ନୂଆଦିଲ୍ଲୀ,୧୫/୦୪ : ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ବିଭିନ୍ନ ଦେଶ ବିରୋଧରେ ଲଗାଇଥିବା ଯେସାକୁ ତେସା ଶୁଳ୍କ ଦେଶର ପୁଞ୍ଜି ବଜାରକୁ ପ୍ରଭାବିତ କରିଛି । ଟ୍ରମ୍ପଙ୍କ ପାଲଟା ଟିକସ ଘୋଷଣା ପରେ ଷ୍ଟକ ବଜାରରେ ବଡ଼ ଧରଣର ହ୍ରାସ ହୋଇଥିଲା । ଚଳିତ ମାସ ଅଦ୍ୟାବଧି ବମ୍ବେ ଷ୍ଟକ ବଜାରର ସେନ୍ସେକ୍ସ ପ୍ରାୟ ୨% ହ୍ରାସ ହେବା ଯୋଗୁ ନିବେଶକ ୧୧.୩୦ ଲକ୍ଷ କୋଟି କ୍ଷତି ସହିଛନ୍ତି । ଟ୍ରମ୍ପଙ୍କ ପାଲଟା ଟାରିଫ ଘୋଷଣା ପରେ ଚୀନ ମଧ୍ୟ ଏହାକୁ କଡ଼ା ଜବାବ ଦେଇଛି । ଏହି ୨ ଦେଶ ମଧ୍ୟରେ ଏବେ ତୀବ୍ର ହୋଇଛି ବାଣିଜ୍ୟ ଯୁଦ୍ଧ ।
ବିଶ୍ୱ ବଜାରରେ ମାନ୍ଦାବସ୍ଥା ଏବଂ କଡ଼ା ବାଣିଜ୍ୟିକ ପ୍ରତିଯୋଗିତା ଯୋଗୁ ସେୟାର ବଜାର ଉପରେ ଏହାର ଗଭୀର ପ୍ରଭାବ ଦେଖାଯାଇଛି । ଏପ୍ରିଲ ୨ ପରଠୁ ବିଏସ୍ଇ ସୂଚକାଙ୍କରେ ୧୪୬୦.୧୮ ପଏଣ୍ଟ (୧.୯୦%) ହ୍ରାସ ପରିଲକ୍ଷିତ ହୋଇଛି । ଇକ୍ୱିଟି ବଜାରରେ ଅନିଶ୍ଚିତତା ଦେଖାଯିବା ଯୋଗୁ ବମ୍ବେ ଷ୍ଟକ ବଜାରରେ ସୂଚୀଭୁକ୍ତ କମ୍ପାନିଗୁଡ଼ିକର ବଜାର ପୁଞ୍ଜି ୧୧.୨୦ ଲକ୍ଷ କୋଟି ହ୍ରାସ ହୋଇ ୪୦୧ ଲକ୍ଷ କୋଟି ଟଙ୍କା ସ୍ତରକୁ ଖସିଆସିଛି । ଟ୍ରମ୍ପ ପାଲଟା ଟିକସ କ୍ଷେତ୍ରରେ ୯୦ ଦିନର ଆଶ୍ୱସ୍ତି ଘୋଷଣା ପରେ ବଜାରରେ ଶୁକ୍ରବାର ୨% ବୃଦ୍ଧି ପରିଲକ୍ଷିତ ହୋଇଥିଲା । ଏପ୍ରିଲ ୧୦ରେ ମହାବୀର ଜୟନ୍ତୀ ଏବଂ ୧୪ରେ ବାବା ସାହେବ ଡ. ଭୀମରାଓ ଆମ୍ବେଦକରଙ୍କ ଜୟନ୍ତୀ ଯୋଗୁ ବଜାର ବନ୍ଦ ରହିଛି । ଏପ୍ରିଲ ପହିଲାରେ ଟ୍ରମ୍ପ ପାଲଟା ଟାରିଫ ଘୋଷଣା କରିଥିଲେ । ତେବେ ଚୀନ ବାଦ ଅନ୍ୟ ସବୁ ଦେଶଗୁଡ଼ିକୁ ଏବେ ଆଶ୍ୱସ୍ତି ଦେଇଛନ୍ତି ଟ୍ରମ୍ପ ।
ଏହି ଖବରଟିକୁ ପଢନ୍ତୁ-୭ ଦାମୀ ଧାତୁ ରପ୍ତାନି ବନ୍ଦ କଲା ଚୀନ୍, ମହଙ୍ଗା ହେବ ଗାଡ଼ି, ଅସ୍ତ୍ରଶସ୍ତ୍ର, ବିମାନ
