ମୁମ୍ବାଇ: ମହାରାଷ୍ଟ୍ର ବିଧାନସଭା ନିର୍ବାଚନରେ ବିଶାଳ ବିଜୟ ପରେ ଦେବେନ୍ଦ୍ର ଫଡ଼ନାଭିସ୍, ଏକନାଥ ସିନ୍ଦେ ଏବଂ ଅଜିତ ପାଓ୍ବାର ମିଳିତ ଭାବେ ସାମ୍ବାଦିକ ସମ୍ମିଳନୀ କରିଛନ୍ତି । ଏହି ସମୟରେ ଉପମୁଖ୍ୟମନ୍ତ୍ରୀ ଅଜିତ ପାଓ୍ବାର କହିଛନ୍ତି, ଜନତା ଫଇସଲା କରିଦେଇଛନ୍ତି ପ୍ରକୃତ ଏନସିପି କିଏ । ଆମ ପାଖରୁ ଆରମ୍ଭ ହୋଇଥିବା ଲାଡଲୀ ବହେନା ହିଁ ଗେମ୍ ଚେଞ୍ଜର ସାବ୍ୟସ୍ତ ହୋଇଛି । ସେ କହିଛନ୍ତି, ମୋ ରାଜନୈତିକ କ୍ୟାରିୟରରେ ପ୍ରଥମ ଥର କୌଣସି ମେଣ୍ଟକୁ ୨୦୦ରୁ ଅଧିକ ଆସନ ମିଳିଛି । ଏଥର ନିର୍ବାଚନରେ ବିରୋଧୀ ଦଳ ଶୂନ ହୋଇଯାଇଛନ୍ତି । ଆମେ ଲୋକସଭା ନିର୍ବାଚନରେ ହୋଇଥିବା ଭୁଲକୁ ସୁଧାରିଛୁ । କିନ୍ତୁ ଲୋକସଭା ନିର୍ବାଚନରେ ଖୁସି ହେଉଥିବା ଲୋକେ ଏବେ ପ୍ରଶ୍ନ ଉଠାଉଛନ୍ତି ବୋଲି ଅଜିତ ପାଓ୍ବାର କହିଛନ୍ତି ।
ସେପଟେ ଆଜି ପ୍ରାରମ୍ଭିକ ଗଣତି ସମୟରେ ସେ ପଛରେ ପଡ଼ିଥିବା ନେଇ ଖବର ପ୍ରସାରଣ ହୋଇଥିଲା ବୋଲି କହିଛନ୍ତି । ଏହି ଖବର ଦେଖି ସେ ଆଶ୍ଚର୍ଯ୍ୟ ହୋଇଯାଇଥିଲେ । ଅଜିତ ପାଓ୍ବାର କହିଛନ୍ତି, ସକାଳେ ନ୍ୟୁଜ ଆସିଲା ଯେ ମୁଁ ପଛରେ ରହିଯାଇଛି । କିନ୍ତୁ ମୁଁ ଏକ ଲକ୍ଷରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଛି । ଏମିତି ଖବର ଚାଲିଲା ଯେ, ମୁଁ ଚିନ୍ତାରେ ପଡ଼ିଯାଇଥିଲି। ଫୋନ୍ କଲା ପରେ ଜଣାପଡ଼ିଲା ଯେ, ବାଲାଟ ପେପର ଭୋଟ୍ରେ ବି ମୁଁ ଆଗରେ ରହିଛି । ଏମିତି କରିବା କଥା ନୁହେଁ କାରଣ ଲୋକେ ମିଡିଆ ଉପରେ ବିଶ୍ବାସ କରୁଛନ୍ତି ବୋଲି ଏନସିପି ମୁଖ୍ୟ କହିଛନ୍ତି ।
ଆମେ ପୂର୍ବରୁ କହିଥିଲୁ ଲୋକଙ୍କ ପାକକୁ ଯିବୁ । ଆଉ ଆଜି ଜନାଦେଶ ଆସିସାରିଛି ବୋଲି ଅଜିତ ପାଓ୍ବାର କହିଛନ୍ତି । ସେ ଆହୁରି କହିଛନ୍ତି, ଜନତା ଜଣାଇଦେଲେ ଯେ ଘରେ ବସି ଫେସବୁକରେ ସରକାର ଚଳାଇ ହେବନି । କାର୍ଯକର୍ତ୍ତା ନିଜ ଘରେ ନୁହେଁ ବରଂ ଲୋକଙ୍କ ଦ୍ବାର ମୁହଁରେ ଭଲ ଲାଗନ୍ତି । ୨୦୧୯ରେ ଯେଉଁ ସରକାର ଗଠନ ହୋଇଥିଲା ତାକୁ ଲୋକେ ପସନ୍ଦ କଲେ ନାହିଁ । ୨୦୨୪ରେ ଲୋକେ ସ୍ପଷ୍ଟ କରିଦେଲେ ଶିବସେନା କାହାର ଓ ଏନସିପି କାହାର ।
