ନୂଆଦିଲ୍ଲୀ,୨୬/୦୩: ସୁପ୍ରିମକୋର୍ଟ ଆହ୍ଲାବାଦ ହାଇକୋର୍ଟଙ୍କ ସେହି ମନ୍ତବ୍ୟ ଉପରେ ରୋକ ଲଗାଇଛନ୍ତି, ଯେଉଁଥିରେ କୋର୍ଟ କହିଥିଲେ ଯେ,' ମହିଳାଙ୍କ ବକ୍ଷକୁ ଛୁଇଁବା ଛାତି ପୋଷାକ ଟାଣିବାକୁ ପ୍ରୟାସ କରିବା ଦୁଷ୍କର୍ମ ଅପରାଧ ନୁହେଁ।' ତେବେ ଆହ୍ଲାବାଦ ହାଇକୋର୍ଟଙ୍କର ଏହି ରାୟକୁ ନେଇ ଅନେକ ସଂଗଠନ ତଥା ବୁଦ୍ଧିଜୀବୀ ମହଲରେ ନିନ୍ଦା ଓ ସମାଲୋଚନା କରାଯାଇଥିଲା। ଏ ସଂକ୍ରାନ୍ତରେ ସୁପ୍ରିମକୋର୍ଟ କହିଛନ୍ତି ଯେ ଏହି ମନ୍ତବ୍ୟରେ ସମ୍ପୂର୍ଣ୍ଣ ସମ୍ବେଦନଶୀଳତା ଏବଂ ଅମାନୁଷିକ ଆଭିମୁଖ୍ୟ ଦର୍ଶାଯାଇଛି। ଆହ୍ଲାବାଦ ହାଇକୋର୍ଟଙ୍କ ଆଦେଶରେ ଦିଆଯାଇଥିବା ବିବାଦୀୟ ମନ୍ତବ୍ୟ ଉପରେ ଆରମ୍ଭ ହୋଇଥିବା ସ୍ବତଃ ସଂଜ୍ଞାନ ପ୍ରକ୍ରିୟା ଅର୍ଥାତ୍ ସୋ ମୋଟୁରେ ସୁପ୍ରିମକୋର୍ଟ କେନ୍ଦ୍ର, ୟୁପି ସରକାର ଏବଂ ଅନ୍ୟମାନଙ୍କୁ ନୋଟିସ ଜାରି କରିଛନ୍ତି।
ଏହାପୂର୍ବରୁ ସୁପ୍ରିମକୋର୍ଟ ଆହ୍ଲାବାଦ ହାଇକୋର୍ଟଙ୍କ ନିଷ୍ପତ୍ତିକୁ ସ୍ବତଃ ସଂଜ୍ଞାନ ଭାବେ ଗ୍ରହଣ କରି ଏପରି ରାୟକୁ ନିନ୍ଦା କରିଥିଲେ। ଏହାର ଗୋଟିଏ ଦିନ ପୂର୍ବରୁ ଜଷ୍ଟିସ ବେଲା ଏମ ତ୍ରିବେଦୀ ଏବଂ ଜଷ୍ଟିସ ପ୍ରସନ୍ନ ବି ଭାରାଲେଙ୍କ ଏକ ଖଣ୍ଡପୀଠ ହାଇକୋର୍ଟର ବିବାଦୀୟ ନିଷ୍ପତ୍ତିକୁ ଚ୍ୟାଲେଞ୍ଜ କରି ଆବେଦନ ଶୁଣାଣି କରିବକୁ ମନା କରିଦେଇଥିଲେ। ଜଷ୍ଟିସ ବିଆର ଗଓ୍ବଇ ଏବଂ ଜଷ୍ଟିସ ଏଜି ମାସିହଙ୍କ ଖଣ୍ଡପୀଠ ବୁଧବାର ଦିନ ଏହି ମାମଲାର ଶୁଣାଣି କରିଛନ୍ତି।
ଏହାପୂର୍ବରୁ ଦୁଇ ଅଭିଯୁକ୍ତ ପୱନ ଏବଂ ଆକାଶଙ୍କ ମାମଲାରେ ହାଇକୋର୍ଟ ଏହି ବିବାଦୀୟ ନିଷ୍ପତ୍ତି ଦେଇଥିଲେ। ପ୍ରାରମ୍ଭରେ ଉଭୟଙ୍କୁ ଦୁଷ୍କର୍ମ ଏବଂ ଯୌନ ଅପରାଧରୁ ସୁରକ୍ଷା (ପୋକ୍ସୋ) ଅଧିନିୟମ ଅଧୀନରେ ଅଭିଯୋଗ କରାଯାଇଥିଲା। କିନ୍ତୁ, ହାଇକୋର୍ଟ ଏହି ରାୟରେ କହିଥିଲେ ଯେ ତାଙ୍କ କାର୍ଯ୍ୟ ଦୁଷ୍କର୍ମ କିମ୍ବା ଦୁଷ୍କର୍ମ ପୟାସ ଭଳି ନୁହେଁ, ବରଂ କମ୍ ଯୌନ ନିର୍ଯାତନା ଅଭିଯୋଗ ଅନ୍ତର୍ଗତ ଅଟେ। ଆହ୍ଲାବାଦ ହାଇକୋର୍ଟଙ୍କ ଏଭଳି ନିଷ୍ପତ୍ତିକୁ ବିରୋଧ କରାଯିବା ପରେ ସୁପ୍ରିମକୋର୍ଟ ନିଜ ତରଫରୁ ମାମଲାକୁ ବିଚାରକୁ ନେଇ ଆହ୍ଲାବାଦ ହାଇକୋର୍ଟଙ୍କ ଏହି ରାୟକୁ ଭର୍ତ୍ସନା କରିଥିଲେ।
