ନୂଆଦିଲ୍ଲୀ: ରାୱଲପିଣ୍ଡି କ୍ରିକେଟ ଷ୍ଟାଡିୟମରେ ବର୍ଷା ଯୋଗୁଁ ପାକିସ୍ତାନ ଏବଂ ବାଂଲାଦେଶ ମ୍ୟାଚ୍ ବାତିଲ ହୋଇଯାଇଛି । ଚାମ୍ପିଅନ୍ସ ଟ୍ରଫି ୨୦୨୫ର ନବମ ମ୍ୟାଚ୍ ବର୍ଷାରେ ଧୋଇଯାଇଛି । ଏହି ମ୍ୟାଚ୍ ପୂର୍ବରୁ ଟସ୍ ମଧ୍ୟ ହୋଇପାରି ନାହିଁ । ଏହା ସହିତ ଆୟୋଜକ ପାକିସ୍ତାନ ଚାମ୍ପିଅନ୍ସ ଟ୍ରଫି ୨୦୨୫ରେ ବିଜୟ ବିନା ନିଜର ଅଭିଯାନ ଶେଷ କରିଛି । ଚଳିତ ଟୁର୍ଣ୍ଣାମେଣ୍ଟରେ ପାକିସ୍ତାନ କ୍ରିକେଟ ଟିମ୍ ଗ୍ରୁପ୍ ଏରେ ସାମିଲ ଥିଲା । ଏହି ଗ୍ରୁପରେ ଥିବା ଅନ୍ୟ ଦୁଇଟି ଦଳ ଭାରତ ଏବଂ ନ୍ୟୁଜିଲ୍ୟାଣ୍ଡ ସେମିଫାଇନାଲରେ ପହଞ୍ଚିଛନ୍ତି ।
ପାକିସ୍ତାନ ସହିତ ବାଂଲାଦେଶ ଦଳ ମଧ୍ୟ ଟୁର୍ଣ୍ଣାମେଣ୍ଟରୁ ବାଦ ପଡ଼ିଛି । ମ୍ୟାଚ୍ ବିଷୟରେ କହିବାକୁ ଗଲେ, ବର୍ଷା ଯୋଗୁଁ ଟସ୍ ପଡ଼ିବାରେ ବଳିମ୍ବ ହୋଇଥିଲା । ରାୱଲପିଣ୍ଡିରେ ଓଦା ଆଉଟଫିଲ୍ଡ ଯୋଗୁଁ ମ୍ୟାଚ୍ ଆରମ୍ଭ ହୋଇପାରି ନଥିଲା। ମ୍ୟାଚ୍ ପୂର୍ବରୁ ଆରମ୍ଭ ହୋଇଥିବା ବର୍ଷା ବନ୍ଦ ହୋଇଥିଲେ ହେଁ ପଡ଼ିଆ ଓଦା ଥିବାରୁ ମ୍ୟାଚ୍ ହୋଇପାରି ନାହିଁ ।
ପାକିସ୍ତାନୀ ଦଳକୁ ପ୍ରଥମ ମ୍ୟାଚ୍ରେ ନ୍ୟୁଜିଲାଣ୍ଡ ବିପକ୍ଷରେ ୬୦ ରନ୍ରେ ପରାଜୟର ସାମ୍ନା କରିବାକୁ ପଡିଥିଲା। ଏହା ପରେ ଭାରତୀୟ ଦଳ ପାକିସ୍ତାନକୁ ୬ ୱିକେଟରେ ପରାସ୍ତ କରିଥିଲା । ଆଉ ଏବେ ବାଂଲାଦେଶ ବିପକ୍ଷରେ ପାକିସ୍ତାନର ଏହି ମ୍ୟାଚ୍ ବାତିଲ ହୋଇଯାଇଛି । ତେବେ ଚାମ୍ପିଅନ୍ସ ଟ୍ରଫି ଆୟୋଜକ ଭାବରେ କେନିଆ ପରେ ପାକିସ୍ତାନୀ ଦଳ ଟୁର୍ଣ୍ଣାମେଣ୍ଟରେ ଗୋଟିଏ ବି ମ୍ୟାଚ୍ ଜିତିପାରି ନାହିଁ । କେନିଆ ୨୦୦୦ ମସିହାରେ ଚାମ୍ପିଅନ୍ସ ଟ୍ରଫି ଆୟୋଜନ କରିଥିଲା ଏବଂ କେବଳ ଗୋଟିଏ ମ୍ୟାଚ୍ ଖେଳିଥିଲା, ଯେଉଁଥିରେ ଦଳ ପରାଜୟ ଭୋଗିଥିଲା । ସୂଚନାଯୋଗ୍ୟ, ଏହା ପୂର୍ବରୁ ବର୍ଷା ଯୋଗୁଁ ଅଷ୍ଟ୍ରେଲିଆ ଓ ଦକ୍ଷିଣ ଆଫ୍ରିକା ମୁକାବିଲା ରଦ୍ଦ ହୋଇଥିଲା।
