ପୁରୀ,୨୩/୦୩: ହାତଗଣତି କିଛି ଦିନ ପରେ ସାହିଯାତ । ହେଲେ ଏଥିପାଇଁ ପ୍ରଶାସନିକ ପ୍ରସ୍ତୁତି ନାହିଁ କି ତତ୍ପରତା ନାହିଁ । ମନ୍ଦିର ପାଖ ସାହି ରାସ୍ତା ସେମିତି ଖାଲ ଢିପ ହୋଇପଡ଼ିଛି । କେଉଁଠି ପେଭର ବ୍ଲକ୍ ଉଠିଗଲାଣି ତ କେଉଁଠି ଅଳିଆ ପାହାଡ଼ ଭଳି ରାସ୍ତା କଡ଼ରେ ଗଦା ହୋଇଛି । ସାହିଯାତ ପାଇଁ ପ୍ରତ୍ୟେକ ପୁରୀବାସୀ ଉନ୍ମାଦ ଉତ୍କଣ୍ଠାର ସହ ଦିନ ଗଣୁଛନ୍ତି । ୧୫ ଦିନବ୍ୟାପୀ ପୁରୀକୁ ସର୍ବବୃହତ ମୁକ୍ତାକାଶ ରଙ୍ଗମଞ୍ଚରେ ପରିଣତ କରିବାକୁ ଲକ୍ଷଲକ୍ଷ ଲୋକ ପ୍ରତୀକ୍ଷା କରି ରହିଛନ୍ତି । ହେଲେ ଏନେଇ ପ୍ରସ୍ତୁତି କରିବାକୁ ପ୍ରଶାସନ ନିଜ ଆଡୁ ବୈଠକଟିଏ ଡାକିବାକୁ ମଧ୍ୟ ଉଚିତ ଭାବୁନି ।
ସାହିଯାତ ପାଇଁ ପ୍ରସ୍ତୁତି କରିବାକୁ ପ୍ରଶାସନିକ ସ୍ତରରେ କୌଣସି ବୈଠକ ଡକାନଯିବାରୁ ଆଠ ସାହି ଆଖଡ଼ା ମିଳିତ ସମନ୍ୱୟ କମିଟି ବାଧ୍ୟ ହୋଇ ଗତ ଗୁରବାର ଏକ ବୈଠକ କରିବାକୁ ପ୍ରଶାସନକୁ ଚିଠି କରିଥିଲା । ବୈଠକରେ ଜିଲ୍ଲାପାଳଙ୍କ ସମେତ ଜିଲ୍ଲାର ଅନ୍ୟ ଅଧିକାରୀ ଉପସ୍ଥିତ ଥିଲେ । ଅନ୍ୟ ପକ୍ଷରେ ବିଭିନ୍ନ ସାହିର ମୁରବି ମଧ୍ୟ ଉପସ୍ଥିତ ରହିଥିଲେ । ବିଭିନ୍ନ ସାହି ପକ୍ଷରୁ ଅଧିକାରୀଙ୍କ ନିକଟରେ ଅନେକ ଦାବି ଉପସ୍ଥାପନ କରାଯାଇଥିଲା । ସାହି ରାସ୍ତା ମରାମତି କରିବା ଏବଂ ସାହିଯାତ ପାଇଁ ଅନୁଦାନ ରାଶି ପ୍ରଦାନ କରିବା ବୈଠକରେ ମୁଖ୍ୟ ଦାବି ଥିଲା । ତେବେ ଅନୁଦାନ ରାଶି ବାବଦରେ ଚିଠି କରାଯିବ କହି ଜିଲ୍ଲାପାଳ ନିଜ ଦାୟିତ୍ୱ ଖସେଇ ଥିବା ବେଳେ ସାହିଯାତ ପୂର୍ବରୁ ରାସ୍ତା ମରାମତି ହେବ କହି ପୌର ନିର୍ବାହୀ ଅଧିକାରୀ ନିଜ ଦାୟିତ୍ୱ ଖସେଇଥିଲେ । ହେଲେ ତୃଣମୂଳ ସ୍ତରରେ ଏହାର କାର୍ଯ୍ୟକାରିତା ଶୂନ ରହିଛି ।
