ପୁରୀ ୦୮/୦୪: ଆଜି ହରଚଣ୍ଡୀ ସାହି ପକ୍ଷରୁ ସୀତା ବିବାହ ପ୍ରସ୍ତାବ ଆଗତ ହେବ । ସାହିଯାତ୍ରାର ମୁଖ୍ୟ ଆକର୍ଷଣ ରହିବେ ପର୍ଶୁରାମ । ଦେଖିବାକୁ ମିଳିବ ପର୍ଶୁରାମଙ୍କ ବୀର ନୃତ୍ୟ ।
ପରମ୍ପରା ଅନୁଯାୟୀ ପର୍ଶୁରାମ ହରଚଣ୍ଡୀ ସାହିରୁ ବାହାରି ବନ୍ଧୁ ବାଲିସାହି ଭ୍ରମଣ କରିବେ । ପରେ ବଡ଼ଦାଣ୍ଡସ୍ଥିତ ଜଗନ୍ନାଥ ବଲ୍ଲଭ ମଠ ପରିସରରେ ପହଞ୍ଚି ରାମଲୀଳା ନୀତି ସମ୍ପନ୍ନ କରିବେ । ଦିନରେ ହରଚଣ୍ଡୀ ସାହି ଭ୍ରମଣ ପରେ ରାତିରେ ବାଲିସାହିକୁ ଯିବ ପଟୁଆର । ତ୍ରେତୟା ଯୁଗର ବିଷୟବସ୍ତୁ ଆଧାରିତ ଏହି ପ୍ରସଙ୍ଗ । ମିଥିଳା ନରେଶ ଜନକଙ୍କ ସର୍ତ୍ତ ସ୍ୱରୁପ ଶିବଧନୁ ଭଙ୍ଗ କରି ଶ୍ରୀରାମ ରାଜା ଜନକଙ୍କ କନ୍ୟା ସୀତାଦେବୀଙ୍କୁ ବିବାହ କରି ଫେରିଥାନ୍ତି । ଆନନ୍ଦଉଲ୍ଲାସରେ ପଟୁଆର ଆଗଉଥିବା ବେଳେ ଭୀଷଣ କୋଳାହଳ ସୃଷ୍ଟି ହୋଇଥିଲା । ମହାନ୍ ଯୋଦ୍ଧା ପର୍ଶୁରାମ ସମଗ୍ର ବିଶ୍ୱକୁ କ୍ଷେତ୍ରୀୟ ଶୂନ୍ୟ କରିବାକୁ ଶପଥ କରିଥାନ୍ତି । ପଟୁଆରର ପାଟିତୁଣ୍ଡ ପର୍ଶୁରାମଙ୍କ ଧ୍ୟାନ ଭଙ୍ଗ କରିଥିଲା । ସେ ଉତ୍କ୍ଷିପ୍ତ ହୋଇ ଶ୍ରୀରାମଙ୍କ ସମ୍ମୁଖକୁ ଆସି ଯୁଦ୍ଧରେ ହରାଇଲେ ପଟୁଆର ଆଗେଇବ ବୋଲି ଘୋଷଣା କରିଥିଲେ । ଶ୍ରୀରାମ ଯୁଦ୍ଧକରି ପର୍ଶୁରାମଙ୍କୁ ହରାଇବା ସହ ତାଙ୍କ ଗର୍ବ ଭଙ୍ଗ କରିଥିଲେ । ଏହାକୁ ଆଧାର କରି ହରଚଣ୍ଡୀ ସାହିର ସାହିଯାତ୍ରା ପ୍ରଦର୍ଶିତ ହୋଇଥିଏ।
