ମାଲକାନଗିରି /କାଲିମେଳା, ୨୭|୨(ଆପ୍ର ): ମାଲକାନଗିରି ଜିଲ୍ଲା କାଲିମେଳା ବ୍ଲକ ଅନ୍ତର୍ଗତ ଏମ୍ଭି-୭୨ ଗ୍ରାମର ଦୁଇ ଛାତ୍ରୀଙ୍କ ଝୁଲନ୍ତା ଶବ ଜଙ୍ଗଲରୁ ଉଦ୍ଧାର କରାଯାଇଥିଲା। ଏହି ଘଟଣାକୁ ଇତି ମଧ୍ୟରେ ୨ ସପ୍ତାହରୁ ଅଧିକ ସମୟ ବିତିଲାଣି । କିନ୍ତୁ ଏହି ଘଟଣାକୁ ଆତ୍ମହତ୍ୟାର ରୁପ ଦେଇ ପୁଲିସ ଚୁପ୍ ବସିଛି । ପରିବାର ଲୋକଙ୍କ ସମେତ ବିଭିନ୍ନ ସଙ୍ଗଠନ ପୁଲିସ୍ର ଭୂମିକା ଓ ଶବ ବ୍ୟବଚ୍ଛେଦ ରିପୋର୍ଟକୁ ନେଇ ସନ୍ଦେହ ପ୍ରକାଶ କରୁଛନ୍ତି ।
ଏନେଇ ଗତ ଗୁରୁବାର ଦିନ ଏମଭି ୭୨ ଏବଂ ଏମଭି -୧୨୬ ପଲ୍ଲିମଙ୍ଗଲ କମିଟି ତରଫରୁ ଏମଭି ୧୨୬ ଗ୍ରାମରେ ଏକ ଆଲୋଚନା ସଭା ଡକାଯାଇଥିଲା । ଏହି ସଭାରେ ବିଭିନ୍ନ ସଙ୍ଗଠନର ସଦସ୍ୟ ମାନେ ଯୋଗ ଦେଇ ଏହି ଦୁଇ ଛାତ୍ରୀଙ୍କ ପରିବାରକୁ କିଭଳି ଭାବେ ନ୍ୟାୟ ପ୍ରଦାନ କରାଯାଇପାରିବ ସେ ଦିଗରେ ପଦକ୍ଷେପ ନିଆଯିବା ସହ ଏହାର ଉଚ୍ଚସ୍ତରୀୟ ତଦନ୍ତ କରି ଉଚିତ୍ ନ୍ୟାୟ ପ୍ରଦାନ କରିବାକୁ ସେମାନେ ଦାବି କରିଛନ୍ତି । ଏହା ସହ ବ୍ୟବଚ୍ଛେଦ ରିପୋର୍ଟରେ ହେରଫେର କରାଯାଇ ସତ ଲୁଚାଇବାକୁ ଚେଷ୍ଟା କରାଯାଇଥିବା ସେମାନେ ଅଭିଯୋଗ କରିଛନ୍ତି । ପୁଲିସ୍ ଦେଇଥିବା ରିପୋର୍ଟକୁ ଆମେ ବିଶ୍ଵାସ କରୁନୁ । ଏକାଥରକେ ଦୁଇ ଛାତ୍ରୀ ଆତ୍ମହତ୍ୟା କରିବା ସମ୍ଭବ ନୁହେଁ ,ଏହି ଘଟଣାରେ ମୃତ ଦୁଇ ଛାତ୍ରୀଙ୍କ ପରିବାରକୁ ନ୍ୟାୟ ନ ମିଳିବା ପର୍ଯ୍ୟନ୍ତ ଲଢେଇ ଜାରି ରଖିବୁ ବୋଲି ସେମାନେ କହିଛନ୍ତି ।