ସାହିଯାତକୁ ଆହୁରି ଭବ୍ୟଢଙ୍ଗରେ କରିବାକୁ ଅର୍ଥ ସବୁଠାରୁ ବଡ଼ ସମସ୍ୟା ସାଜିଥିବାରୁ ଅତିକମ୍ରେ ୫୦ ଲକ୍ଷ ଟଙ୍କା ଦେବାକୁ କମିଟି ପକ୍ଷରୁ ଦାବି ହୋଇଛି । କିନ୍ତୁ ସାହିଯାତକୁ ୧୫ ଦିନରୁ କମ୍ ସମୟ ବାକି ଥିବାରୁ ଏହି ଦାବି ପୂରଣ ହେବାର ସମ୍ଭାବନା ଖୁବ କମ୍ ରହିଛି । ସାହିଯାତରେ ଶ୍ରୀମନ୍ଦିରର ଆଖପାଖରେ ଥିବା ସାହିଗୁଡ଼ିକ ମୁଖ୍ୟ ଭୂମିକା ତୁଲାଇଥାଏ । ହେଲେ ଅନେକ ସାହିର ରାସ୍ତା ଚାଲିବା ସ୍ଥିତିରେ ନାହିଁ । ବାଲି ସାହି ମୁଖ୍ୟ ରାସ୍ତା ବିପର୍ଯ୍ୟସ୍ତ ସ୍ଥିତିରେ ଅଛି । କେତେକ ସ୍ଥାନରେ ପୁରୀ ପୌରସଂସ୍ଥା ପକ୍ଷରୁ ରାସ୍ତା ମରାମତି ହୋଇନଥିବା ବେଳେ ଅନ୍ୟ କେତେକ ସ୍ଥାନରେ ଗ୍ୟାସ୍ ପାଇପ୍ ଓ ଭୂତଳ ବିଦ୍ୟୁତ୍ ତାର ନେବା ପାଇଁ ରାସ୍ତାକୁ ଖୋଳି ସେମିତି ଛାଡ଼ି ଦିଆଯାଇଛି । ସ୍ୱେରେଜ ସଂଯୋଗ ପାଇଁ ମଧ୍ୟ ଅନେକ ଲୋକ ରାସ୍ତା ଖୋଳି ସେମିତି ଛାଡ଼ି ଦେଉଛନ୍ତି ।ଲୋକନାଥ ରୋଡ୍ ଓ ବାସେଳୀ ସାହିରେ ନଳା କାମ ପାଇଁ ରାସ୍ତା ଖାଲଖମାରେ ଭରିରହିଛି । ଦୋଳମଣ୍ଡପ ସାହିର ରାସ୍ତା ମଧ୍ୟ ଭଲ ନାହିଁ। ମାର୍କଣ୍ଡେଶ୍ୱର ସାହି ସଂଲଗ୍ନ ଛୋଟ ଛୋଟ ଗଳିକନ୍ଦିରେ ନଳା ଓ ରାସ୍ତା କାମଚାଲିଛି ।
ସୂଚନାଥାଉକି, ଆସନ୍ତା ୬ ତାରିଖରେ କାଳିକାଦେବୀ ସାହି ପକ୍ଷରୁ ରାମଜନ୍ମ ନୀତି ଅନୁଷ୍ଠିତ ହେବ । ୭ରେ ଯଜ୍ଞରକ୍ଷା ନୀତି, ୮ ରେ ପର୍ଶୁରାମ କଳାହରଣ ନୀତି, ୯ରେ ବନବାସ ନୀତି, ୧୧ରେ ସୀତାଚୋରି ନୀତି, ୧୨ରେ ଲଙ୍କା ପୋଡ଼ି ନୀତି ଏବଂ ୧୩ ତାରିଖରେ ସେତୁବନ୍ଧ ନୀତି ହେବ । ୧୪ ତାରିଖରେ ରାବଣ ବଧ ନୀତି ହେବ ।
