ନୂଆଦିଲ୍ଲୀ,୧୧/୦୪: ଖୋଲିବ ରାଜ୍ । କେମିତି ରଚିଥିଲା ମୁମ୍ବାଇ ଆତଙ୍କୀ ହମଲାର ଷଡ଼ଯନ୍ତ୍ର ? ୨୬/୧୧ ମାଷ୍ଟରମାଇଣ୍ଡ ତହବୁର ରାଣାକୁ ୧୮ ଦିନିଆ ହେପାଜତରେ ନେଇଛି ଏନଆଇଏ । ଗତକାଲି (ଗୁରୁବାର) ଆମେରିକାରୁ ତହବୁର ଭାରତ ଫେରିଥିଲା । ଏହାପରେ ପଟିଆଲା ହାଉସ୍ କୋର୍ଟରେ ହାଜର କରାଯାଇଥିଲା । ଏନଆଇଏ ପକ୍ଷରୁ କୋର୍ଟରେ ୨୦ ଦିନିଆ ରିମାଣ୍ଡ ଆବେଦନ ହୋଇଥିଲା । ଯାଞ୍ଚ ପାଇଁ ୧୮ଦିନ ରିମାଣ୍ଡରେ ନେବାକୁ ଅନୁମତି ଦେଇଛନ୍ତି ପଟିଆଲା ହାଉସ୍ କୋର୍ଟ । ୧୮ ଦିନ ଭିତରେ ରାଣାଠୁ ସବୁ ସତ ଓଗାଳିବାକୁ ପ୍ଲାନ ପ୍ରସ୍ତୁତ କରିଛି ଏନଆଇଏ ।
ଦିଲ୍ଲୀର ଲିଗାଲ ସର୍ଭିସ୍ ଅଥରିଟିର ଓକିଲ ପିୟୂଷ ସଚଦେବା କହିଛନ୍ତି, ''ଏନଆଇଏ ୨୦ ଦିନିଆ ରିମାଣ୍ଡ ମାଗିଥିଲା । କୋର୍ଟ ଯାଞ୍ଚ ପାଇଁ ୧୮ ଦିନର ରିମାଣ୍ଡ ପାଇଁ ଅନୁମତି ଦେଇଛନ୍ତି । ହେପାଜତକୁ ନେବା ପୂର୍ବରୁ ଏବଂ ପରେ ତହବୁରର ମେଡ଼ିକାଲ ପରୀକ୍ଷା କରାଯିବ । ଏହା ସହିତ ଅନ୍ୟ କିଛି ମେଡ଼ିକାଲ ଆବଶ୍ୟକତା ପଡ଼ିଲେ ତାହା ପୂରଣ ହେବ ବୋଲି କୋର୍ଟ ନିର୍ଦ୍ଦେଶ ଦେଇଛନ୍ତି ।''
ରାଣାକୁ କୋର୍ଟରୁ ବାହାରକୁ ଆଣିବା ସମୟରେ ସିଏସଏସଏଫ ବ୍ୟତୀତ ଅନ୍ୟ ଅର୍ଦ୍ଧସାମରିକ ବଳ ମୁତୟନ ହୋଇଥିଲେ । ଏକ ସ୍ବତନ୍ତ୍ର ଗାଡ଼ିରେ କୋର୍ଟ ନିଆଯାଇଥିଲା । ଏନଆଇଏ ଏବଂ ର' ଟିମ୍ ତହବୁରକୁ ଆମେରିକାରୁ ଆଣି ଦିଲ୍ଲୀରେ ପହଞ୍ଚିଥିଲେ । ଏବେ ଏନଆଇଏ ହେଡ଼କ୍ୱାର୍ଟରରେ ରହିବ ମୁମ୍ବାଇ ଆତଙ୍କୀ ଆକ୍ରମଣର ମାଷ୍ଟରମାଇଣ୍ଡ ।
#WATCH | 26/11 मुंबई हमलों के आरोपी तहव्वुर राणा को 18 दिन की NIA हिरासत में भेजा गया। दिल्ली राज्य विधिक सेवा प्राधिकरण के तहव्वुर राणा के वकील ने कहा, "NIA ने 20 दिन की पुलिस हिरासत मांगी थी। कोर्ट ने जांच के लिए 18 दिन की कस्टडी दी है। कोर्ट ने निर्देश दिए हैं कि हिरासत में… pic.twitter.com/LLiruw6SsD
