ନୂଆଦିଲ୍ଲୀ, ୦୬/୦୩ : ଲିଭ୍-ଇନ୍-ରିଲେସନ୍କୁ ନେଇ ସୁପ୍ରିମକୋର୍ଟଙ୍କ ବଡ଼ ରାୟ। ଦୀର୍ଘ ସମୟ ଧରି ଲିଭ୍-ଇନ୍-ରିଲେସନ୍ରେ ରହିବା ପରେ ପୁରୁଷ ବନ୍ଧୁଙ୍କ ବିରୋଧରେ ବିବାହ ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ଅଭିଯୋଗ କରିପାରିବେନି ମହିଳା। ପୁରୁଷ ବନ୍ଧୁଙ୍କ ବିରୋଧରେ ହେବନି କାର୍ଯ୍ୟାନୁଷ୍ଠାନ। ବିବାହ ପ୍ରତିଶ୍ରୁତି ଦେଇ ପ୍ରତାରଣା ଏବଂ ଦୁଷ୍କର୍ମ ମାମଲାରେ ଶୁଣାଣି କରି ଏଭଳି ରାୟ ଦେଇଛନ୍ତି ସର୍ବୋଚ୍ଚ ଅଦାଲତ। ଦଶନ୍ଧି ଧରି ସମ୍ପର୍କ ରହିବା ପରେ ମହିଳାଙ୍କର ଏଭଳି ଅଭିଯୋଗ ଯୁକ୍ତିହୀନ। ଏହା ଅପରାଧ ନୁହେଁ ବରଂ ସମ୍ପର୍କରେ ତିକ୍ତତା। ଦୀର୍ଘ ଦିନ ଧରି ଶାରିରୀକ ସମ୍ପର୍କ ରଖିବା ପଛର କାରଣ ଯେ କେବଳ ବିବାହ ପ୍ରତିଶ୍ରୁତି ଥିଲା ତାହା କହିବା ମୁସ୍କିଲ୍ ବୋଲି କହିଛନ୍ତି କୋର୍ଟ।
ମାମଲାଟି ହେଉଛି ଜଣେ ବ୍ୟାଙ୍କ ମ୍ୟାନେଜର ଏବଂ ଲେକଚରର୍ ପାର୍ଟନରଙ୍କର। ଦୀର୍ଘ ୧୬ ବର୍ଷ ଧରି ଲିଭ୍-ଇନ୍-ରିଲେସନସିପ୍ରେ ରହୁଥିଲେ ଏମାନେ। ଦୀର୍ଘ ବର୍ଷ ହେଲା ଦୁହିଁଙ୍କ ମଧ୍ୟରେ ସବୁ ଠିକ୍ ଚାଲିଥିଲା। ହଠାତ୍ ସମ୍ପର୍କରେ ଭଟ୍ଟା ପଡ଼ିଲା। ଏହାପରେ କୋର୍ଟଙ୍କ ଦ୍ଵାରସ୍ଥ ହୋଇଥିଲେ ମହିଳା ପାର୍ଟନର୍। ବିବାହ ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ଏବଂ ପ୍ରେମ ପ୍ରତାରଣା ଅଭିଯୋଗ ଆଣିଥିଲେ ମହିଳା। ଏପରିକି ବୟଫ୍ରେଣ୍ଡ୍ଙ୍କ ବିରୋଧରେ ବଳାତ୍କାର ଅଭିଯୋଗ ବି କରିଥିଲେ। ଏହି ମାମଲାରେ ଏବେ ସୁପ୍ରିମକୋର୍ଟ ବଡ଼ ରାୟ ଦେଇଛନ୍ତି। ପୁରୁଷ ବନ୍ଧୁଙ୍କ ବିରୋଧରେ ହୋଇଥିବା ଅପରାଧିକ ମାମଲା ଖାରଜ କରିଛନ୍ତି।
କୋର୍ଟ କହିଛନ୍ତି ଯେ, ଉଭୟ ପକ୍ଷ ଉଚ୍ଚ ଶିକ୍ଷିତ। ସେମାନେ ଆପୋସ ସହମତିରେ ଶାରିରୀକ ସମ୍ପର୍କ ରଖିଛନ୍ତି। ଦୁହେଁ ଭିନ୍ନ ଭିନ୍ନ ସହରରେ କାର୍ଯ୍ୟରତ ଥିଲେ ବି ସମ୍ପର୍କରେ ଥିଲେ। ଜଣେ ଅନ୍ୟ ଜଣଙ୍କ ଘରକୁ ଯିବା ଆସିବା କରୁଥିଲେ। ଦୀର୍ଘ ୧୬ ବର୍ଷ ହେଲା କେବଳ ବିବାହ ପ୍ରତିଶ୍ରୁତି ପାଇଁ ମହିଳା ଜଣଙ୍କ ଶାରିରୀକ ସମ୍ପର୍କ ରଖିଥିବା କହିବା ଭୁଲ୍। ଏହା ଏକ ଲମ୍ବା ସମୟ। ଏହି ସମୟ ଭିତରେ ବିନା କୌଣସି ବାଧାରେ ମହିଳା ଜଣଙ୍କ ସମ୍ବନ୍ଧ ରଖିଥିଲେ। ଏହାର ଅର୍ଥ ମହିଳାଙ୍କ ସହ କିଛି ଜବରଦସ୍ତି ହୋଇନି କି ତାଙ୍କୁ ପ୍ରତାରଣା କରାଯାଇନି। ଏହାକୁ ବଳପୂର୍ବକ କୁହାଯିବ ନାହିଁ।
ଏହା ଅପରାଧ ନୁହେଁ ବରଂ ସମ୍ପର୍କରେ ତିକ୍ତତା। ବିନା କୌଣସି ବାଧାରେ ମହିଳା ଜଣଙ୍କ ଏତେ ଦିନ ସମ୍ବନ୍ଧରେ ରହିବା ଏହାକୁ ପ୍ରମାଣିତ କରୁଛି। ଦୀର୍ଘ ଦିନ ଧରି ଶାରିରୀକ ସମ୍ପର୍କ ରଖିବା ପଛର କାରଣ ଯେ କେବଳ ବିବାହ ପ୍ରତିଶ୍ରୁତି ଥିଲା ତାହା କହିବା ଭୁଲ୍। ଜଷ୍ଟିସ୍ ବିକ୍ରମ ନାଥ ଏବଂ ଜଷ୍ଟିସ୍ ସନ୍ଦୀପ ମେହତାଙ୍କ ବେଞ୍ଚ୍ ଏହି ରାୟ ଦେଇଛନ୍ତି।
