ ରାତି ତାପମାତ୍ରା ୩ରୁ ୫ ଡିଗ୍ରୀ କମିବ ଓ ଶୀତ ବଢ଼ିବ ବୋଲି ଭାରତୀୟ ପାଣିପାଗ ବିଭାଗ(ଆଇଏମ୍ଡି) ପୂର୍ବାନୁମାନ କରିଛି । ସେପଟେ ତାତି ପୁଣି ରେକର୍ଡ କରିଛି । କୋରାପୁଟରେ ସପ୍ତାହରେ ଦୁଇ ଥର ପାଇଁ ସର୍ବକାଳୀନ ରେକର୍ଡ ତାତି ଅନୁଭୂତ ହୋଇଛି । ପାରଳାଖେମୁଣ୍ଡିରେ ବି ତାତି ୩୪ ଡିଗ୍ରୀ ସେଲସିୟସ୍ ପାର୍ ହୋଇଛି । ଜାନୁଆରୀ ମାସ ନ ସରୁଣୁ ରାଜ୍ୟରେ ତାତି ଏବେ ଡରାଇବା ଆରମ୍ଭ କଲାଣି । ରାଜ୍ୟର ଅଧିକାଂଶ ସ୍ଥାନରେ ଦିନ ତାପମାତ୍ରା ୫.୧ ଡିଗ୍ରୀରୁ ଅଧିକ ଥିଲା ବୋଲି ଆଇଏମଡି ପକ୍ଷରୁ ସୂଚନା ଦିଆଯାଇଛି ।
୨୦୦୯ ଜାନୁଆରୀ ୩୧ ତାରିଖରେ କୋରାପୁଟର ଦିନବେଳାର ତାତି ୩୩ ଡିଗ୍ରୀ ଥିଲା । ସେବେ ଏହି ତାତି ସର୍ବକାଳୀନ ରେକର୍ଡ କରିଥିଲା । ଗତ ୨୨ ତାରିଖରେ ଏଠାରେ ତାତି ୩୩.୨ ଡିଗ୍ରୀ ଥିଲା । ଆଜି ଏଠାରେ ସମାନ ତାତି ଅନୁଭୂତ ହୋଇଛି । ପାରଳାଖେମୁଣ୍ଡିରେ ତାତି ସବୁଠୁ ଅଧିକ ୩୪.୨ ଡିଗ୍ରୀ ରହିଛି । ବଲାଙ୍ଗିରରେ ତାତି ୩୩.୨ଡିଗ୍ରୀ, ବରଗଡ଼ ଓ ଭବାନୀପାଟଣାରେ ୩୩, ସମ୍ବଲପୁରରେ ୩୨.୯, ଢେଙ୍କାନାଳରେ ୩୨.୨, ମାଲକାନଗିରିରେ ୩୨.୧ ଓ ନୂଆପଡ଼ାରେ ତାତି ୩୨ ଡିଗ୍ରୀ ରହିଛି ।
ପାରଦ ଉପରମୁହାଁ ହେବାରୁ ରାଜ୍ୟରୁ ଶୀତ ଏକପ୍ରକାର ଗାଏବ ହୋଇଯାଇଛି । ଅଧିକାଂଶ ସ୍ଥାନରେ ପାରଦ ୧୬ରୁ ୧୭ ଡିଗ୍ରୀ ଉପରେ ରହିଛି । ଚାନ୍ଦବାଲିରେ ୨୦.୮, ପାରାଦୀପରେ ୨୦.୨, ପୁରୀରେ ୨୦.୧, ଭୁବନେଶ୍ୱରରେ ୧୯.୫, କଟକରେ ୧୮.୮, ବାରିପଦାରେ ୧୮.୫, ଢେଙ୍କାନାଳରେ ୧୭.୬, ଟିଟିଲାଗଡ଼ରେ ୧୭.୨, ତାଳଚେର ଓ ଭଦ୍ରକରେ ୧୭, ସମ୍ବଲପୁରରେ ୧୬.୩ ଓ ମାଲକାନଗିରି ଓ ଛତ୍ରପୁରରେ ରାତି ତାପମାତ୍ରା ୧୬ ଡିଗ୍ରୀ ଥିଲା ।
ଆସନ୍ତା ଦୁଇ ଦିନ ଯାଏ ଏଭଳି ପାଣିପାଗ ସ୍ଥିତି ଜାରି ରହିବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି । ଶନିବାର ଉପକୂଳ ଓଡ଼ିଶା ଓ ଦକ୍ଷିଣ ଓଡ଼ିଶାରେ ଘନ କୁହୁଡ଼ି ପଡ଼ିବ ବୋଲି ଆକଳନ କରାଯାଇଛି । ଭଦ୍ରକ, କେନ୍ଦ୍ରାପଡ଼ା, ଜଗତସିଂହପୁର, ପୁରୀ, ଖୋର୍ଦ୍ଧା, କଟକ, କେନ୍ଦ୍ରାପଡ଼ା, ଯାଜପୁର, ଢେଙ୍କାନାଳ, ଗଞ୍ଜାମ, ଗଜପତି, ନୟାଗଡ଼, କଳାହାଣ୍ଡି, କନ୍ଧମାଳ, କେନ୍ଦୁଝର, ଦେବଗଡ଼, ସୁନ୍ଦରଗଡ଼, ଅନୁଗୁଳ ଓ କୋରାପୁଟରେ ଘନ କୁହୁଡ଼ି ଦେଖାଦେବ ବୋଲି ପାଣିପାଗ ବିଭାଗ ପୂର୍ବାନୁମାନ କରିଛି ।