— ANI_HindiNews (@AHindinews) April 10, 2025
୨୦୦୮ ମୁମ୍ବାଇ ଆତଙ୍କବାଦୀ ଆକ୍ରମଣର ମାଷ୍ଟରମାଇଣ୍ଡ ତହବୁର ରାଣାକୁ ଆମେରିକାରୁ ସଫଳତାର ସହ ଭାରତକୁ ପ୍ରତ୍ୟର୍ପଣ କରାଯାଇଛି । ୧୬ ବର୍ଷ ପରେ ଭାରତକୁ ଫେରିଛି ରାଣା । ଆମେରିକୀୟ ଗଲ୍ଫଷ୍ଟ୍ରିମ୍ ଜି୫୫୦ ବିମାନ ତହବୁରକୁ ନେଇ ଦିଲ୍ଲୀର ପାଲମ ଟେକ୍ନିକାଲ ଏୟାରପୋର୍ଟରେ ଗୁରୁବାର ସନ୍ଧ୍ୟା ପ୍ରାୟ ସାଢ଼େ ୬ଟାରେ ଲ୍ୟାଣ୍ଡିଂ କରିଛି । ଜାତୀୟ ତଦନ୍ତକାରୀ ସଂସ୍ଥା (ଏନ୍ଆଇଏ) ଏବଂ ଭାରତ ଗୁଇନ୍ଦା ଏଜେନ୍ସି ର’ର ଏକ ଟିମ୍ ତହବୁରକୁ ଧରି ବୁଧବାର ଆମେରିକାରୁ ବାହାରିଥିଲେ ।
ଭାରତରେ ପହଞ୍ଚିବା ପରେ ୬୪ ବର୍ଷୀୟ ତହବୁରକୁ ଏନ୍ଆଇଏର ମୁଖ୍ୟାଳୟକୁ ନିଆଯାଇଥିଲା । ପରେ ଏନ୍ଆଇଏ ତାକୁ ଆତଙ୍କବାଦୀ ନିରୋଧୀ ଆଇନ ବଳରେ ଗିରଫ କରିଥିଲା । ତହବୁରକୁ ପଟିଆଲା ହାଉସ୍ କୋର୍ଟରେ ହାଜର କରାଯାଇଥିଲା । ଏଥିପାଇଁ କୋର୍ଟରେ କଡ଼ା ସୁରକ୍ଷା ବ୍ୟବସ୍ଥା କରାଯାଇଥିଲା । କୋର୍ଟକୁ ନିଆଯିବା ପୂର୍ବରୁ ତହବୁରର ମେଡିକାଲ ଯାଞ୍ଚ କରାଯାଇଥିଲା ।
ଟ୍ରମ୍ପ କରିଥିଲେ ତହବୁର ପ୍ରତ୍ୟର୍ପଣ ଘୋଷଣା- ତହବୁର ରାଣାକୁ ଭାରତକୁ ଫେରାଇ ଆଣିବାକୁ ସେବେ ଘୋଷଣା ହୋଇଥିଲା ଯେବେ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଆମେରିକା ଗସ୍ତ କରଥିଲେ । ଗତ ଫେବୃଆରୀ ୧୪ରେ ପିଏମ୍ ମୋଦିଙ୍କ ସହିତ ସଂଯୁକ୍ତ ସମ୍ମେଳନରେ ଆମେରିକା ରାଷ୍ଟ୍ରପତି ଡୋନାଲ୍ଟ ଟ୍ରମ୍ପ କହିଥିଲେ, ଆମେ ଖୁବଶୀଘ୍ର ଜଣେ ଆତଙ୍କୀକୁ ଭାରତ ଫେରାଇବାକୁ ଯାଉଛୁ । ତହବୁରକୁ ଆମେରିକା ଲସ୍ ଏଞ୍ଜେଲେସର ମେଟ୍ରୋପୋଲିଟନ ସେଣ୍ଟରରେ ରଖାଯାଇଥିଲା । ଭାରତ-ଆମେରିକା ପ୍ରତ୍ୟର୍ପଣ ଚୁକ୍ତି ଜରିଆରେ କାର୍ଯ୍ୟାନୁଷ୍ଠାନ ଗ୍ରହଣ ପରେ ତହବୁରକୁ ଆମେରିକାରେ ନ୍ୟାୟିକ ହେପାଜତରେ ରଖାଯାଇଥିଲା ।
