ଭୁବନେଶ୍ୱର, ୨୭/୦୨: କିଏ ହେବେ ବୋର୍ଡ, ନିଗମ, କମିଶନ ଓ ପରିଷଦର ସଭାପତି/ଅଧ୍ୟକ୍ଷ? କାହାକୁ କେଉଁଠି ଥଇଥାନ କରାଯିବ । ମନ୍ତ୍ରିମଣ୍ଡଳ ସଂପ୍ରସାରଣରେ କାହାକୁ ଗୁରୁ ଦାୟିତ୍ୱ ମିଳିବ? କେଉଁ ଫର୍ମୁଲା ଆପଣାଇବ ଦଳ? ନୂଆ ନିଯୁକ୍ତି ଜରିଆରେ ରାଜ୍ୟ ସଂଗଠନ କିଭଳି ବଳୁଆ ହେବ? ଆଜି ଏ ସବୁ ବିନ୍ଦୁକୁ ନେଇ ୫ ଘଣ୍ଟା ଧରି ଲଗାତର ଭାବେ ମାନସମନ୍ଥନ କରିଛନ୍ତି ବିଜେପିର ଶୀର୍ଷ ନେତୃତ୍ୱ ।
ରାଜ୍ୟ ବିଜେପିର ଶୀର୍ଷ ନେତୃତ୍ୱ ବୁଧବାର ଜରୁରୀ ବୈଠକ କରିଛନ୍ତି । ରାଜ୍ୟ କାର୍ଯ୍ୟାଳୟ ବଦଳରେ ପ୍ରଥମଥର ପାଇଁ ଉପମୁଖ୍ୟମନ୍ତ୍ରୀ କେଭି ସିଂହଦେଓଙ୍କ ଘରେ ସମସ୍ତେ ଏକାଠି ହୋଇଛନ୍ତି । ଗୁରୁତ୍ୱପୂର୍ଣ୍ଣ ଆଲୋଚନା ହୋଇଛି । ଖାଲି ରାଜ୍ୟ ନେତୃତ୍ୱ ନୁହେଁ, ରାଷ୍ଟ୍ରୀୟ ସାଧାରଣ ସମ୍ପାଦକ ତରୁଣ ଚୁଘ୍ ଓ ରାଜ୍ୟ ପ୍ରଭାରୀ ବିଜୟ ପାଲ ସିଂ ତୋମାର ମଧ୍ୟ ଏହି ବୈଠକରେ ସାମିଲ ହୋଇଥିଲେ । ମୁଖ୍ୟମନ୍ତ୍ରୀକୁମ୍ଭ ମେଳାରୁ ଫେରିବା ପରେ ମନ୍ତ୍ରିମଣ୍ଡଳ ସଂପ୍ରସାରଣ ସହିତ ବୋର୍ଡ, ନିଗମ ନିଯୁକ୍ତିକୁ ନେଇ ଗୁରୁତ୍ୱପୂର୍ଣ୍ଣ ନିଷ୍ପତ୍ତି ନିଆଯିବ ବୋଲି ଶୁଣିବାକୁ ମିଳୁଥିଲା । ମୁଖ୍ୟମନ୍ତ୍ରୀ ମଙ୍ଗଳବାର ଉତ୍ତରପ୍ରଦେଶରୁ ଫେରିଥିଲେ । ଆଜି ମଧ୍ୟାହ୍ନ ପ୍ରାୟ ୧ଟା ବେଳକୁ ସେ ଉପମୁଖ୍ୟମନ୍ତ୍ରୀ କେଭି ସିଂହଦେଓଙ୍କ ସରକାରୀ କ୍ୱାର୍ଟର୍ସରେ ପହଞ୍ଚିଥିଲେ । ରାଜ୍ୟ ସଭାପତି ମନମୋହନ ସାମଲ, ସଂଗଠନ ସମ୍ପାଦକ ମାନସ ମହାନ୍ତି, ପୂର୍ବତନ ସଭାପତି ସମୀର ମହାନ୍ତି, ସାଂସଦ ବସନ୍ତ ପଣ୍ଡା ପ୍ରମୁଖ କେଭିଙ୍କ କ୍ୱାର୍ଟର୍ସରେ ପହଞ୍ଚି ବୈଠକରେ ସାମିଲ ହୋଇଥିଲେ ।
