ଭବାନୀପାଟଣା,୦୧/୦୮: ସ୍ୱତନ୍ତ୍ର ଓଡ଼ିଶା ଶିକ୍ଷକ ଯୋଗ୍ୟତା ପରୀକ୍ଷା (ଓଟିଇଟି) ପ୍ରଶ୍ନପତ୍ର ପ୍ରଘଟ ମାମଲାରେ କ୍ରାଇମବ୍ରାଞ୍ଚର ତନାଘନା ଜାରି ରହିଛି । ଶୁକ୍ରବାର ୩ ଜଣଙ୍କୁ କ୍ରାଇମବ୍ରାଞ୍ଚ୍ ନେଇଥିବା ବେଳେ କଳାହାଣ୍ଡିରୁ ମଧ୍ୟ ଜଣେ ପ୍ରଧାନ ଶିକ୍ଷକଙ୍କ ସମ୍ପୃକ୍ତି ଥିବା ଜଣାପଡିଛି । ଗୁରୁବାର ଭବାନୀପାଟଣା ବ୍ଲକ୍ ଭେଜିପଦର ସରକାରୀ ଉଚ୍ଚ ପ୍ରାଥମିକ ବିଦ୍ୟାଳୟର ପ୍ରଧାନ ଶିକ୍ଷକ ପ୍ରଶାନ୍ତ କୁମାର ଖମାରୀଙ୍କୁ କ୍ରାଇମବ୍ରାଞ୍ଚ ଉଠାଇ ନେଇଛି । ପ୍ରଧାନ ଶିକ୍ଷକ ଶ୍ରୀଖମାରି ଏକ୍ସ କ୍ୟାଡ଼ର ସଂଘର ସମ୍ପାଦକ ଥିଲେ । ଏହି ଘଟଣା ସାମ୍ନାକୁ ଆସିବା ପରେ ବିଭିନ୍ନ ମହଲରେ ଚର୍ଚ୍ଚାର ବିଷୟ ହୋଇଛି। ଓଟିଇଟି ପ୍ରଶ୍ନ ଲିକ୍ ଘଟଣାରେ ଗିରଫଦାରୀ ସଂଖ୍ୟା ୭କୁ ବଢ଼ିଲା ଓ ଗିରଫ ଶିକ୍ଷକଙ୍କ ସଂଖ୍ୟା ୫ ହେଲା ।
ସେହିପରି ସ୍ପେଶାଲ୍ ଓଟିଇଟି ପ୍ରଶ୍ନ ଲିକ୍ ଘଟଣାରେ ତଦନ୍ତକାରୀ କ୍ରାଇମ୍ବ୍ରାଞ୍ଚ୍କୁ ଆହୁରି କିଛି ଚାଞ୍ଚଲ୍ୟକର ତଥ୍ୟ ମିଳିଛି । ମାଧ୍ୟମିକ ଶିକ୍ଷା ପରିଷଦ (ବୋର୍ଡ) କାର୍ଯ୍ୟାଳୟରେ ହିଁ ପ୍ରଶ୍ନପତ୍ର ପ୍ରଘଟ ହୋଇଥିଲା ସ୍ପଷ୍ଟ ହେଉଛି । ପ୍ରଶ୍ନପତ୍ର ବିକ୍ରି କରିଥିବା ବୋର୍ଡ କାର୍ଯ୍ୟାଳୟର ଡାଟା ଏଣ୍ଟ୍ରି ଅପରେଟର୍ ଜିତନ୍ ମହାରଣା ବୋର୍ଡ ଉପସଭାପତିଙ୍କ ଲାପ୍ଟପ୍ରୁ ପେନ୍ ଡ୍ରାଇଭ୍ରେ ପ୍ରଶ୍ନ ଚୋରି କରି ନେଇ ଥିଲ। ପରେ ପରୀକ୍ଷା ନିୟନ୍ତ୍ରକ (କଣ୍ଟ୍ରୋଲର୍)ଙ୍କ ପ୍ରକୋଷ୍ଠରେ ଥିବା କମ୍ପ୍ୟୁଟରରେ ଟାଇପ୍ କରିଥିଲା । ଇଂରାଜୀରେ ଲେଖା ପ୍ରଶ୍ନକୁ ଓଡ଼ିଆରେ ଅନୁବାଦ କରି ତାହାକୁ ଲକ୍ଷାଧିକ ଟଙ୍କାରେ ବିକ୍ରି କରି ମୁନାଫା କମାଇଥିଲା । ବୋର୍ଡରୁ ଚାଲାଣ ହୋଇଥିବା ପ୍ରଶ୍ନକୁ ଶିକ୍ଷକଙ୍କର ଏକ ନେଟୱର୍କ ବିକ୍ରି କରିଥିଲେ ସେତିକିବେଳେ ଏହା ଭାଇରାଲ୍ ହୋଇଥିଲା । - ଏସବୁ କଥା ପ୍ରଶ୍ନ ଚୋରି ଓ ପ୍ରଘଟ ଘଟଣାର କିଙ୍ଗ୍ପିନ୍ ଜିତନ୍ ମହାରଣା ସ୍ୱୀକାର କରିବା ପରେ ବୋର୍ଡ କାର୍ଯ୍ୟାଳୟର ଅନ୍ୟ ଅଧିକାରୀ ଓ କର୍ମଚାରୀଙ୍କ ଉପରେ କ୍ରାଇମ୍ବ୍ରାଞ୍ଚ୍ର ସନ୍ଦେହ ବଢ଼ିଛି ।
ଏମିତିକି ବୋର୍ଡର ଜଣେ ମହିଳା କର୍ମଚାରୀଙ୍କର ଏ ପୂରା କାରବାରରେ ସମ୍ପୃକ୍ତି ଥିବା ନେଇ ଆଭାସ ପାଇବା ପରେ କ୍ରାଇମ୍ବ୍ରାଞ୍ଚ୍ ଟିମ୍ ସମ୍ପୃକ୍ତ ମହିଳାଙ୍କୁ ଦୁଇ ଦିନ ହେଲା ଜେରା ଚଳାଇଛନ୍ତି । ସେହିପରି କୋରାପୁଟ ସମେତ ରାଜ୍ୟର ଅନ୍ୟ କେତେକ ସ୍ଥାନରୁ ୩ ଜଣ ସରକାରୀ ସ୍କୁଲ୍ ଶିକ୍ଷକଙ୍କୁ କ୍ରାଇମ୍ବ୍ରାଞ୍ଚ୍ର ଆଉ ଏକ ଟିମ୍ ଉଠାଇ ଆଣିଛି ।
