ଭୁବନେଶ୍ୱର,୦୭/୧୦: ଦେଶ ବିଦେଶର ବିଭିନ୍ନ ପର୍ଯ୍ୟଟନ ସ୍ଥଳୀ ବୁଲାଇବା ନାଁରେ ଲୋକଙ୍କଠାରୁ ଲକ୍ଷ ଲକ୍ଷ ଟଙ୍କା ଚୁନ ଲଗାଇଥିବା ଜଣେ ଧୂର୍ତ୍ତ ଠକକୁ ଗିରଫ କରିଛି ଶ୍ରୀଲିଙ୍ଗରାଜ ଥାନା ପୁଲିସ । ତାଙ୍କ ନାମ ସଂସାରୀ ବେହେରା । ଘର କଟକ ବୈଦେଶ୍ୱର ଥାନା ଅଞ୍ଚଳରେ । ସେ ଟଙ୍କପାଣି ରୋଡ୍ ଅଞ୍ଚଳରେ ରହୁଥିଲେ ।
ସୂଚନା ଅନୁଯାୟୀ, ସଂସାରୀ ଦେଶ ବିଦେଶର ବିଭିନ୍ନ ପର୍ଯ୍ୟଟନ ସ୍ଥଳୀ ବୁଲାଇବା ପାଇଁ ଟୁର୍ ଆଣ୍ଡ୍ ଟ୍ରାଭେଲ୍ସ ସଂସ୍ଥା ସାଇ ୱାର୍ଲ୍ଡ ପାରାଡ଼ାଇଜ୍ ନାମରେ ଫେସ୍ବୁକ୍ରେ ବିଜ୍ଞାପନ ଦେଇଥିଲେ । ସେଥିରେ ଯୋଗାଯୋଗ ନମ୍ବର ଦେବା ସହ ବିଭିନ୍ନ ପ୍ୟାକେଜ ରଖିଥିଲେ । ଅଗ୍ରୀମ ଆକାରରେ ଲୋକଙ୍କ ଠାରୁ ଟଙ୍କା ନେଉଥିଲେ । ପରେ ଟଙ୍କା ଦେଇଥିବା ଲୋକଙ୍କୁ ଆଉ ଧରାଛୁଆଁ ଦେଉ ନଥିଲେ କି ସେମାନଙ୍କ ଫୋନ୍ ଉଠାଉ ନଥିଲେ ।
ରଣଜିତ ସିଂହ ନାମକ ଜଣେ ବ୍ୟକ୍ତି ସଂସାରୀଙ୍କୁ ପର୍ଯ୍ୟଟନ ସ୍ଥଳୀ ବୁଲିବାକୁ ଯିବା ପାଇଁ ଅଗ୍ରୀମ ଆକାରରେ ୩୦ ହଜାର ଟଙ୍କା ଦେଇଥିଲେ । ୨ ମାସ ବିତି ଯାଇଥିଲେ ମଧ୍ୟ ସଂସାରୀ ଆଉ ରଣଜିତଙ୍କୁ ଧରାଛୁଆଁ ଦେଇ ନଥିଲେ । ଠକାମୀର ଶିକାର ହୋଇଥିବା ଜାଣି ରଣଜିତ ଏନେଇ ଶ୍ରୀଲିଙ୍ଗରାଜ ଥାନାରେ ଅଭିଯୋଗ କରିଥିଲେ । ପୋଲିସ ଏକ ଠକେଇ ମାମଲା ରୁଜୁକରି ତଦନ୍ତ ଚଳାଇଥିଲା । ଆଜି ପୋଲିସ ଟଙ୍କପାଣି ରୋଡ୍ ଅଞ୍ଚଳରୁ ସଂସାରୀଙ୍କୁ ଉଠାଇ ଆଣିଛି । ପୋଲିସ ତଦନ୍ତରୁ ସଂସାରୀଙ୍କ ନାମରେ ରାଜଧାନୀର ବିଭିନ୍ନ ଥାନାରେ ଏପରି ଠକେଇ ଅଭିଯୋଗ ଥିବା ଜଣାପଡ଼ିଛି । ଏନେଇ ପୁଲିସ ଅଧିକ ତଦନ୍ତ ଜାରି ରଖିଛି । ଆସନ୍ତାକାଲି ସଂସାରୀଙ୍କୁ ଅଦାଲତ ଚାଲାଣ କରାଯିବ ବୋଲି ପୁଲିସ କହିଛି ।