ମିଳିଥିବା ସୂଚନା ଅନୁସାରେ, ବୈଠକରେ ବିଭିନ୍ନ ବୋର୍ଡ, ନିଗମ, ପରିଷଦ ଓ କମିଶନରେ ନିଯୁକ୍ତି ନେଇ ଏକ ତାଲିକା ଚୂଡ଼ାନ୍ତ ହୋଇଛି । ଏହି ତାଲିକାରେ ଥିବା ପ୍ରତିଟି ନାଁକୁ ନେଇ ଆଲୋଚନା ହୋଇଥିଲା । ବିଧାୟକ ନଥିବା ଓ ରାଜ୍ୟର ସାଙ୍ଗଠନିକ ଦାୟିତ୍ୱରେ ଥିବା, ଦୀର୍ଘ ଦିନରୁ ଗୁରୁ ଦାୟିତ୍ୱ ସମ୍ଭାଳି ଆସିଥିବା ଓ ଅନ୍ୟ ଆଶାୟୀ ନେତାଙ୍କୁ ବୋର୍ଡ ଓ ନିଗମରେ ଥଇଥାନ କରାଯିବ । ଅନ୍ୟ ଦଳରୁ ଆସିଥିବା କିଛି ନେତାଙ୍କୁ ମଧ୍ୟ ବିଚାରକୁ ନିଆଯାଇଛି । ତେବେ ବିଧାୟକମାନଙ୍କୁ ରାଜ୍ୟ ଯୋଜନା ବୋର୍ଡ, ଜିଲ୍ଲା ଯୋଜନା ବୋର୍ଡ ଓ ଅନ୍ୟ କମିଟିରେ ନିଯୁକ୍ତି ଦିଆଯିବ । ଏହି ନିଯୁକ୍ତି ଜରିଆରେ ଆଶାୟୀଙ୍କୁ ସନ୍ତୁଷ୍ଟ କରି ଦଳୀୟ ସଂଗଠନକୁ ମଜଭୁତ୍ କରିବାକୁ ଯୋଜନା ହୋଇଛି । ବୈଠକରୁ ବାହାରି ବିଜେପିର ରାଷ୍ଟ୍ରୀୟ ସାଧାରଣ ସମ୍ପାଦକ ଶ୍ରୀ ଚୁଘ୍ କହିଛନ୍ତି। ସାଂଗଠନିକ ଆଲୋଚନା ପାଇଁ ବୈଠକ ହୋଇଥିଲା । ଆଗକୁ ଖୁବ୍ଶୀଘ୍ର ରାଜ୍ୟ ସଭାପତି ଘୋଷଣା ହେବ ।
ରାଜ୍ୟ ସଭାପତି ମନମୋହନ ସାମଲ କହିଛନ୍ତି, ଖୁବଶୀଘ୍ର ନିଗମ, ବୋର୍ଡ ଓ କମିଶନରେ ନିଯୁକ୍ତି ହେବ । ବୈଠକରେ ବିଭିନ୍ନ ଦିଗରୁ ଆଲୋଚନା ହୋଇଛି । ସରକାର ଆଉ ସଂଗଠନ ନେଇ ଆଲୋଚନା ହୋଇଛି । ରାଜ୍ୟରେ ସରକାର ଠିକ୍ରେ ଚାଲିଛି । ସବୁ କମିଶନ ଓ କର୍ପୋରେସନ ବି ଠିକ୍ ଚାଲିଛି । ଅତିଶୀଘ୍ର ସବୁ ନିଯୁକ୍ତି ଶେଷ ହେବ । ତେବେ ରାଜ୍ୟ ସଭାପତି ନିଯୁକ୍ତି ହେବା ପାଇଁ ଏହି ସ୍ଥାନ ଉପଯୁକ୍ତ ନୁହେଁ ବୋଲି ସେ ଟିପ୍ପଣୀ ରଖିଛନ୍ତି ।
