ନୂଆଦିଲ୍ଲୀ,୨୭/୦୯: କାନାଡ଼ାରେ ୩୯ ବର୍ଷ ପୂର୍ବେ ଏୟାର ଇଣ୍ଡିଆ ବିମାନ-୧୮୨ରେ ହୋଇଥିବା ବିସ୍ଫୋରଣକୁ ନେଇ ତୃତୀୟ ଥର ପାଇଁ ଏହାର ତଦନ୍ତ କରିବାକୁ ଦାବି ଜୋର ଧରିଛି। କନିଷ୍କ ବୋମା ବିସ୍ଫୋରଣକୁ ନେଇ ତୃତୀୟ ଥର ତଦନ୍ତ ଦାବିକୁ ବିରୋଧ କରିଛନ୍ତି ଭାରତୀୟ ବଂଶୋଦ୍ଭବ ସାଂସଦ ଚନ୍ଦ୍ରା ଆର୍ଯ୍ୟ। କୁହାଯାଉଛି ଯେ, ଏହା ଭାରତ ବିରୋଧୀ ଏକ ଷଡ଼ଯନ୍ତ୍ର ଅଟେ। ତୃତୀୟ ଥର ତଦନ୍ତ ଦାବିର ଉଦ୍ଦେଶ୍ୟ ହେଉଛି ଖାଲିସ୍ତାନୀ ଆତଙ୍କବାଦୀଙ୍କୁ ଏହି ଦୋଷରୁ ମୁକ୍ତ କରିବା ଏବଂ ଭାରତ ଉପରେ ଦୋଷ ଲଦିବାର ଏକ ଷଡ଼ଯନ୍ତ୍ର ବୋଲି କୁହାଯାଉଛି। ସ୍ମରଣଥାଉକି, ଖଲିସ୍ତାନୀ ଆତଙ୍କବାଦୀମାନେ ଜୁନ୍ ୨୩ ତାରିଖ ୧୯୮୫ରେ ଏୟାର ଇଣ୍ଡିଆ ବିମାନରେ ବୋମା ବିସ୍ଫୋରଣ କରିଥିଲେ। ଏହି ଘଟଣାରେ ୩୨୯ ଜଣ ଲୋକଙ୍କ ମୃତ୍ୟୁ ହୋଇଥିଲା।
ଜଷ୍ଟିନ ଟ୍ରୁଡୋଙ୍କ ଦଳର ଜଣେ ହିନ୍ଦୁ ସାଂସଦ କାନାଡାରେ କନିଷ୍କ ବୋମା ବିସ୍ଫୋରଣର ପୁନଃ ତଦନ୍ତ ଦାବି ଉପରେ ତୀବ୍ର ବିରୋଧ କରିଛନ୍ତି। ସେ କହିଛନ୍ତି ଯେ ଏହି ପ୍ରସଙ୍ଗରେ ଦୁଇଟି ତଦନ୍ତ ହୋଇସାରିଛି। ଉଭୟ ଅନୁସନ୍ଧାନରେ ଖାଲିସ୍ତାନୀ ଆତଙ୍କବାଦୀମାନେ ବୋମା ବିସ୍ଫୋରଣ ପାଇଁ ଦାୟୀ ବୋଲି ଜଣାପଡିଛି। ବର୍ତ୍ତମାନ ସଂସଦୀୟ ପୋର୍ଟାଲରେ ତୃତୀୟ ଥର ପାଇଁ ତମାମ ମାମଲାର ଅନୁସନ୍ଧାନ ପାଇଁ ଦାବି କରାଯାଉଛି, ଯାହାକି ଏକ ପୂର୍ଣ୍ଣ ଷଡ଼ଯନ୍ତ୍ର ଅଟେ।
ତଦନ୍ତ ପାଇଁ ଦାବି କରିଛି କିଏ?
