ପୁରୀ,୦୯/୦୨: ଏଣିକି ରାସାୟନିକଯୁକ୍ତ ଚାଉଳରେ ପ୍ରସ୍ତୁତ ହେବନି ମହାପ୍ରଭୁଙ୍କ ମହାପ୍ରସାଦ । ଜୈବିକ ସାରରେ ପ୍ରସ୍ତୁତ ହେଉଥିବା ଚାଉଳରେ ମହାପ୍ରସାଦ ପ୍ରସ୍ତୁତ କରାଯିବ । ସେଥିଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ଉଦ୍ୟମ ଆରମ୍ଭ ହୋଇଛି । ଏଥିଲାଗି ଆସନ୍ତା ୧୦ ତାରିଖରେ ଭୁବନେଶ୍ୱରସ୍ଥିତ କୃଷିଭବନର ତୃତୀୟ ମହଲା ସଭାଗୃହରେ ପରିସରରେ ଏକ ପ୍ରସ୍ତୁତି ବୈଠକ ଅନୁଷ୍ଠିତ ହେବ ।
କୃଷି ଓ କୃଷକ ସଶକ୍ତୀକରଣ ବିଭାଗର ପ୍ରମୁଖ ଶାସନ ସଚିବ ତଥା ଶ୍ରୀମନ୍ଦିର ମୁଖ୍ୟ ପ୍ରଶାସକ ଡ.ଅରବିନ୍ଦ ପାଢ଼ୀ ଅଧ୍ୟକ୍ଷତା କରିବେ । ବୈଠକରେ ସୁଆରମହାସୁଆର ନିଯୋଗର ସଭାପତି ଓ ସମ୍ପାଦକ ଯୋଗଦେବା ଲାଗି ଶ୍ରୀମନ୍ଦିର ନୀତି ପ୍ରଶାସକ ଜିତେନ୍ଦ୍ର କୁମାର ସାହୁ ଚିଠି କରିଛନ୍ତି ।
ଚିଠିରେ ସ୍ପଷ୍ଟ ଉଲ୍ଲେଖ ରହିଛି, ଶ୍ରୀମନ୍ଦିର ରୋଷେଇରେ ରାସାୟନିକମୁକ୍ତ ଜୈବିକ ପଦ୍ଧତିରେ ଉତ୍ପାଦିତ ଚାଉଳ ବ୍ୟବହାର କରାଯିବା ସମ୍ପର୍କରେ ବୈଠକରେ ବିସ୍ତୃତ ଆଲୋଚନା ହେବ । ଶ୍ରୀମନ୍ଦିର ପ୍ରଶାସନର ଏଭଳି ବ୍ୟବସ୍ଥାକୁ ନିଯୋଗ ପକ୍ଷରୁ ସ୍ୱାଗତ କରାଯାଇଛି ।