ସେହିଭଳି ମନ୍ତ୍ରିମଣ୍ଡଳ ସଂପ୍ରସାରଣ ଉପରେ ମଧ୍ୟ ବୈଠକରେ ଆଲୋଚନା ହୋଇଛି । ଖାଲିଥିବା ୬ଟି ସ୍ଥାନ ପାଇଁ ମନ୍ତ୍ରୀ ପଦ ବଣ୍ଟାଯିବ । ଏକାଧିକ ଓଜନିଆ ବିଭାଗ ରହିଥିବା ମନ୍ତ୍ରୀଙ୍କୁ ହାଲୁକା କରି ସଂଗଠନ ଦାୟିତ୍ୱ ଦିଆଯିବ । ଆଗକୁ ପଞ୍ଚାୟତ ନିର୍ବାଚନ ଥିବାରୁ ସଂଗଠନ ଯେଭଳି ବଳୁଆ ଓ କ୍ରିୟାଶୀଳ ହେବ ତାକୁ ସବୁଠୁ ଅଧିକ ଗୁରୁତ୍ୱ ଦିଆଯାଉଛି । ସରକାର ଓ ସଂଗଠନ ଗୋଟିଏ ମୁଦ୍ରାର ଦୁଇଟି ପାଶ୍ୱର୍ ଭଳି କାମ କରିବେ । ଉଭୟଙ୍କ ଭିତରେ ଯେଭଳି ଠିକ୍ ସମନ୍ୱୟ ରହିବ ତାକୁ ସମସ୍ତେ ପ୍ରାଥମିକତା ଦେବାକୁ ରାଷ୍ଟ୍ରୀୟ ସାଧାରଣ ସମ୍ପାଦକ ଶ୍ରୀ ଚୁଘ୍ ପରାମର୍ଶ ଦେଇଥିବା ଜଣାପଡ଼ିଛି । ନୂଆ ସରକାର କାର୍ଯ୍ୟକାରୀ କରୁଥିବା ସରକାରୀ ଯୋଜନା, ବଜେଟ୍ରେ ପାରିତ ନୂଆ ପ୍ରସ୍ତାବ ଓ ଯୋଜନା ଓ ଏବଂ ସରକାରଙ୍କ ଆଠ ମାସର ସଫଳତା ଯେଭଳି ଘରେ ଘରେ ପହଞ୍ଚିବ ତାକୁ ନିଶ୍ଚିତ କରିବାକୁ ଦୁଇ ରାଷ୍ଟ୍ରୀୟ ନେତା ରାଜ୍ୟ ନେତୃତ୍ୱକୁ ପରାମର୍ଶ ଦେଇଛନ୍ତି ।
ଆଗାମୀ ପଞ୍ଚାୟତ ନିର୍ବାଚନ ପାଇଁ ରଣନୀତି କିଭଳି ରହିବ? ସରକାରର ଛବିକୁ ଚମକାଇବାକୁ ଆଉ କ’ଣ ପଦକ୍ଷେପ ନିଆଯିବ, ତା ଉପରେ ମଧ୍ୟ ଆଲୋଚନା ହୋଇଥିଲା । ପ୍ରତି ଗାଁ ଓ ବୁଥ୍ରେ ବିଜେପିର ସଂଗଠନକୁ ମଜବୁତ୍ କରିବାକୁ ନେତାଙ୍କୁ ନିଜ କ୍ଷେତ୍ରକୁ ଅଧିକ ଗସ୍ତ କରିବାକୁ କୁହାଯିବ । ଗାଁ ଓ ପଞ୍ଚାୟତସ୍ତରରେ ନିୟମିତ ଦଳୀୟ ବୈଠକ କରି କର୍ମୀଙ୍କୁ ଉତ୍ସାହିତ କରିବାକୁ କୁହାଯାଇଛି ।
