ନୂଆଦିଲ୍ଲୀ,୧୧/୦୪: ଆମେରିକାର ନ୍ୟୁୟର୍କ ସିଟିରେ ହେଲିକପ୍ଟର କ୍ରାସ । ଦୁର୍ଘଟଣାଗ୍ରସ୍ତ ହୋଇ ହଡସନ ନଦୀରେ ଖସିଲା ହେଲିକପ୍ଟର। ଫଳରେ ଚାଲିଗଲା ଗୋଟିଏ ପରିବାରର ୬ ଜଣଙ୍କ ଜୀବନ । ସୋସିଆଲ ମିଡିଆରେ ପୋଷ୍ଟ କରାଯାଇଥିବା ଭିଡିଓରେ ଦେଖିବାକୁ ମିଳିଛି ଯେ, ହେଲିକପ୍ଟରଟି ପାଣିରେ ବୁଡି ଯାଇଛି ଏବଂ ଅନେକ ଉଦ୍ଧାରକାରୀ ଡଙ୍ଗା ଉକ୍ତ ସ୍ଥାନକୁ ଯାଞ୍ଚ କରିବା ସହ ହେଲିକପ୍ଟରର ଧ୍ୱଂସାବଶେଷ ହଟାଇବାରେ ନିୟୋଜିତ ଅଛନ୍ତି। ଏହି ଘଟଣାର ଭିଡି଼ଓ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି ।
ଏହାମଧ୍ୟ ପଢନ୍ତୁ- ଦିଲ୍ଲୀ ଏୟାରପୋର୍ଟରେ ବିମାନ ଅବତରଣ ପରେ ଏୟାର ଇଣ୍ଡିଆ ଏକ୍ସପ୍ରେସର ପାଇଲଟଙ୍କ ମୃତ୍ୟୁ
ତେବେ ରିପୋର୍ଟ ଅନୁଯାୟୀ, ତିନି ଜଣ ପିଲା ଏବଂ ପାଇଲଟଙ୍କୁ ନେଇ ଏକ ସ୍ପେନୀୟ ପରିବାର ହେଲିକପ୍ଟରରେ ଥିଲେ। ଫ୍ଲାଇଟ୍ ରାଡାର ଗ୍ରାଫଗୁଡିକ ଦର୍ଶାଇଲା ଯେ ବିମାନଟି ଦୁର୍ଘଟଣାଗ୍ରସ୍ତ ହେବା ପୂର୍ବରୁ ପ୍ରାୟ ୧୫ ମିନିଟ୍ ପର୍ଯ୍ୟନ୍ତ ଆକାଶରେ ଥିଲା। ଏହି ସମୟ ମଧ୍ୟରେ ଏହା ଅନେକ ଥର ପତ୍ର ପରି ଥରିଥିବାର ଦେଖାଯାଉଥିଲା ଏବଂ ପରେ ହଡସନ ନଦୀରେ ଖସିପଡିଥିଲା। ତେବେ ବର୍ତ୍ତମାନ ସୁଦ୍ଧା ମୃତକଙ୍କ ପ୍ରକୃତ ପରିଚୟ ମିଳିପାରି ନାହିଁ। ମେୟର ଏରିକ ଆଡାମସ୍ ଗଣମାଧ୍ୟମ ସହ କଥାବାର୍ତ୍ତା ବେଳେ କହିଛନ୍ତି ଯେ, ବର୍ତ୍ତମାନ ସମସ୍ତ ୬ ଜଣଙ୍କୁ ପାଣି ଭିତରୁ ବାହାର କରାଯାଇଛି ଏବଂ ଦୁଃଖର ବିଷୟ ସମସ୍ତଙ୍କ ଜୀବନ ଚାଲିଯାଇଛି ।ଏହା ଅତ୍ୟନ୍ତ ହୃଦୟ ବିଦାରକ ଦୁର୍ଘଟଣା।ଅନ୍ୟପଟେ ଏହି ଦୁର୍ଘଟଣା ସମ୍ପର୍କରେ ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କହିଛନ୍ତି, "ହଡସନ ନଦୀରେ ଏକ ଭୟଙ୍କର ହେଲିକପ୍ଟର ଦୁର୍ଘଟଣା ଘଟିଛି। ଏଥିରୁ ଜଣାପଡୁଛି ଯେ ପାଇଲଟ, ଦୁଇ ବୟସ୍କ ଏବଂ ତିନି ପିଲାଙ୍କ ସମେତ ୬ଜଣ ଲୋକ ଆଉ ନାହାଁନ୍ତି। ଦୁର୍ଘଟଣାର ଭିଡିଓ ଅତ୍ୟନ୍ତ ଭୟାନକ ଅଟେ। ତେବେ ଦୁର୍ଘଟଣାର ତଦନ୍ତ କରୁଛି ପୋଲିସ ।
