ଭୁବନେଶ୍ୱର, ୦୯/୦୪: ପଶ୍ଚିମକେନ୍ଦ୍ର ବଙ୍ଗୋପସାଗରରେ ରହିଛି ଲଘୁଚାପ କ୍ଷେତ୍ର । ଧିରେ ଧିରେ ଏହା ଉତ୍ତର-ପୂର୍ବ ବା ଉତ୍ତର ଦିଗକୁ ଗତି କରୁଛି । ଏହା ପ୍ରଭାବରେ ଦକ୍ଷିଣ ପୂର୍ବ ଆଡ଼କୁ ପବନର ଗତି ରହୁଛି। ଏହା ଫଳରେ ସାମାନ୍ୟ ଗୁଳୁଗୁଳି ଅନୁଭୂତ ହେବ କିନ୍ତୁ ବିଶେଷ ତାପମାତ୍ରା ବୃଦ୍ଧି ହେବ ନାହିଁ । ଏପ୍ରିଲ ୧୦ ତାରିଖ ଯାଏଁ ବିଶେଷ ତାପମାତ୍ରା ବଢିବ ନାହିଁ । କିନ୍ତୁ ୧୧ ତାରିଖ ବେଳକୁ ଲଘୁଚାପ କ୍ଷେତ୍ର ବାଂଲାଦେଶ ଆଡ଼କୁ ମୁହାଁହେବ । ଫଳରେ ଉତ୍ତର ପଶ୍ଚିମରୁ ଓଡ଼ିଶାକୁ ପବନ ବହିବ । ଯାହାଫଳରେ ତାପମାତ୍ରା ବୃଦ୍ଧି ହେବାର ସମ୍ଭାବନା ରହିଛି।
ଅନ୍ୟପଟେ ଏପ୍ରିଲ ୧୨ରୁ ୧୪ ତାରିଖ ଯାଏଁ କାଳବୈଶାଖୀ ବର୍ଷା ହୋଇପାରେ ବୋଲି କହିଛନ୍ତି ପାଣିପାଗ ବିଶେଷଜ୍ଞ ଶରତ ଚନ୍ଦ୍ର ସାହୁ । ବିଶେଷ ଭାବେ ଉତ୍ତର ଓଡ଼ିଶାରେ ବର୍ଷା ହେବାର ସମ୍ଭାବନା ରହୁଛି । ବିଜୁଳି ଘଡଘଡି ସହ ବର୍ଷା ହେବ । କୁଆ ପଥର ବର୍ଷା ହେବାର ମଧ୍ୟ ସମ୍ଭାବନା ରହିଛି । ସେପଟେ ୧୪ ପରେ ବଢ଼ିବ ତାପମାତ୍ରା । ଆଭ୍ୟନ୍ତରୀଣ ଓଡ଼ିଶାରେ ତାପମାତ୍ରା ୪୦ ଅତିକ୍ରମ କରିବ ବୋଲି କହିଛନ୍ତି ପାଣିପାଗ ବିଶେଷଜ୍ଞ।
