ଭୁବନେଶ୍ଵର, ୧୫/୦୨ : ଆଖିରେ ଆଖିଏ ଲୁହ, ଛାତିରେ ପୁଳାଏ କୋହ... କଂଗ୍ରେସ ଭବନ ଦୁଆର ମୁହଁରେ ମୁଣ୍ଡିଆ ମାରି ଭିତରକୁ ଆସିଲେ ସୁର। ହଟିଲା ନିଲମ୍ଵନ ନିର୍ଦ୍ଦେଶ, ଦୀର୍ଘ ୯ ମାସ ପରେ ଘର ବାହୁଡ଼ିଲେ କଂଗ୍ରେସର ଟାଣୁଆ ନେତା ସୁର ରାଉତରାୟ। ଘର ବାହୁଡ଼ା ବେଳେ ସୁରଙ୍କ ବଡ଼ ପୁଅ ସିଦ୍ଧାର୍ଥ ରାଉତରାୟ ଉପସ୍ଥିତ ଥିଲେ।
ଦଳକୁ ପ୍ରତ୍ୟାବର୍ତ୍ତନ ପରେ ସୁର ରାଉତରାୟ କଂଗ୍ରେସ ଅଧ୍ୟକ୍ଷ, ପିସିସି ସଭାପତି ଏବଂ ଯୁବ କଂଗ୍ରେସକୁ ଧନ୍ୟବାଦ ଜଣାଇଛନ୍ତି। ଏନେଇ ସୁର କହିଛନ୍ତି ଯେ, '୯ ମାସ ବହୁତ ଯନ୍ତ୍ରଣାରେ ଥିଲି। କିଛି କୁଚକ୍ରୀ ମୋତେ ଷଡ଼ଯନ୍ତ୍ର କରି ନିଲମ୍ବନ କରିଥିଲେ। ଆଜି ମୋ ମନ୍ଦିରକୁ ମୁଁ ଫେରିଲି, ବହୁତ ଖୁସି। ଆଉ କନ୍ଦଳ ରହିବନି, ମିଳିମିଶି ସଙ୍ଗଠନ ପାଇଁ କାମ କରିବୁ।'
ଗତ ନିର୍ବାଚନ ବେଳେ ଦଳ ବିରୋଧୀ କାର୍ଯ୍ୟ ପାଇଁ ସୁର ରାଉତରାୟଙ୍କୁ ୬ ବର୍ଷ ପାଇଁ ବହିଷ୍କାର କରିଥିଲା ଦଳ। ପୁଅ ମନ୍ମଥ ରାଉତରାୟ ବିଜେଡିରୁ ଟିକେଟ ପାଇ ଭୁବନେଶ୍ୱରରେ ନିର୍ବାଚନ ଲଢୁଥିବା ସମୟରେ ନିଜ ପୁଅ ପାଇଁ ପ୍ରଚାର କରୁଥିଲେ ସୁର। ଫଳ ସ୍ୱରୁପ ସୁରଙ୍କୁ ଦଳରୁ ବହିଷ୍କାର କରିଥିଲା କଂଗ୍ରେସ । ତେବେ ଶୁକ୍ରବାର ନିଲମ୍ଵିତ କିମ୍ଵା ବହିଷ୍କୃତ ନେତାଙ୍କ ଉପରୁ ନିଲମ୍ବନ ନିର୍ଦ୍ଦେଶ ହଟାଇଥିଲେ ନୂଆ ପିସିସି ସଭାପତି ଭକ୍ତଚରଣ ଦାସ। ସୁରଙ୍କ ଉପରୁ ମଧ୍ୟ ହଟିଥିଲା ନିଲମ୍ବନ ନର୍ଦ୍ଦେଶ। ଏହାପରେ ଆଜି ବିରାଟ ପଟୁଆରରେ ଆସି ପୁଣି ଦଳରେ ସାମିଲ ହୋଇଛନ୍ତି ସୁର ରାଉତରାୟ। ତେବେ ସୁର ଜଟଣୀରୁ ୬ ଥର ବିଧାୟକ ହୋଇଥିବା ବେଳେ କଂଗ୍ରେସ ସରକାର ସମୟରେ ମନ୍ତ୍ରୀ ପଦ ମଧ୍ୟ ତୁଲାଇଛନ୍ତି।
