ପୁରୀ ୧୪/୦୧: ପବିତ୍ର ମକର ସଂକ୍ରାନ୍ତିରେ ଶ୍ରୀବିଗ୍ରହଙ୍କୁ ମକରଚୂଳ ଓ ମାଳ ଲାଗି କରାଯାଇ ସ୍ୱତନ୍ତ୍ର ବେଶ ହେବ । ମହାପ୍ରଭୁଙ୍କୁ ମକର ଚାଉଳ ଓ ଧନୁମୁଆଁ ଭୋଗ ଅର୍ପଣ କରାଯିବ । ଘଣ୍ଟ ଛତାର ପଟୁଆରରେ ମକରବେଢ଼ା ଅନୁଷ୍ଠିତ ହେବ ।
ସୋମବାର ଅଲାମଚଣ୍ଡୀଙ୍କ ମନ୍ଦିରରୁ ମକର ତାଡ଼ ଆସି ଶ୍ରୀମନ୍ଦିରରେ ପହଞ୍ଚିଛି । ଏଥିସହ ବଡ଼ଦେଉଳରେ ଚାଉଳ ମେଲାଣ ତଥା ମକର ଅଧିବାସ ନୀତି ଅନୁଷ୍ଠିତ ହୋଇଛି । ସନ୍ଧ୍ୟାଧୂପ ପରେ ଚନ୍ଦନଲାଗି ସରିବାରେ ଚାଉଳ ମେଲାଣ ଓ ଅଧିବାସ ନୀତି ହୋଇଥିଲା । ପର୍ବ ଦିନ ମହାପ୍ରଭୁଙ୍କ ଅବକାଶ ନୀତି ବଢ଼ି ମହାପ୍ରଭୁଙ୍କ ବେଶ ହେବ । ସକାଳ ଧୂପ ସରି ମହାସ୍ନାନ ନୀତି ସମ୍ପନ୍ନ ହେବ । ଠାକୁରେ ନୂଆ ଲୁଗା, ଚୂଳମାଳ ଓ ୬ମୂର୍ତ୍ତି ଅଳଙ୍କାର ଲାଗି ହୋଇ ସ୍ୱତନ୍ତ୍ର ବେଶରେ ବିଭୂଷିତ ହେବେ । ଦ୍ୱିପହର ଧୂପରେ ରୋଷ ଘରୁ ଘଣ୍ଟା, ଛତି ଓ କାହାଳୀର ପଟୁଆରରେ ଯାତ୍ରା ଭୋଗ ଆସିବ । ଷୋଡ଼ଶ ଉପଚାରରେ ଶ୍ରୀବିଗ୍ରହଙ୍କୁ ମଣୋହି କରାଯିବ । ନୂଆ ଅରୁଆଚାଉଳରେ ଖୁଆ, ସର, ଛେନା, କଦଳୀ, ପିସ୍ତାବାଦାମ, ଖିସମିସ, ଆଖୁଖଣ୍ଡ ଓ ବେଦେନା ପକାଇ ମକର ଚାଉଳ ପ୍ରସ୍ତୁତ କରି ଧନୁମୁଆଁ ଠାକୁରଙ୍କୁ ଭୋଗ ଲଗାଯିବ । ଘଣ୍ଟଛତା ସହ ମକର ବେଢ଼ା, ଭୋଗ ଓ ବନ୍ଦାପନା ହେବ।