କାନାଡାର ଲିବରାଲ୍ ପାର୍ଟିର ସାଂସଦ ସୁଖ ଧଲିୱାଲ କନିଷ୍କା ବିସ୍ଫୋରଣ ଘଟଣାର ନୂତନ ତଦନ୍ତ ଦାବି କରିଛନ୍ତି। ଏହି ଅନୁସନ୍ଧାନ ପୂର୍ବରୁ, ଅନ୍ୟ ଦୁଇ ତଦନ୍ତରେ, ଖାଲିସ୍ତାନୀ ଆତଙ୍କବାଦୀମାନେ ବୋମା ବିସ୍ଫୋରଣ ପାଇଁ ଦାୟୀ ବୋଲି ଜଣାପଡ଼ିଥିଲା। ପ୍ରଥମ ଥର ହୋଇଥିବା ତଦନ୍ତରେ ଏହା ମଧ୍ୟ ଜଣାପଡିଛି ଯେ, ବୋମା ବିସ୍ଫୋରଣରେ ଖାଲିସ୍ତାନୀ ଆତଙ୍କବାଦୀମାନେ ସମ୍ପୃକ୍ତ ଥିଲେ। ତୃତୀୟ ତଦନ୍ତ ଦାବିକୁ ନେଇ ପୀଡ଼ିତଙ୍କ ପରିବାର ସଦସ୍ୟ ମଧ୍ୟ ବିରୋଧ କରିଛନ୍ତି।
ଭାରତୀୟ ବଂଶୋଦ୍ଭବ ସାଂସଦ ଚନ୍ଦ୍ରା ଆର୍ଯ୍ୟ କହିଛନ୍ତି ଯେ '୩୯ ବର୍ଷ ପୂର୍ବେ ଖାଲିସ୍ତାନୀ ଆତଙ୍କବାଦୀମାନେ ଏକ ଉଡ଼ନ୍ତା ଏୟାର ଇଣ୍ଡିଆ ବିମାନରେ ବୋମା ବିସ୍ଫୋରଣ କରି ଉଡ଼ାଇ ଦେଇଥିଲେ ଯେଉଁଥିରେ ୩୨୯ ଜଣଙ୍କର ମୃତ୍ୟୁ ହୋଇଥିଲା। ଏହି ଘଟଣା କାନାଡ଼ା ଇତିହାସରେ ସବୁଠାରୁ ବଡ଼ ହତ୍ୟାକାଣ୍ଡ। ଏହି ଆକ୍ରମଣ ପାଇଁ ଦାୟି କାନାଡାରେ ଏବେବି ଖୁଲମଖୁଲା ବୁଲୁଛି। ଚନ୍ଦ୍ରା ଆର୍ଯ୍ୟ କହିଛନ୍ତି ଯେ ଏହି ଆକ୍ରମଣରେ ରମା ନାମକ ଜଣେ ମହିଳାଙ୍କର ମୃତ୍ୟୁ ଘଟିଛି, ଯାହାଙ୍କ ସ୍ୱାମୀ ଗ୍ଲୋବ ଆଣ୍ଡ୍ ମେଲକୁ କହିଛନ୍ତି ଯେ, ତଦନ୍ତ ପାଇଁ ପୁଣି ଥରେ ଦାବି କରିବା ନୈରାଶ୍ୟଜନକ ଅଟେ। ପୁରୁଣା କ୍ଷତକୁ ଭଲ କରିବା ପାଇଁ ଏହା ଏକ ସୁଚିନ୍ତିତ ଷଡ଼ଯନ୍ତ୍ର। ଏହାଦ୍ବାରା ଆତଙ୍କବାଦୀ କାର୍ଯ୍ୟକଳାପ ପାଇଁ ପ୍ରଚାର ଏବଂ ସମର୍ଥନ ହାସଲ କରିବାର ଏକ ପ୍ରୟାସ ଅଟେ। ଏହି ଆକ୍ରମଣ ପାଇଁ କାନାଡା ସୁପ୍ରିମକୋର୍ଟ ମଧ୍ୟ ଖାଲିସ୍ତାନୀଙ୍କୁ ଦାୟୀ କରିଛନ୍ତି।