ନୂଆଦିଲ୍ଲୀ ୦୨/୦୫: କାଶ୍ମୀରର ପହଲଗାମରେ ହୋଇଥିବା ଆତଙ୍କବାଦୀ ଆକ୍ରମଣ ସମଗ୍ର ବିଶ୍ୱକୁ ଦୋହଲାଇ ଦେଇଥିଲା। ଆତଙ୍କବାଦୀଙ୍କ ଏହି ଆକ୍ରମଣରେ ୨୬ ଜଣ ପର୍ଯ୍ୟଟକ ପ୍ରାଣ ହରାଇଥିବା ବେଳେ ୨୦ ରୁ ଅଧିକ ଆହତ ହୋଇଥିଲେ। NIA ଦ୍ୱାରା କରାଯାଇଥିବା ଏହି ଆକ୍ରମଣର ପ୍ରାଥମିକ ତଦନ୍ତ ରିପୋର୍ଟ ସାମ୍ନାକୁ ଆସିଛି, ଯେଉଁଥିରେ ପାକିସ୍ତାନର ଏକ ବଡ ଷଡ଼ଯନ୍ତ୍ରର ପର୍ଦ୍ଦାଫାସ ହୋଇଛି।
NIAର ପ୍ରାରମ୍ଭିକ ରିପୋର୍ଟରେ ଅନେକ ଆଶ୍ଚର୍ଯ୍ୟଜନକ ଖୁଲାସା ହୋଇଛି। ରିପୋର୍ଟ ଅନୁଯାୟୀ, ପାକିସ୍ତାନୀ ଆତଙ୍କବାଦୀ ସଂଗଠନ ଲସ୍କର-ଏ-ତୈବା, ଆଇଏସଆଇ ଏବଂ ପାକିସ୍ତାନୀ ସେନାର ସହଯୋଗରେ ଏହି ଆକ୍ରମଣ କରାଯାଇଥିଲା। ଆଇଏସଆଇର ନିର୍ଦ୍ଦେଶରେ ପାକିସ୍ତାନର ଲସ୍କର ମୁଖ୍ୟାଳୟରେ ଆକ୍ରମଣ ଯୋଜନା କରାଯାଇଥିଲା। ତଦନ୍ତରୁ ଜଣାପଡିଛି ଯେ ଆକ୍ରମଣରେ ସାମିଲ ଆତଙ୍କବାଦୀମାନେ ପାକ୍ ଅଧିକୃତ କାଶ୍ମୀର (POK)ରେ ବସିଥିବା ସେମାନଙ୍କର ହ୍ୟାଣ୍ଡଲରର୍ସଙ୍କ ସହ ସମ୍ପର୍କରେ ଥିଲେ। ସେମାନଙ୍କୁ ପାକିସ୍ତାନରୁ ମାର୍ଗଦର୍ଶିକା ଏବଂ ପାଣ୍ଠି ମିଳୁଥିଲା।
ପହଲଗାମ ଆକ୍ରମଣରେ ସମ୍ପୃକ୍ତ ଆତଙ୍କବାଦୀଙ୍କୁ ଚିହ୍ନଟ କରାଯାଇଛି। ସେମାନେ POK ସହିତ ଜଡିତ ଥିଲେ। ମୁଖ୍ୟ ଆତଙ୍କବାଦୀଙ୍କ ପରିଚୟ ହାସିମ ମୁସା ଏବଂ ଅଲି ଓରଫ ତଲହା ଭାଇ ଭାବରେ ଚିହ୍ନଟ କରାଯାଇଛି। ଉଭୟ ଆତଙ୍କବାଦୀ ପାକିସ୍ତାନର ନାଗରିକ ଏବଂ ଲସ୍କର-ଏ-ତୈବା ସହିତ ଜଡିତ। ଉଭୟଙ୍କୁ କାଶ୍ମୀରରେ ରହୁଥିବା ଆଦିଲ ଥୋକର ସାହାଯ୍ୟ କରିଥିଲା। ଏହାବ୍ୟତୀତ ପାକିସ୍ତାନୀ ଆତଙ୍କବାଦୀଙ୍କୁ ସାହାଯ୍ୟ ଯୋଗାଇବାରେ ଓଭର ଗ୍ରାଉଣ୍ଡ ୱାର୍କର୍ସ (OGW)ର ଭୂମିକା ସାମ୍ନାକୁ ଆସିଛି। ଏମାନେ ସ୍ଥାନୀୟ ଲୋକ, ଯେଉଁମାନେ ଆତଙ୍କବାଦୀମାନଙ୍କୁ ଲଜିଷ୍ଟିକ୍ ସପୋର୍ଟ, ସୂଚନା, ମାର୍ଗଦର୍ଶନ ଏବଂ ଲୁଚି ରହିବା ସ୍ଥାନ ଦେଇଥାନ୍ତି। ପହଲଗାମ ତଦନ୍ତରେ ୧୫୦ ରୁ ଅଧିକ ଲୋକଙ୍କ ବୟାନ ରେକର୍ଡ କରାଯାଇଛି। OGW ର ଯୋଗାଯୋଗ ଏବଂ ସହଯୋଗୀଙ୍କ ଏକ ତାଲିକା ପ୍ରସ୍ତୁତ କରାଯାଇଛି। ତାଙ୍କ ବିରୁଦ୍ଧରେ ପ୍ରଶାସନିକ ଏବଂ ଆଇନଗତ କାର୍ଯ୍ୟାନୁଷ୍ଠାନ ପ୍ରକ୍ରିୟା ଆରମ୍ଭ ହୋଇଛି।
ତେବେ ତଦନ୍ତ ଟିମ୍ ଆକ୍ରମଣ ଘଟଣାର 3D ମ୍ୟାପିଂ ଏବଂ ସିନ୍ ରିକ୍ରିଏସନ୍ କରିଛନ୍ତି। ଏଥିରୁ ଜଣା ପଡିଛି ଯେ ଅସ୍ତ୍ରଶସ୍ତ୍ର ବେତାବ ଘାଟିରେ ଲୁଚାଇ ରଖାଯାଇଥିଲା। ଫୋରେନସିକ୍ ପ୍ରମାଣ ସଂଗ୍ରହ କରାଯାଇଥିଲା ଯେଉଁଥିରେ ଖୋକା ସାମିଲ ରହିଛି। ଏହାକୁ ଯାଞ୍ଚ ପାଇଁ ଫୋରେନସିକ୍ ଲ୍ୟାବକୁ ପଠାଯାଇଛି।
