ଭୁବନେଶ୍ୱର,୨୪/୦୧: ଜାନୁଆରୀ ସରିନି । ତାତି ବଢ଼ିଲାଣି । ଏପଟେ ତାଳ ଦେଇ ଜଙ୍ଗଲରେ ବି ନିଆଁ ଲାଗିବା ଘଟଣା ବଢ଼ିଛି । ଗତ ସପ୍ତାହକ ଭିତରେ କର୍ଣ୍ଣାଟକରେ ସର୍ବାଧିକ ବନାଗ୍ନି ଘଟିଥିବାବେଳେ ଓଡ଼ିଶା ଦ୍ୱିତୀୟରେ ରହିଛି ।
ଗତ ୨୪ ଘଣ୍ଟା ଭିତରେ ରାଜ୍ୟର ୪୨ଟି ସ୍ଥାନରେ ଜଙ୍ଗଲରେ ନିଆଁ ଲାଗିଛି । ଉପଗ୍ରହ ତଥ୍ୟକୁ ଆଧାର କରି ଫରେଷ୍ଟ ସର୍ଭେ ଅଫ୍ ଇଣ୍ଡିଆ (ଏଫ୍ଏସ୍ଆଇ) ଏହି ସୂଚନା ଜାରି କରିଛି। ଏହି ସୂଚନା ଅନୁସାରେ କୋରାପୁଟ ସର୍କଲ ଅନ୍ତର୍ଗତ ନବରଙ୍ଗପୁର ଡିଭିଜନର ରାଇଘର ରେଞ୍ଜର ୩ଟି ସ୍ଥାନରେ ଜଙ୍ଗଲ ନିଆଁ ରିପୋର୍ଟ ହୋଇଛି । ସମ୍ବଲପୁର ସର୍କଲର ୨୫ଟି ସ୍ଥାନରେ ବନାଗ୍ନି ଘଟିଛି । ଗତ ୨୪ ଘଣ୍ଟା ଭିତରେ ଏହି ସର୍କଲର ରେଙ୍ଗାଲି ରେଞ୍ଜରେ ୬ଟି ସ୍ଥାନରେ ଜଙ୍ଗଲରେ ନିଆଁ ଲାଗିଛି ।
ସେହିପରି କୁଚିଣ୍ଡା ରେଞ୍ଜର ୪ଟି ସ୍ଥାନରେ, ବେଲପାହାଡ଼ରେ ୨ଟି, ବରଗଡ଼ରେ ୨ଟି, କାମଗାଁ ରେଞ୍ଜରେ ୨ଟି, ଜମନକିରାରେ ୨ଟି, ବାଗଡିହି, ବଦରମା, ନୃସିଂହନାଥ, ପାଇକମାଳ, ଧମା, କୋଲାବିରା, ପଡ଼ିଆବାହାଲ ରେଞ୍ଜରେ ଗୋଟିଏ ଲେଖାଏ ସ୍ଥାନରେ ଜଙ୍ଗଲ ଜଳିଥିବା ଜଣାପଡ଼ିଛି । ଭବାନୀପାଟଣା ସର୍କଲର ଥୁଆମୁଳ ରାମପୁର, ଉଲୁଣ୍ଡା ରେଞ୍ଜ, ରାଉରକେଲା ସର୍କଲର ଗୋପାଳପୁର, ଦେବଗଡ଼, ବାରକୋଟ, ଚମ୍ପୁଆ ରେଞ୍ଜ, ରାଜାମୁଣ୍ଡା ବିଟ୍, ବ୍ରହ୍ମପୁର ସର୍କଲର ମୋହନା, ବାରିପଦା ସର୍କଲର ରାସଗୋବିନ୍ଦପୁର ରେଞ୍ଜରେ ବନାଗ୍ନି ଘଟିଛି । ଅନୁଗୁଳ ସର୍କଲର ତାଳଚେର ରେଞ୍ଜ, କେନ୍ଦ୍ରାପଡ଼ା ରେଞ୍ଜ ଅନ୍ତର୍ଗତ ମାର୍ଶାଘାଇ ବିଟ୍ରେ ଜଙ୍ଗଲ ନିଆଁ ଲାଗିଛି । ବର୍ତ୍ତମାନ ଶୀତର ବିଦାୟ ସମୟ ପହଞ୍ଚିଥିବାବେଳେ ଦେଶରେ ଜଙ୍ଗଲ ନିଆଁ ବଢ଼ିବା ସମୟ ଆସିଯାଇଛି ।
ଗତ ୭ ଦିନର ତଥ୍ୟ ଅନୁସାରେ ସର୍ବାଧିକ ଜଙ୍ଗଲ ନିଆଁ ଘଟିଛି କର୍ଣ୍ଣାଟକରେ । ଦ୍ୱିତୀୟରେ ରହିଛି ଓଡ଼ିଶା । ତୃତୀୟରେ ମହାରାଷ୍ଟ୍ର, ଚତୁର୍ଥରେ ଅରୁଣାଚଳ ପ୍ରଦେଶ ଓ ପଶ୍ଚିମରେ ନାଗାଲାଣ୍ଡ ଅଛି । ଓଡ଼ିଶାରେ ୧୬ ଜାନୁଆରୀରୁ ଆଜି ସୁଦ୍ଧା ୧୭୦ଟି ବନାଗ୍ନି ରିପୋର୍ଟ ହୋଇଛି । କର୍ଣ୍ଣାଟକରେ ୨୪୨, ମହାରାଷ୍ଟ୍ରରେ ୧୪୫, ଅରୁଣାଚଳ ପ୍ରଦେଶରେ ୧୪୦, ନାଗାଲାଣ୍ଡରେ ୧୨୩ଟି ସ୍ଥାନରେ ଜଙ୍ଗଲ ଜଳିଛି।
