ଭୁବନେଶ୍ବର, ୩୦।୪  ରାଜ୍ୟରେ ଗ୍ରୀଷ୍ମର ପ୍ରକୋପ ବଢିବାରେ ଲାଗିଛି। ପାରଦ  ଦିନକୁ ଦିନ ବଢିବାରେ ଲାଗିଛି। ତାତିର ପ୍ରବାହରେ ଜଳୁଛି ସହର । ଦିନକୁ ଦିନ ସହର ଗୁଡିକରେ ତାପମାତ୍ରା ବୃଦ୍ଧି ପାଉଛି । ଟାଣ ଖରା ସହ ଝାଞ୍ଜି ପବନ ଜନଜୀବନକୁ ଅସ୍ତବ୍ୟସ୍ତ କରି ପକାଉଛି।  ସକଳା ୮ଟା ବେଳକୁ ଟାଣ ଖରାର ପ୍ରକୋପ ଆରମ୍ଭ ହୋଇ ତାପମାତ୍ରା ୩୮ ଡିଗ୍ରୀରେ ପହଞ୍ଚି ଯାଉଛି। ଆଉ ମଧ୍ୟାହ୍ନ ବେଳକୁ ଅଧିକାଂଶ ସହରର ତାପାମାତ୍ରା ୪୨ରୁ ୪୬ ଡିଗ୍ରୀ ମଧ୍ୟରେ ରହୁଛି। ମଙ୍ଗଳବାର ତାଳଚେରରେ ତାପମାତ୍ରା ୪୫ ଡିଗ୍ରୀରେ ପହଞ୍ଚି ଉତ୍ତପ୍ତ ସହରରେ ପରିଣତ ହୋଇଥିଲା। 

ତେବେ ଗତ କିଛି ଦିନ ଧରି ରାଜଧାନୀ ଭୁବନେଶ୍ବରରେ ତାତି ଅସହ୍ୟ ହୋଇ ପଡିଥିବା ବେଳେ ଆଜି କାଳବୈଶାଖୀ ସାମାନ୍ୟ ଆଶ୍ବସ୍ତି ଆଣି ଦେଇଛି। ଭୁବନେଶ୍ବରରେ ସକାଳୁ ଟାଣ ଖରା ଦେଖିବାକୁ ମିଳିଥିଲା। ମଧ୍ୟାହ୍ନ ବେଳକୁ ମଧ୍ୟ ତାତି ଅସମ୍ଭାଳ ହୋଇ ପଡିଥିଲା। କିନ୍ତୁ ଅପରାହ୍ନରେ କାଳବୈଶାଖୀ ବର୍ଷା ଯୋଗୁ ଲୋକମାନେ ସାମାନ୍ୟ ଆଶ୍ବସ୍ତି ଅନୁଭବ କରିଥିଲେ। 

ମଙ୍ଗଳବାର ୨୮ଟି ସହରର ତାପମାତ୍ରା ୪୦ ଡିଗ୍ରୀ ଉପରେ ରହିଥିଲା। ବୌଦ୍ଧ ଓ ଟିଟିଲାଗଡରେ  ୪୪.୫,  ନୂଆପଡା ୪୪.୪, ଅନୁଗୁଳ ଓ ଝାରସୁଗୁଡା  ୪୪.୩, ବଲାଙ୍ଗୀର ୪୪ ଡିଗ୍ରୀ ତାପମାତ୍ରା ରହିଥିଲା। ତେବେ ସୋମବାର ବାରିପଦାରେ ତାପମାତ୍ରା ସମସ୍ତ ରେକର୍ଡ ଭାଙ୍ଗି ୪୬.୪ ଡିଗ୍ରୀ ରେକର୍ଡ କରାଯାଇଥିବା ବେଳେ ମଙ୍ଗଳବାର ପାରଦ ସାମାନ୍ୟ ତଳକୁ ଖସିଛି। ବାରିପଦାରେ ୪୩.୮ ଡିଗ୍ରୀ ତାପମାତ୍ରା ରେକର୍ଡ କରାଯାଇଛି। ସେହିପରି ସମ୍ବଲପୁରରେ ୪୩.୫ ଡିଗ୍ରୀ, ନୟାଗଡ, ଭଦ୍ରକ  ଓ ଯାଜପୁର ୪୩ ଡିଗ୍ରୀ ରେକର୍ଡ କରାଯାଇଛି। 

ଆହୁରି ପଢନ୍ତୁ : ଘରୋଇ କଳହକୁ ନେଇ ବାପ-ପୁଅ ହଣାହଣି : ପୁଅ ମୃତ, ବାପା ଗୁରୁତର